KAN KHAW PA PU C LALBIAKLIANA MPS (Rtd) CHANCHIN TLEM

(Phullen khaw pa MPS ni thei hmasa ber chanchin tlem)

Pu C. Lalbiakliana (Pu Biaka) chanchin hi, sawi tur tam tak a awm a, mahse a then then chauh, chu pawh ka hriat dan ang angin kan sawi ang a, Phullen Group a dah tur a ziak mai ka nia, dik lo palh pawh a awm mai thei, a dik zawk kan inhrilh zel dawn nia. - Buata

Kum 1973 July thla khan Phullen pa Pu C. Lalbiakliana te, Pu Lamlianthanga te, Pu Dawnga te, Pu Nuntluanga te chu Tuivai kamah ramriakin an awm a. Chutihlai chuan Pu Khawnghinga lo kal chuan, “Vid-a pa, I hna dil kha an kal tawh a nia” a rawn ti a. Police officer lak tharte kha July 13, 1973 khan Aizawl atangin Training turin an kal chhuak a lo ni a.

Chutih lai chuan Pu Biaka chu a dam lo va, a ek a hang a, a dam chhuah loh mai pawh an hlau deuh hial a ni awm e. Tichuan Luhai, dam lo chung chuan Nuntluanga Police Constable hna a dil mek nen chuan Aizawl pan an tum ta a. Pu Suakkhuma chuan, “Ma-a pa, I thleng zo meuh ang maw” a tih hial khawpin a dam lo chau a. Tichuan ni July ni 15 chuan ke in an kal ta a. A hma pawhin Result a chhuah tawh ringin, Rizai nen in ak bawr luah chungin Aizawl hi an lo kal thlawn fo tawh a.

Hemi tum hian Nuntluanga pa Pu Paliana chuan a kalpui a, an Chawfun leh thawmhnaw a ah sak a. Keifang atangin mi motor ah Aizawl thleng an bet ve ta hlauh a. Pu Suakhnuna leh Pu Chalhnuna ten Sabji Bazar bulah an lo hmu chu, an lo khawngaih hle a, “Tiang chung chung chuan ti nge in lo kal duh, a kal turte chu an liam vek tawh a lawm,” an lo ti a. A va beidawn thlak duh dawn tak em!

A tukah Pu Biaka chu office kal pahin Damdawiinah a inentir hmasa a. Damdawite a an lo chiu hnuah SP office ah a kal ta a. Pu Puia, direct a ASI a lut ve tur chu a lo awm a. Pu Biaka lehkha tur, ASI a lut tura kohna, Dak a thawn an lo tum mek chu a lo pe a. Tichuan ni 24th July, 1973-ah Pu C. Lalbiakliana (Pu Biaka) chuan Joining Report a pe ta a, Arsi pakhat a bel tan ve ta a.

Pu C. Lalbiakliana chu Mizoram UT Sorkar hnuaia Direct Asst Sub Inspector (ASI) lut hmasa ber (First Batch) mi 44 zinga pakhat a ni a. Phullen atanga Police Officer tling hmasa ber a ni a, khata tang khan a pension thlengin Phullen khaw mi Police tang zinga lal ber a ni tluan chhuak ta a ni. An training zawhah Mamit te, Bawngkawn ah te leh hmun hrang hrangah a awm a. Rambuai lai a nih bawk avang leh vai ho an lal a nat em em lai a ni a, an hna a hautak thei hle a. Rambuai lai khan, Police officer ni mah se, Hnam sipai te lakah kut a thlak ve ngai lo a, chu chu MNF lam pawhin an hriat sak hle a ni.

Chutiang karah chuan Pu Biaka hian a hna tha taka thawkin, India President ropui tak Dr APJ Abdul Kalam kut atangin Police hnathawk tha chawimawina sang ‘Police Medal for Meritorious’ chu kum 2004 khan a dawng ta hial a ni. He chawimawina hi duhsak zawngte emaw, pute tlawn thiam vang emaw a dawn mai theih a ni lo. Police hotu lamin dawng tlak a ni e, ti mah se CID, SIB etc ten a chanchin, dawng tlak an nih leh nih loh chu an chhui fiah leh vek phawt a, chuta dawng tlak an tihte chauhin an dawn theih a ni.

Pu Biaka hi Police chawimawina sang, pawisa keng tel bawk ‘President Medal for Gallantry’ hmu tura ruahman a ni tawh bawk a. Citation an siam vek tawh chu tihthat a ngai a, chumi an thawn letna Motor chu MNF leh India sipai inkahna ah a riral ta hlauh mai a. An batch zinga Gallantry  Award dawng thei hmasa ber a nihna tur chu a thamral ta a ni.

Police hna thawktha zingah IGP Reward, pawisa Rs 150 chin chunglam kengtel pek thin a ni a. Pek zen zen pawh a ni chiah lo a ni awm e.  Chutiang panga hmu tling chuan an rank chungchiah ah Promotion an hmu thei a. IGP Reward chu Pu Biaka hian Rs 400 a dawng hman a. A dawngtu tur hi, Police hotuten ziaka uluk taka report an siam leh rawt ngai a ni a. An hotu lam ten buaipui hman se chuan, panga chu dawng ngei tura ngaih a ni awm e. Inspector chunglamah erawh Reward ni tawh lovin Appreciation an pe thin thung a. Police chu mi chuan Rewards chuti zat chu a dawng, ti a an thih ni te a an sawi thin ang, Reward tlanglawn te hi 77 vel zet a dawng hman nia……… to be continue.

Chhunzawm tur – tlangpui a hnuai ami hi a ni.

• Tualthattu, Police kut atanga tlan bo, Police sawm rual ten silai nen pawha an man theih loh, constable nen an um zui.
• Police a luh tirhin lamah, pawisa kal sual cheng tam tak a kutah a lo thleng a, tuman an hre lo chungin an hotute a pe let leh.
• Pu Denga tirh MNF sipai tha, civil mi anga inthuam Pistol pai nen an inhmachhawn.

Buata Bawihtlung

Dt 12.12.2017 Tuesday, 9:57 PM @ TKT