PHULLEN-AH LO ZIN TA CHE

Han ti ngawt ila, a thu thiamlo leh tawngkam bahlah ber mai hian zin tura sawmna thu hi ziah tulin kan hre ve tlat si a. Thu sep sual palh avanga mi pawi kan sawi a nih chuan inhriatthiamah kan ti a ni ang chu. Zin tura sawm e ti lo chuan kan in um tiau zawk ang tih hi he article ziaktute hlauhthawn ber pakhat a ni.

Sailo lal ropui leh huaisen, fing tak, Vanphunga khua Phullen hi a hming ngawt chuan phul zawl rai dup mai niawm hi a ni a. Tun laia hming tha pui pui, Zonunmawia te an ruai, insual tuma an in um zuai zuai leh Lalkrawspuii-te an K.S. tlat si ang deuh hian a khw thleng hian phul zawl hmun chu a chawi lo hrim hrim a. Fiamthuah phei chuan, “Arbawm pawh lum se, chhar leh ai chuan a thar tah mai a awl zawk,” an lo ti hial a ni. Mahse tunah zawng mi tih danin khawthar kan kai a, a awih zual pui chu kan tinsan ta. Engapawh chu lo nise, Phullen tih hming chawina chhan sawifiah tur chuan hmanlai thilte inrinsiak a tul dawn avangin hmehbel leh sawirem hna chu thawk lo mai ila.

Mizoram Map kan en chuan Phullen khua hi khaw te reuhte, Tuivawl leh Tuivai inkara mi, hmar lamah Zawngin, Suangpuilawn leh Phuaibuang; chhimlamah Changzawl, Lungpher leh Sihfa; khawchhak lamah Luangpawn, N.E. Bualpui leh Pawlrang; khawthlang lamah Buhban-te’n a ri a. Map a a lan dan ang ngawt hi chu a ni hauh lo. Lal Vanphunga lal lai phei chuan khaw lian tak, a ramin a zawh loh avanga Bawrhsapin Vanbawk ram a pek belh hial ngai kahwpa mihring tam an ni a. Tuna Changzawl ram leh Vanbawng ram zawng zawgn hi khatih laia Phullen lal ram vek a ni. Puma zaiah pawh kan hmu, hmarlam lal pakhat hian Sial a renloh thuin Vanphunga chu a va phuah el a, Vanphunga chuan -

“Sial renloh nge tha, tlang ren lo,
Tlang ren lo kan lenna a zau tual tual,”

tiin, Vanbawng ram a neihbelh chu chhuang takin a va chhang a ni. Hei chauh hi a ni lo, Lalnu Lalkaichhungi lal lutuk, pawn chhuak ngai lo chu Puma zai bawkin -

“Lalkaichhungi tuallai a leng lo,
Tangka rothangpui a leng zawk e,”

an han ti leh chiah bawk a. Hetiang khawpa lal ropui leh huaisen hian Sap pawh a lal ram chhungah chuan a hlau bik lo. Kristiante’n a lalna dipdal dawna a hriat avangin hrem (sawi) an ni a. Zosap meuh pawh ringtharte thlavang hauvin a han zin nghe nghe.

Aizawl atanga Km. 130 vela hla Phullen-ah hian nitin Bus pakhat R.K. Travels leh Zodinsang te an tlan reng a(1997). An khah theih em avangin Pu Sumtinmanga dawr, Zarkawtah ticket Rs. 60.00 in a hma ni a lak ngei a tha. Tin, mahni motor-a kal turte chuan Saitual road-ah kalin hmar lamah Saitual khua i tlan tlang ang a. Tamdil kawng engemaw chen i zawh hnuah Tuivawl road-ah i tlan zel ang a, Tuivawl lui i thlen chuan Phullen ram i thleng tihna a ni; bo na tur a awm tawh lo. Phullen lam pana rei ngial a sawh gear-a i tlan chhoh hnuah Phullen south (Thanglailung) i thleng hmasa phawt ang a, chuta tang chuan Phullen tlang, Diakkawn Bazar cham phei put chu kar lovah i thleng phei thuai tawh mai ang. Phullen road hi PWD metal road, khawih lai mek a ni a. Alkatra luan zel tur emaw i tih lai khan border lungphah, biboh tak leh leichar pangngaiah i tlan leh thin ang a,. Chutianga thui tawk i insawh chhoh hnuah mawng sil tutuk tur thawi nan an lo luan leh zeuh thin ang a, chutiang reng reng chuan Phullen chu i thleng dawn a ni. Mahse inchhir duh suh, i khaw tlawh tur hi khaw thianghlim, Zu leh ruihhlo dang reng reng pawh awm lohna ‘Dry Village’ a ni a, thil hlu tinreng i la hmu dawn.

