YMA DAY VAWI 83-NA PHULLEN AH ROPUI TAKA LAWM A NI

Mizorama pawl lian leh ṭangkai ber a chhal ngam YMA DAY vawi 83-na chu YMA Branch hrang hrangin an lawm a. Phullen pawhin June ni 15 khan Phullen Community Hall ah ropui takin a lawm a. Pi Lalrinchhani Ralte BDO Phullen chu Khuallian (Chief Guest) a ni.

Ruahman lawk ang chuan, YMA Day 2018 hi zing, chhun leh zanah chi hrang hranga lawm tum a ni a. Zingkarah vantlang rawmgbawlna lam thil - Thlanmual sam leh Community Hall vel tihfai bakah infiamna hmun tur Field a Line te lo siam a, zan lamah Vantlang inkhawm ropui tak neih tum a ni a.

Mahse, khuain min bumro ta a, chhun lama Football hmuhnawm tak leh a kara zaithiam zai ngaihthlak leh Phullen Historical Society aṭanga Pumazai te leh Mizo hnam lam dangte entir tum pawh, a sukuk zo ta a. YMA hruaitute inpekna leh ṭhahnemngaihnain chhun a Field lama tih tur leh zan lama tihtur a ruahman tawhte chu, chhunah Community Hall-ah tih a ni ta zawk a.

He hun hi chhun ah ṭanin YMA Vice President Tv. Lalthangzikan felfai takin a kaihruai a. Nl Lalhungchhungi EM chuan hunserh a hmanga. Chief Guest bakah VCP Pu Lalhriatpuia te, Branch YMA President Pu J.Pachhunga te, Phullen Historical Society Secretary Pu Lalbuatsaiha te, Phullen & Thangkailung Welfare Chairman Pu Lalrammawia te, JPC Chairman Pu Lalrawngbawla te, P&T Welfare Sr Vice Chairman Pu C. Lalbiakliana te, P&T Welfare Vice Chairman Pu K.Lallawmthanga te hnen aṭangin Thusawi ngaihnawm leh ṭangkai tak tak ngaihthlak a ni a.

Chief Guest Pi Lalrinchhani Ralte chuan, YMA Day lawmna, Field lam inruahmanna chu khua in min bumro deuh mahse, Mizoram hmun dangte anga chhiatna leh vanduaina, thihna leh Leimin thawmte report kan la dawng ve lo chu kan khawtlang kan vanneih hle thu leh Pathian hnenah lawmthu kan sawi a ṭul thute a sawi a.

Tin, YMA chu pawl ropui tak, Pathianin Mizote tana min pek liau liau, hnam dangte neih ve loh pawl ṭangkai tak, khualzinte hip lut thei khawpa pawl ropui a nih thute. Chhiat han tawh changin YMA ropui zia a lo lang fiah ṭhin thute a sawi a. Chtihlaiin, hmun ṭhenkhatah YMA phena hleihluak deuh a che a, midangte kut lo thlak mai ang chi chu Phullen ah chuan thleng ve lo se, Mizote min hnem tu leh thlamuantu, min tuamdam ṭhintu YMA chu vul zel tura a duhsak thu a sawi a ni.

VCP Pu B.Lalhriatpuia chuan, YMA te, Welfare te, Phullen Historical Society te leh khawtlanga pawl hrang hmalaknate chu sawi sen a nih loh thute. Tun hnaia Historical Society ten Kohhran Pavalaite leh Nuvalaite nena an hmalak meknate chu ropui a tih thu leh hun a kal liam tam poh leh hlu zual tur a nih thute a sawi rualin, khawtlang mipuite pawhin lo hlutpui zel turin a sawm a.

Tin, VC ten mawhphurhna an lak hlima alo sawi tawh - “Vantlang inrelbawlna te, kan sawi chhuah ni lo, Sorkar aṭanga hmasawnna lo kal ve hrim hrim te leh theihtawp chhuaha kan nawrna vang liau liaua kan neih hmasawnna kawngahte min lo thlir dawn nia” tia a lo sawi tawh thu te. Tunah VC te term pawh a tawp ve ṭep tawh a, engnge an an a, khawtlang mipui ten engtin nge an ngaih a, engnge an dinhmun chiah tih chu, mahni inthlir thiam a harsa a. Khawtlang mipui ten an thlir thiam zawk tura a ngaih thu a sawi rualin, Phullen khawtlang tana VC hmalak mekna leh hma chhawp pawimawh tak takte a sawi a .

