PU C LALBIAKLIANA MPS (Rtd) - Chhunzawmna - No 1
(Phullen khaw pa MPS ni thei hmasa
ber chanchin tlem)
-----Chhunzawmna----- No 1
Pu C. Lalbiakliana (Pu Biaka)
chanchin hi, sawi tur tam tak a awm a, mahse a then then chauh, chu pawh ka
hriat dan ang angin kan sawi ang a, Phullen Group a dah tur a ziak mai ka nia,
dik lo palh pawh a awm mai thei, a dik zawk kan inhrilh zel dawn nia.
Continue No 1 ah hian, finkhur thu
ah, hming thenkhat - Misual leh a tul ni a hriatte chu, hming dik hmang lovin,
hming lem dah a ni. Tin Pu Biaka tih hian, Phullen pa lar Pu Biaka dang an awm
vangin, Pu C Lalbiakliana hi Pu Biakliana ti zelin dah a ni - Buata Bawitlung
……..
Pu
Thanga fapa Vanlala, khatih laia Mizoram a pa te inchaichak Champion chuan,
tuna Helipad hnuai kawng, Thuampui, Aizawl ah hian Vai (Keralian) pakhat chu, a
cheng zanga (500) chhuhsak duh vangin a hrawkah zaiin a that a. A che rawva
bawka, a chanchin a thang hat mai a. Chu tualthattu chu Police ten an man ta a. Khatih
lai khan, kan khaw pa Pu C. Lalbiakliana hi Bawngkawn ah OC in a awm mek a. ASI
niin Phullen khaw mi zingah Police officer ni hmasa ber leh awmchhun a la ni a.
Khatih
lai khan case pawimawh chin chu SI chin chauhin an khawih thei a. ASI te chu,
non cog (cognizable officer an ti thin) tih an ni a, Case tenau (Petty case) te
an khawih ve thin a. Hna an zawh hnuah SP in a case diary te a enfiah vek hnuah
leh OC te a sawipui hnuah, an hnuhma a fel viau chuan, “Investigating power pek tlak a ni e, case tenau
chu amahin a kalpui ang a, charge sheet emaw a thehlut thei ang” an ti a.
Chutianga thuneihna an pekte chauhin Case tenau chu an pumhmawm thei a ni.
Keralian
pa thah chungchanga Case latu kha Aizawl chhim lam khua (khaw hming hi thup
hrih ang) Pu Siama (Hming hi thlak a ni)
a, Kanan a awm a ni a. Pre-step’ chauh a ni a. Misual Vanlala (Hming hi
tihdanglam) hi a pian phu tawka chak
tak, inchai chak a ni a, Pu Biakliana pawh hian a hmel a hrechiang viau a. Pu
Biakliana hi ASI chauh a la ni na a, Interrogation leh Case diary vel pawh a
taka buaipui vek tu a ni a.
Chu
misual chuan, ka dam lo a tih vangin Damdawiin ah an hruai a, chuta tang chuan
a tlanchhuak ta hlauh mai a. Amah vengtu Guard ho zawng chu an suspend vek a.
Rambuai lai a ni a, vai ho an lal bawk a, Guard ho ban hlen tak pawh an awm
nual a ni.
Police
hovin nasa takin an zawng zui a, Pu Lawma, Pu Chhuanvawra te ho chuan police
sawm rual hruaiin, silai nen Motor a kalin Tuirial Airfield bulah an hual ta a.
Misual an hualna hi Phullen pa Pu Robula thlam bul lawk a ni a. An zuk hmu ngei
a, mahse an hlawhchham ta hlauh a.
Khatih
laia Aizawl a an OC chu vai, Pu Tiwari a
ni a, Second OC chu Pu RM Singh a ni a, Town Inspector chu Pu Gogoi a ni bawk
a. An hotute chu vai deuh hlir an ni a, an lal thei hle a ni awm e.
Chutia
Police sawm rual, silai nena an hlawhchham hnu chuan, Pu Biakliana ASI chuan
zuk zawn ve a tum ta a. Mahse an hotute
chuan, “kal lo ang, in zuk ti ralti mai mai” an lo ti tlat a. Mahse Pu
Biakliana chuan, tanhmun khawhin, “naktukah zuk zawng rawh u in ti leh tho awm
si a, hla deuh a lo kal hman tawh dawn a sin, Constable pakhat ka duh ber ka
hruai anga, ka kal dawn” a ti lui a. Sipai lal te chuan, “mai mai a, Chemte sei
deuh a pai a nia” an ti a. Pu Biaka ngaihdan chu a ni vak lo va, “Chemte a neih
leh neih loh ka ngaihtuah lo, he misual hi a nungchung ngeiin ka rawn hawn ang,
phal lo mah ula, ka kal dawn tho tho” a ti ve ta mai a.