Naupang tualchaiin, “Chhirdem kam, kam lehlam,” tia zan thla eng hnuaia an zai rual thap thap thin te kha Chhirdem brigde i zawh lai te chuan i hre chhuak mai thei e. he Chhirdem luiah hian Chhura leh a pi (A nupui a nu) in Chakai an khawrh dun a, Chhura chuan a pi chu a it ta tlat mai hi a ni awm a. Chakai a incheh der tir ta a. A pi hnenah chuan Chakai cheh dam nan huai va be turin a tir a. Chutia a pi-in luimawng lungpui ti rek ruk hmuna huai a zuk biak chuan Chhura khan a pi kha khawmual atangin a lehkhalh a, a pi kha lungpui phen atangin a lo chhang dum dum thin a. A pi a let leh chhung khan khawmual ah bawk lo lehkhalhin, a Chakai kaw zen ngai bawk kha a lo zen leh ngur thin a ni. He laiah hian lui hi kual deuhin a luang a, inlehpelh nuam fahran turin kawn te rawh te a awm bawk a. Tun thlengin he kawn hi “Chhura pi kawn’ an la ti. Tin, Phullen leh Changzawl innkar, Chhirdem luiah hian kurung thuk zet mai, ‘Chhura pi kurung’ a awm bawk.

Thli chhe tleh kuma piang, a piansual avanga zoram tluana mi riangvai, Thangteeka hriatrengna lungphun hlui tawh tak, Thangteeka lungdawh kan tih fo thin chuan YMA ram bul, Serzawl kawnah a lo hmuak dawn che a ni. He lungdawh hi Phullen YLA te’n a thih hnua an dawhsak a ni. Khawhluia awm lai chuan Biak in kawn thlen hma deuha awm a ni a. Hetian kawngthar reh a lo nih takah chuan hmun remchang takah sawn thlak a lo ni ta a ni. Thangteeka bawihsawma tuamhlawmtu, Phullen khawtlang tlawmngaihna hi thil chhinchhiah tlak tak a ni. Thangteeka’n Phullen khuaah ngei thih a thlang a, khaw hla tak atanga a taksa chaklo tak zawn chhoh a nih a, a duhna ang taka Phullena a ruang phum a nihna hian he khawtlang mize thatna ropui tak chu hmuh theihin a tarlang niin kan hria. Kan chian lehzual nan a chanchin tlemte lo tarlang ila. A thatlai hun pawhin kal pangngaiin a kal thei lova, a tlan petek tawng tawng thin. A sawi hriat a har em em avangin enge a sawi tih hi inrinsiak laih laih a ngai a. Chhung leh khat nei lo ‘Van laia tla’ nimahse, a sakhaw mi em em a. Inkhawmna In-ah Pulpit hnung thutthlentgsei hi a seat a ni. Khawtlangin a In tur an sa a, chutah chuan chaw an inpek chhawk thin.

Hmankhawsang ata tawh Phullen leh a chhehvelah hian thil danglam leh chhinchhiah tlak tak tak a tam mai. Phullen khuaah i lokal a nih chuan hengte hi a hmunah i tlawh ngei theilo a nih pawhin an chanchin tal chu hriatchian tum ang che. Rim takin kumpui lingletin hna kan thawk a, tlai tak takah kan haw a. Rilru pawh hahchawl hman lo leka kan awm hi kan hriselna pawhin a tuar thei. Hmangaihtu nei lo, mal riauva inngaihnate, rilru hah, helhkam nei theuha i inhriatna te a chhawk zang hawk thei lo a nih pawhin eng emaw zat chu a kiang ngei ang.