YMA Branch President Pu J Pachhunga chuan, YMA Day lawmna khuain min bumro avangin tumah vui lo turin a ngen a. Ṭan hun tura ruata mipui lam la inpeihlo chu sawi langin, YMA member te ṭan la turin a fuih a. Kan VC dinglai te suktlek chuan khawtlang pawl hrang hrangte ah rah ṭha a chhuah thute. YMA leh Mizo ten hnam feeling an lak nat zual sauh sauh tur thu te, tun anga kan awm chuan, nakin lawkah chuan hnam feeling chungchang hi tun anga sawi ngam a nih a rin loh thute, chutiang a thlen loh nan Foreigner, hnam dang reng reng khawi ngam lo turin kalkhawmte a chah a. Hetia hnamdang kan khawi hian, khawtlang anga hmalak a nih dawnin, lo khawngaih a, lo lainat tawk an awm thuai zel a, thil tih a harsat phah thute a sawi a.

Tun hnaiah Pu C Ramzaua ten an fapa anga an chhawr ṭhin leh awmpui, an ngainat leh mamawh em em Hnamdang tlangval chu, khawtlang thu awiha an haw tir chu fakawm a tiin, entawntlak a tih thu a sawi bawk a. Kum 20 chhunga hnamdang 50 an rawn inbenbel chuan, nakin lawkah hnam thil chu sawi ngam a nih loh tur thu a sawi a. Tin, thalai bakah naupang aṭanga puitling thlengin Nu leh pate thu zawm ang u. Kan nu leh pate hi Pathian malsawmna hnar an ni a, malsawmna kan dawn tam takte hi kan Nu leh pate mal a ni a. Nu leh pa thu zawm hi Bible min zirtir dan pawh a ni. Chuvang chuan YMA Day vawi 83-na a a  thuchah laimu chu "Nu leh Pa thu zawm"a nih thu a sawi.

Phullen & Thanglailung Welfare Chairman Pu Lalrammawia pawhin, tun hmaa Tuikhur pakhat tlanho a, dam leh tlang khatah, thih leh ruam khatah ti ṭhinte, Phullen leh Thanglailunga kan awm takah hian, unau hmel kan inhai ta deuh em ni? Kan nu leh pa, rual u te kha lo tho leh ta se, Phullen leh Thanglailung inkar a, kan rilru put hmang hi engangin nge an hmuh ang tih chu ngaihtuah tham a nih thu a sawi a. Hmalam hun thui zawk thlir chunga hma la in, lungrual takin Phullen welfare leh Thanglailung welfare chu a inchhun fin tak thu te a sawi a.

Phullen khawtlanga pawl hrang hrangte leh VC te hnathawh nasat zia hriat tur a awm fo ṭhin chu lawmawm a tih thute. Ruihhlo lamah leh sum leh pai lamahte, mi fel tak tak, duhamna leh mahni hmasialna nei lo a, midangte tana malsawmna thlen ṭhintu khawtlang hruaitu kan neite hian hmun danga awmte pawh a ti lawm em em a, Phullen a haw a tih chakawm zual thu te a sawi a. Tun hma chuan, khawi hmunah pawh, khualzinnaah a ni emaw, rambuai inkahna hmunah a ni emaw, ramchhuah nikhuaah emaw pawh nise Phullen khua chu a tlawmngai ber leh huaisen ber an ni ṭhin a, tunah hian engnge kan an zel tih chu tun amite kutah a innghah thu a sawi a.

Phullen chu, ruihhlo, zu leh drugs awm lohna, khaw nuam tak ni ṭhin kha, a ti ṭhuanawm zawnga awm lui tlatte kan lo awm a nih chuan, bansan a ṭul thute a sawi a. Lehkha zir sang lo mah ila, taimakna leh rinawmna nen chuan lehkhathiante tih theih loh tam tak pawh kan tih theih thute.  Amah ngei pawh pawl 3 chauh a ni chunga District huap pawl hruaitu lu leh Deptt lian taka pawl hruaitu lu a nih theih chuan, ṭhalai lehkhathiam zawkte chuan tih theih tam tak an nei a, chu tur chuan Taimakna leh Pathian ṭihna a ngaih thu a sawi a ni.

