HNA ṬHA THAWK TURIN INTICHAK ANG U

Rev. M.S. Dawngliana

HNA ṬHA THAWK TURIN INTICHAK ANG U (Neh. 2:17,18)

(JPC Phullen Annual Gen. Body Meeting-a Rev. M.S. Dawngliana thusawi laktawi)

    Phullen khua hi Mizorama khaw tam tak zingah hian khaw namen lo tak a ni a, kum1905-a Mizorama khaw lian ber lo ni tawh, Primary school nghet awmna hmasa, van lam mita mi lian - martar nei hmasa ber, harhna thlen hmasakna khua, rawngbawltu ṭhahnem tak chhuahna, ringtute pawh hmingmawi tak 'Isua lam ṭang' tia an vuahna khua a ni a. Kan ropuina langsar tak chu Mizo Pastor martar, Rev.Chanchinmawia hova  June 2, 1987 aṭanga ZU TEL LO SOCIETY kan din ngam tlat mai hi a ni. Phullen khaw hming sawi rik ruala Mizote thinlunga chiang nghal chu 'DRY VILLAGE' tih hi a ni ta zel mai; hei lo hi chu Phullen hian chungchuanna dang kan nei bik lo khawp mai.

    Eng atan nge Pathian hian kum 30+ zet Dry Village min lo nihtir tih hi ka ngaihtuahnaah a lian khawp mai. A chhanna chu - tunlaia kan ram mamawh dik tak kan lo khel lawk a lo ni tih hi a ni. Kan ram hian Zu tel lo khawtlang, Zu tel lo chhungkua, Zu tel lo mihring kan mamawh takzet! Ruihtheihthilin kan ram min run mek a, zu vanga thi kan awm mawlh mawlh reng a, hetih lai tak hian kum 30 zet kan ram mamawh kan lo chan lawk tawh hi khaw danga mite zir tham leh entawn thama kan kalpui a hun tak meuh a ni.

    Kan ṭawp rukzia te hi ka hmu lo a ni lo, ka en lo mai zawk a ni. Chu ai chuan kan Dry Village nihna dinthar theitu leh kalpui zel duhtu mi ṭha tam tak hi ka en zawk a, ṭang tak tak ila chak tham kan ni tih a chiang reng mai. Phullen ah hian zu leh ruihtheihthil a pung viau a nih chuan rui duh mi an pung tihna a ni ngawt lo va, ngawi renga lo thlir liamtu mi ṭha kan tam tihna a ni ang. Mi ṭha ngawi reng i ni lo vang u.

    Kan hman lai ropuinain kan inawi lungawi mai dawn em ni? Kal hmasate huaisenzia, an hmalakna ropuizia kan sawi kan sawi ringawt mai dawn em ni? Tuna mite hian khawvel mit hmuhah hian eng Phullen khua nge kan entir zel dawn le? Dry village nia inchhal ve ringawt, ni tak tak si lo Phullen khua nge, entawn thama ruihhlo awm lohna Phullen khua; eng zawk nge kan pho chhuah dawn le?

    Kan hmelma Setana a ṭang hle a, fin kherek nen ruahmanna thar a siam a nih chuan keini pawhin kan siam tur a ni. Tlawm taka lo dawh vung vung ringawt hi ringtute kal kawng, Kross kawng hi a ni lo. Kross awmze dik tak chu chhe tawh siam ṭhatna, nun kawng thar ṭha sialna a ni zawk. Kan bawhbeh rengin min lehthal dawn dawn lai hian moral support leh ṭawngṭai chauha duh tawk mai lovin a tak takin i che teh ang u. Kan tlangvalte leh pa hote hi zu vanga hma taka an thih i phal lo vang u.

    Mizote hian dan ṭha chu kan nei mai, a kenkawh lamah kan nep tlat ṭhin. Tute emaw tihlawm loh kan hlauh vangin kan dawih fo. Kan zui Isua khan mi zawng zawng a tilawm bik lo; mi tam tak ṭhatna tur a nih dawn phawt chuan mi tam lo zawk (Pharisai, lehkhaziaktute leh puithiam lalte) nena inbiakchhiat kha pawi a ti vak lo! A epte lenzia a en lo va, thil ṭha chhuak tur a en zawk ṭhin.

    Hna ṭha thawk tak taktute hi puh chhiat an ni fo. Isua pawh ramhuai zawl, mi â, zawlnei der, helna chawkchhuaktuah an puh a. John Calvina pawh Geneva khawpui tawp tak mai a siamṭhat lai chuan a hming lemah 'Kaina' an vuah hial. Martin Luther-a phei chu a siamṭhat tum Kohhranin an hnawt chhuak hial a nih kha. Pang dam piala thawh theih loh hun a tam, tunge kan lamah ṭang tih ngaihtuah ila, zam hauh lovin he hna ṭha tak thawk tur hian kan kut i tichak zel ang u.



........................