An
hotute pawhin tihngaihna vak an hre bik lo. Misual kha an man leh loh chuan
anmahni tan pawh a pawi thei tih an hre
ve tho a. Tichuan Pu Biakliana chuan constable A.Thanchuanga, Assam
Regiment pawh lo tang zawk tawh chu hruaiin tualthattu chu zawngin an chhuak ta
a. Tualthattu Thlalak chu an pai a, police uniform ha lovin an chhuak a, Truck
phar dingin Aizawl atanga Tuirial thleng an chuang a.
Tuirial
kama Phullen khawchhuak Pu Robula thlamah chuan an zuk lut a. Chutihlai chuan,
Buh thar rang chu a hmawr a hmin tan tawh a.
Pu Robula chu hna a lo thawk daih a, a tupa Vanlalliana, Thlama lo awm
hnenah chuan eng eng emaw an zawt a. Zingkar ah Police ho misual zawnga an lo
kal thu te leh an hlawhchham tak thute a lo hrilh a. Tin, Misual pawh chu an
Thlamah a lo kal thute, kawr tial lam deuh a hak thu te leh an Balhla te pawh a
ei thu te a lo hrilh a. Police hovin an hual lai chuan kawngsirah a inbual a,
Police hovin an hriat loh thu misual in a sawi te chu a lo hrilh bakah a kal
lehna lam Pu Buangthanga thlam lam a pan thu te a lo hrilh a.
Pu
Biakliana chuan Chemte a pai a, a nau hruai Pu A.Thanchuanga Constable chuan
Ipte ah hruizen tawi a ak a, Tai tiang a hawl bawk a. Chutiang hmanrua nen
chauh chuan mi panngai incheiin Tualthattu Misual awmna ni a an rin Pu
Buangthanga thlam, Tuirial kawngpui chhak lam chu an pan ta a. Huan mawng Thirhling nei (barbed wire) kaih
bul atang chuan Thlam chu a lang thei a. Chulaiah chuan chenghnih note thar
deuh in thlep, a kara chengkhat note awm chu an chhar a. Pu Biakliana chuan in
ti puithiam chawp fiamthuin, a nau hruai hnenah chuan “Cheng 2 hi keini pahnih
entirna, cheng khat hi kan mi zawn hi; chuan kan man dawn tihna a nih hi” a ti
fiam leh rih a ni awm a.
Huan
mawng atanga thlam an pan chu, Thlam atang chuan Misual chuan a lo hmu hmasa a.
Thlam hnuaiah vai hnathawk a awm a, thlam atanga hla vak lovah vai pakhat dang
chuan Thing a ek mek bawk a. Pu Biakliana chuan vaipa hnenah chuan tute nge
Thlamah awm tih a zawh chuan, “Ka pu pakhat a awm” a lo ti a. Luhka a lawn lai
chuan an mi zawn chu Tlangbân dawmin, lehlam hawiin a lo ding a. Lehlam hawi
mahse, a sam vel atangin an mi zawn a ni tih chu a hrechiang thei a.
Pu
Biakliana chuan a nau hruai chu hnuai lamah chhuk turin a mit hmang chuan a
hrilh a. An mi man tum hi pa chak ve tak, inchai chak a nih bakah, Chemte sei a
pai reng nia an sawi avangin, fimkhur a ngai hle a. Mahse muangchan chi a ni si
lo. Man ve ting a, hneh leh loh palh chuan pawi thui tak thleng thei a ni bawk
si. Hotute phal zân loh karah, a nungchung ngeia hawn intiama fehchhuak an ni
bawk si. An dinhmun a khirh ve viau a ni.
Misual
hian a lo rinhlelh chuan a tlan chhe hman dawn si, Pu Biaka chuan pen hnih,
thum vel a pen lut tih chuan, “kan Buh chu a lo va hmin teuh tawh em?” tiin a
dâk chhuak leh a. Buh thlir tum a, hawi vel tur ang taka awmin Tlangban bula
misual ding lai chu a kuah ta thut a. Vaipa hnenah chuan dawmpui turin a hrilh
nghal a, Misual pa chuan “pui hlek suh” a lo ti ve bawk a. Misual chu thih tha
nen a tang a, Pu Biakliana lah, an pu te hnena a thu tiam hlen ngei tumin a
tang bawk a.
A
nau hruai Constable chu Thlamah rawn lawn lut ve nghalin Pu Biakliana chu a
rawn pui a. A sam hreuah man chungin Luhka hniam lai atang chuan Lei ah an hnûk
thla ta a.
To
be continue….
Comments
Post a Comment