1. Sahlam (Milu khaina Thing):

Hei hi Phullen Vengthar dai bul lawk, Govt Middle School kalkawnga awm a ni a. he thingah hian hmanlai Pasaltha (Vangte awmlai) ten an milu lak an khai tlar bung thin a. naupang tuichawihote hian an tuium khirh chhunga a lung a tlak hlau hian a hnuai zawnah chuan an tlan chan chan thin. He thingkung hi a tar tawh hle a, a damlai ngeia hmuh ve hi thil hu tak a ni.

2. Siakzapauva Hmun :

Mawmrang tlang pangah hian hmun zawl rem deuh mai hi a awm a, chu hmun chu kham chhengchhe tak tak chuan a hualchhuak vek a. Chulai hmun thleng tur chuan khan (kalkawng) pakhat chauh a awm a, a khan hrelo tan chuan luhchhuah mai mai theih a ni lo. Siakzapauva leh a hote chuan khaw lianlote din in chu lai hmun nuam leh ral laka him tak hmunah chuan an awm a. Luangpawn atangin faisain an chawm thin a. Hun engemaw chen chu chu lai hmunah chuan an awm ve a ni. An sulhnu eng eng emaw la hian tunhma kha chuan an kal fo thin a.Tunah chuan kawng a pawp tha tawh lo. Vawikhat chu Aizawl tlang atang hian Mawmrang tlanga meikhu ding chho nal nal an hmu a. A run turin an chho ta a. Siakzapaua hi a ralmuang tawk hle a ni ang. “Vana arsi tunge hawl thla thei ang,” a ti a. Mitdel pakhat hi kalkawng awmchhun leihlawn chu an lo ventir a. A tirhah chuan mitdel tih an hre si lova, kawr ral lehlamah a vei a vei a, Tuibur hi a hmuam leh hmuk thin a. Tihngaihna hre lovin engemaw chen chu an awm a. An han belhchian takah chuan a chet zia atang khan mitdel tih an hre ta a. Rawkuai an vilhvalak a, a nghawngah an va phih awk a, kawrah an phih tla ta daih a, an luhchhuak ta a ni.

3. Khampuirang leh Sahmula tual:

Mawmrang tlang tlak lampang hi kham leh puk chhawrdawh chhengchhe tak a ni a. hei hian Phullen chu chhuah lamah bangang maiin a hung a. he kham lai takah hian Puk lian tak Toka (Playing cards - Sap hoin Hearts an tih- bs) pianhmang ang deuh hi a awm a. Chu chu ‘Khampui rang’ an ti a. ralkhat atang chuan a rang ruai mai a ni. Mawmrang kham hian Phullen hi a ep that em avangin ape ut mai a. heng pukah hian Bak, Kham khuai leh Sathar te an cheng a, mahse lak emaw man emaw hleih theih an ni lo. He tlang chhipah hian Ramhuai Lal Sahmula tualte, kham sang em em mai, tuma dah (dak) ngam lohna Saidah khamte a awm a. Youth Club leh Adventure Club-te tan chuan he tlang hi short course han neih lawk nan chuan duhthusam a ni. He tlang lawnchhuah harsatzia leh Siakzapaua hmun luhchhuah harzia hi a takin rawn chian ve teh. I hle a nih loh chuan nikhatah i tum chin i thleng kher lovang. A sang lai tak zawnah phei chuan lawn tlak tumlo ting la, i sa himna tur a nih ka ring.

4. Thanglaia Lung kawh :

Phullen khaw chhim lam Km. 8 vel leka hlaah hmanlai michak hmingthang ni ve tham ngei tur “Thanglaia” ‘Lungkawh’ an tih huai huai chu a awm a. Tun thlengin hmuh turin a la awm a ni. Thanglaia hian he lung hi a kawhna lamah a kawhfung a titliak hlauh mai a. Tichuan helai hmunah hian a hnutchhiah ta mai niin an sawi. He Lung hming chawi hian Phullen South pawh hi ‘Thanglailung’ tih a ni reng thin. Hman deuh kha chuan ‘Thanglaia hniak’ pawh hmuh tur a awm nual thin a. Lungchang tha takah pheikhawk No.(size no.) 8-9 vel size ke thla lang kalh a awm thin. hetiangkhawpa pa chak chuan lungah te hian a hniak khuar dawk dawk thei a ni ngei ang.