Tin, thusawitu dang, Welfare Sr Vice Chairman Pu C.Lalbiakliana te, Welfare Vice Chairman Pu K. Lallawmthanga te, JPC Chairman Pu Lalrawngbawla te leh Phullen Historical Society Secretary Pu Lalbuatsaiha te pawhin Phullen khawtlang tana thu ṭha tak tak an sawi a. Khawtlang hmasawnna tur te leh inlungrual kan mamawh thute, Dry village kan nihna ti ṭhuanawptute chu dimdawih loh a ṭul thute. Phullen leh Thanglailung welfare inzawmna pawh ui inmawngzawm ang lek ni lo a, thawhhona ṭha tak neih a ṭhat thute. Mahni khua hriat chian a, kan khaw chanchin leh kan khawtlanga thil thlengte chu, ṭhangtharte hriat chhawn ve atana vawn ṭhat ṭhin chu hmasawnna kawng khat a nih thute. Kan chheh vela pi leh pute sulhnu, leh tuna cheng mekte sulhnute pawh humhalh a, vawnṭhat a pawimawh thute ngaihthlak a ni a.

Thusawi kar lakah Aizawl aṭanga Zaithiam chah chhoh Pi KC Runremsangi te, Nl Mody Hmingsangzeli (TLL) te leh tualchhung zaithiam Nl Lalremruati te, Tv F. Lalbiaksanga te bakah Section aiawh zaithiam tak tak leh Live Music thiam tak ngaihthlak a ni a. Tin, Zonunpar Cultural Club ten zai leh lamin mipuite an awi dup dup bawk a. A tute pawh an thiam em em vek mai a. Mipui lam pawhin kutbeng leh lamin an lo zawm dual dual a, Dry village ah harhfim tak chungin, hlim leh lawm taka hun hmanho chu a nuamin a ropui ngei mai.

Hall chhung lam hun hman tawp lamah Phullen Historical Society (PHS) lam kaihhruainain Community Hall tual zawlah hun an hmang a. PHS Chairman Pu Vanṭhuampuian Puma zai lo chhuah dante, Phullen leh a chheh vel chu Puma zai lo lar ṭanna a nih thute ngaihnawm taka a sawi hnu ah PHS leh DDK ṭangkawp hmalakna Phullen Documentary Film a mi tur Puma zai leh Chaite lam hmuhnawm tak chu Kohhran Pavalai Pawlte leh Nuvalai ten an en tir a. Mipui mit leh beng a tlai tak zet tih a hriat.

YMA Day hun hman kaihruaitu YMA branch Vice President Tv Lalthangzikan a kaihruai thiam bawk a, khuain a bumro chungin YMA Day chu nilengin hlimawm leh ropui takin hman a ni a. He YMA Day vawi 83-na lawmnaah hian, tualchhung YMA member leh sawm bikte bakah, Phullen Historical Society hmalakna Documentary Film siamnaa tel tur mi ṭhahnem tak an kal khawm a. Aizawl aṭangin Phullen & Thanglailung Welfare hruaituten an telpui bawk a. Hun hlimawm tak hmangin tlaiah YMA Day lawmna ruai an kilho nghal a ni.

YMA Day ropui taka lawm a nih theihna tur hian YMA Branch hruaitu, O.B leh Executive Members ten theih tawp an chhuah a. VC te nen ṭangrualin ropui taka lawm a nih theih nan ngaihtuahna leh tha leh zung an seng a. Aizawl lama kan welfare hruaitu Pu Lalbiakdanga te, Lt Col Clement Lalhmingthanga te, Pu Lalrammawiate, Pu K.Lalhmachhuana te leh Pi Lalremliani te inphalna zarah Zaithiam, Lamthiam leh DDK lam te leh Welfare hruaitute an kal theih phah a, an inphalna a chhuanawm tak zet.

Tin, YMA hruaituten nu leh pa chan chang thiam takin, tualchhung mite bakah hmun dang danga awmte thlenga huap zo YMA Day lawmna hun an siam a. Phullen khawtlang inlungrual zia a lang chiang hle. YMA Day hi ruah surin tibuai deuh mahse ṭha taka hun hman a ni a, YMA Day lawmna ropui leh hlimawm, hriat zui reng tur zing ami a ni ngei ang.