PHULLEN AH AWARENESS CAMPAIGN ON SCRUB TYPHUS HLAWHTLING TAK NEIH A NI

Date: 4th Dec., 2018 (Thursday) 8:00 PM:













Zanin dar 6:30 PM khan Health Department leh khawtlang hruaitute huaihawtin Phullen Community Hall ah Rannung seh (Scrub Typhus) chungchanga in zirtirna “Awareness Campaign on Scrub Typhus” chu khawtlang huapin hlawh tling taka neih a ni.

He hun hi Pu B. Lalhriatpuia VCP Phullen chuan a kaihruai a. Dr Zoliankimi Ngente, Medical Officer Phullen chuan Health Deptt Aizawl atanga mithiam lo kalte inhmelhriattirna a nei a. Medical Team te hi Dr Pachuau Malsawma Nodal Officer, IDSP chuan hovin, amah bakah Pu Lalrotluanga Entomologist, NVBDCP te, Pu Lalchhanchhuaha, Projectionist te leh Dr Zoliankimi Ngente, Medical Officer, Phullen PHC te an ni.

Dr Pachuau Malsawma, Nodal Officer, IDSP chuan Power Point Presentation hmangin, a lem nen uluk takin Rannung seh (Scrub Typhus) chungchang hi mipuite a zirtir a. Hemi hnuah Pu Lalrotluanga Entomologist, NVBDCP pawhin Rannung seh (Scrub Typhus) chungchang sawi zauna leh zirtirna a pe leh bawk. Tin, Medical Team te hian, Awareness campaign an neih mai bakah, a mamawhte tan Test kid leh damdawi tam tak an ken sak bawk a nia

He Awareness Campaign ah hian tualchhunga NGO hrang hrang Committee members zawng zawng te, sorkar hnathawk zawng zawngte leh chhungtin aiawh mi pakhat theuh kal vek tura beisei leh hriattirna chhuah a nih angin, mipui thahnem tak an kal a. Kalkhawm mipuite hian mithiamte hnenah an hriat duh leh zawhna an neihte zawtin, mithiam ten an chhang zel a. Hlawk takin hun an hmang a ni.

Tun hnai Krismas vuakvetah Phullen khawtlang a dam lo, Damdawiin a Thisen endikte chuan Rannung seh natna an nei deuh zel a. Tin, Rannung seh natna vang hian Krismas hnuah mi pakhat thi a awm bawk a. Chutianga Rannung seh natna a hluar deuh ni a hriat avang chuan, Medical Officer Phullen leh Phullen khawtlang hruaitute ngenna angin Medical Team ten kalchilhin Awareness Campaign hi neih a ni ta a ni.

Hun tawp dawnah Pi H. Vanlalsawmi Treasurer, Village Council Phullen chuan lawmthu sawiin, Health Deptt leh Sorkarin Phullen khawtlang a ngaihsakna leh mipuite tan Awareness a huaihawt sak avanga lawmawm a tih thute, mipui thahnem tak an kaltheih avanga lawm thu te sawiin hun tih tawp a ni.


****************

Comments

Popular posts from this blog

PHULLEN DIARY 2020

MARTAR CHALBUANGA CHHANGTE - MIZO ZINGA KRISTIAN MARTAR HMASA BER