5. Zokhaw Sikul hmasa ber awmna a ni.:

Phullen khaw hmunah hian hmanlaiin khandaih khua a awm thin a. Phullen khua a nih hnu pawhin veng hming pakhatah hman zui zel a ni a. He khandaih ah hian kum 1903 khan Sikul (School) din a ni a. An zirtirtu chu Pu Hranga a ni.

6. Tihduhdahna leh Harhna thlenna hmun a ni:

Lal Vanphunga lal laiin Phullenah hian Kristian hmasate nekchapna a nasa em em a. ruah sur ur bur zante hi Kristiante an hnawhchhuah duh hun a ni thin.heti chung hian mi thenkhat rinawm tak tak an pung zel thova.

Tumkhat chu Tuivai Sangha an Tlangvuak tumin Kristiante chungah hrahna a lo thleng thut mai a. Sangha dap ve nachang pawh hre lo lekin an lam an lam t mai hi a ni awm a. Kristian ni ve lo ho chuan an haw em em mai a. An Sangha man sate pawh chu an pe ve phal ta lova. Amaherawhchu, thilmak tak mai a lo thleng a, Kristianho-te’n an lam zawh a, Sangha an han dap ve meuh chuan Sangha tha pui pui mai hi an man an man ta mai a. Kristian lo hote chuan an awt leh si a, infin leh an rawt ta ringawt mai a. Tichuan anzavai chuan an insem tlang leh ta a. Kristianho-te chu an haw kawngah te chuan an tawngtai a. Bangla lui kama an tawngtai tum phei chuan Belzebula hmingte pawh an lam ri nuk nuk hi hi a ni awm e! In an han thlen hnua zirtirtu Hranga an han zawhchian atangin Setana hming pakhat a ni tih an hre chauh a ni.

7. Thirhlum :

Thirhlum hi Phullen khaw hmar lam, Zawngin khaw panna kawng hrul mai, Phullen atanga hla lo tea awm a ni a. Tun hma chuan hetah hian khaw ropui tak mai Vanphunga’n a lo din tawh a. He Thirhlum khuaah hian tumkhat chu an chai a, an hlimin nula leh tlangvalte chuan nuam an ti hle mai a. He khuaah hian tlangval hmelchhe zet mai, Saichawnkhupa an tih chu a awm ve a. Nula chai pui tur a sawm apiang mai chuan a hmelchhiat em avang chuan lam puiah anduh thei ngang si lo va. Amah hnarna atan an thir tawn lai chu an hlan zel mai a. Beidawng lovin nula dang a sawm zel a. Mahse, tumah rengin an duh si lo. Tichuan nulate’n an hnarna thir chu a so khawm a, thir mum lianpui maiah a hlum ta luau mai hi a ni awm e. Heta tang hian Thirhlum an lo tih phah ta a ni.

Saichawnkhupa chu a hmekchhiat em avang chuan a nuin a manganui a. Nupui hmu zo dawna a hriatloh avangin taima taka hna thawk turin a fuih thin a. A faisa-a chawm tur chuan hmuhsak ve mai a inring a ni. Tichuan Saichawnkhupa chuan Tuivawl ralah lo neiin a riak ta char char mai a. A diar khimah te chuan ‘Vailenhlo’ a tiak that thei e, an ti hial a ni. tichuan buh pawh a ngah ta em em mai a. A khuain an phurhsak ta huau huau mai a. An phurh zawh sen tak loh avangin chulai ram hmingah chuan ‘Buhban’ an ti ta a. A khua in an eipui chung pawh chuan nupui chu a la hmu zo ta chuang lo a ni. Tunah Buhban khua lo ni ta pawh hi Saichawnkhupa buh phurh ban hmingchawia phuah a ni.

8. Pakawha:

Pakawha hi Mizo chak hmingthangte zingah a hming lang lo mahse, a hunlai rau rauvah chuan hlothlawh chak leh buh tuh chak a sawi a ni. Hlo thlawh leh Buh tuh hi nuam a ti em em mai thin a. Kaichhana a feh dawn te hian a chak tawh lutuk i a hma zan hi chuan a mu thei tawh mang thin lo. Vawikhat pawh lawm lova an Buh tuh tumin an chaw fak chu a Tuthlawhin fang a pu lo tih a hre chauh hi a ni awm e. An han zawn nak chuan an zawn tanna lai maiah khan a lo tla reng chu nii, chawhma zak mai chu a ha lawngin a lo tuh char char mai a ni.

Tumkhat chu Kepran khuaah sawn amah ang maia hlo thlawh chak a awm tih mi sawi a hria a. A va zin phah hial a. A beisei ang ngeiin an feh dun ta a. An han bung dun mai chu.., “Thingtuluang alo awmte hian Cheraw kan ang zauh zauh hi kan ni mai a, Mau hnuh te hi kan han hmer rual hian an phawk awn awn mai a, a huam ngei mai,” a ti.

Pakawha hi a chak mai bakah Burkhawni pa te ang mai a pa tuarchhel a sawi a tling a ni. A meizial tankai turte hian meiling hi a kut ngatin a la a, muangchangin a tankai thin. A anhnah thlak turte hian bel mawngphah tur hi a tuiso ah a kut leh lama nempil pah hian a thlak deuh kher thin an ti. Tumkhat pawh Pawlbuka an meipui chheh chungah thil an chhuang a; a nauvin a’n suan tur chu a lo sa viau mai si a. A suan theilo chuan, “Tu fa mahin va suan suh,” a ti hi a ni awm a. Chutah Pakawha chuan, “En ta che hei, i pa fa-in ka’n suan hi,” tih pahin muangchangin meipui chunga mi chu a suan ta a ni, an ti. Chuti chung chuan a kut chu a durh chuang reng reng lo. Thil sa a tawrh theih ang bawk hian vawt tuar pawh a thei hle bawk. Thlasi vanglai taka Tuivawl kama an Lovat riak pawh zantin tuiah chengin tuikhuang a beng pam pam peih reng a ni, an ti. Tunah Pakawha hi a dam tawh lova. A tu leh fate erawhchu Phullen South-ah an la awm nual hlawm a ni.

Heng bakah hian Lal Awksarala Thlan te, Chalthanga Puk (Luangpawn ramah)te, Vanhnuaithata Lungdawh, etc en tur a tam mai. A mal te te chuan kan sawi vek senglo a ni ber e.

Amah Historian ropui Carlyl-a thukhawchangin, hetiang History-te chu thu hawmhne chuang thu hawmhne dang chhehkhawm hi ani mai a. A kual a kual a, tawpin tai a nei lo. Hun kal tawh, hmanlai thil, engtik kum leh niah nge tih pawh hriat mumal lohah kan in hambuai rei lutuk dawn e. Khawnge, thangthar mila kan inher rem ve zel loh chuan ‘Thing’ nih kan hlawh a, ka duh bik lo.

Phuah chawp Kohhran leh Kohhran tesep hian Phullen-ah hmun a chang ve lo. Presbyterian Kohhran leh Salvation Army nghet takin a ding a. Presbyterian Kohhran phei chu Biak In pahnih neiin Pastor thuthmun a ni. Forest department-ten thingtlanga YMA branch-te hman tangkai nachang an hria hi Phullen hian kan chhawr ber awm e. A chhan chu - Phullen khawdai ram ngaw chhah pui hi Phullen YMA Social Forestry area a ni a, ran tlat tir pawh phal a ni lo. YMA berin hetia daifem thing leh mau a humhalh tlat avagn hian khawchhung boruak (temperature) pawh a vawngdai a ni.

Phullen khawtlang i lo chuang chhuak ta a, he khawtlang nunphung hi chik takinzir ang che. Mahse ni 2/1 lekah chuan i hre mai lovang. Ti thawr thawr leh khawlaia au thler duai duai an awm lova. I lo thlen hlima lo pak huam tur che pawh an awm lo mai thei. Khawtin hian zia kan nei vek a, Phullen khaw mizia hi a bel chiang te’n an fak ve fo thin.

I thlen tirh chuannula, nula ho te pawh hi an va chut (hawiharhlo - bs) hmel e, i ti mai thei. tin, tlangval ho pawh hi khawpui nun hlat viauin i ngai mai thei bawk. I thlirna mit a zir zir a ni mai ang chu. A ni khawp mai, kamnampui(Zu inpui - bs) tur leh in fix(drug hmanga in chiu/injection - bs) puitur chu an vang viau ang a, a damdawi leh hmanrua pawh nangmah i intum a nih ngawt loh chuan i hmu zo kher lovang. Chutiang ruihhlo leh kamnampui tur chu lo hmu pawh ni teh reng la, khawlaiah i rui chezia naupangin an hmuh chuan ennawm thlirin an thlir che ang a, reilo te ah J.P.C (Joint Action Committee) in an rek nawk ang che. Khawlaiah an chaih loh che chuan vannei tawpkhawkah inngai rawh. hetiang hian mi tam tak an lo zilhhau tawh a, khawtlang zilh i tawk ve a ni mai. Court-ah defamation case file mahla, khawtlang tangrual hi hneh an har thin. Aizawl-ah pawh Phullen khawchhuak In 300 chuang zet, he khawtlangin manganna a tawh pawha heta hi ka awm e, ti thei thah. Gazetted Officer pawh dawrzawn khata leng lo an awm.

Ruihhlo umbo hna thawk hian kum 10 kal ta daih tawhah khan a khawnawt tak meuhin kan lo bei tawh a. Khawtlang dan pawisalova tiluite pawh zilh hau an tawh meuh chuan he khawchhungah hian an leng ve lo tih an inhria a. Anmahni an insaseng lawng lawng zel mai. He beihui thlakna atang hian zu ngawl a lo vei tak tak theih loh a nih ka rinna chu, khatih laia zu heh lutuk, biang leh dul puar teuh tawh, tawk hlur hote kha in tur a awm loh na na na chuan an fai ve kulh mai a. Ram lamah hna an thawk a, an nghei thei em em mai a ni. Tun thleng hian Sorkar hnathawk zu ngawl vei, nghei duh si te chuan insiamthatnan awm an chak em em a. Chutiang behchhana rawn awm tha chhuak ta hi sawi tur an awm nual. Chutiang bawkin naupang School kal rual, ruihhlo tih chingte pawh an nu leh pa ten an rawn dah a, mi ang pangngaiah an chhuak leh thin.

Awle, a tawp berah chuan, Phullen tlangah hian lo chuang chhuak ve la, khaw tereuhte ah pawh zawn peih chuan in tur a awm zel an tih hi a dik lohzia i hmu ang. Mawmrang kham chhawrdawh rang ruai maite hi a hmunah han thlir ve teh. Enhnaihna (binocular) a thlir phei chuan khamkhuai vir noh noh leh a thlar Thlangra tia tia uai dur dur te a langchiang teh a nia!. YMA Park, Far hmun thelh nuam em em te, Lal ropui, Awksarala thlan hlui tawh tak, uluk em em a zut mam pual mai te, hmelchhe hmingthang Saichawnkhupa tuallenna ‘Thirhlum’ ram te, Zoram tluana mi riangvai “Thangteeka Memorial Stone” Phullen YLA te’n an phunsak te bakah, tarkun khupbiha la dama lo nghak fan fan tu che ‘Sahlam Thing’, hmanlaia Mi Lu an khaina te hi rawn fang ve la. Mitthi kan va hlep em! i tih loh vek pawhin dam man awm i ti ve ngawt ang!.Engtiha nge kan damlai nite hi kan chhiar tawp dawn tu’n kan hre si lo.#

(He thuziak hi Pu Lalduhawma leh Pu Lalthangmawia te ziah, Phullen Dry Village Celebration Committee Phullen, in Dry Village 10th Anniversary, 1987-1997 lawmnana atana a lehkhabu siam HARHFIM atanga lak a ni a. A ziaktu phalnain a chhung thu thenkhat diktawklo lai te siamthat a ni. bs)