CHHIAT TAWK CHUNGCHANG TITI LEH LENGLAI THLAN LAIH

Kan hmuh leh kan hriat angin kumin 2017 kal lai mek chhung ringawt hian kan khua Phullen hian Lusun chhung kan nei ta nual mai. Chutih rual erawh chuan Phullen hian LENGLAI, a bikin thalai kum 20 atanga 40 inkar sun erawh kan nei tam lo hle a. Thihna hi kan thuneihna piah lam a ni a. Chutih lai karah, thalai thi kan awm mang lo thin te hi, vanduai chhungkua awm thin bawk mahse, a khaw pum anga chhut chuan kan vannei hle in a hriat.

Chutiang a nih mek lai chuan Ni 24.10.2017 (Thawhlehni) chhun Dar 12:30 pm khan Tv. V Lalrinhlua (Lalmama) Kum - 22 mi chuan vanduai thlak takin (Accident) avangin min boral san hlauh mai a. Khawtlang mipui min barakhaihin, mitin rilru a luah a, a hrilhhai thlak takzet a ni. A kalsan tak a chhungte kan lainatin kan tuarpui tak zet a. Lalpan thlamuanin awmpui zel se tih hi kan tawngtaina a ni.

THLAN LAIH
Kan khua Phullen hian tu Thlan mah hi pawt chhe tak leh uluk lo takin kan lai ngai lo a. Tu thlan pawh nise, thalai ten uluk takin, theih tawp chhuah chung leh duhsakna rilru pu chungin, a tha thei ang berin laih a ni thin.

Han sawi thui leh hret ila. Hmanlai Mizo pi leh pute pawh khan, mitthi te hi uluk takin an sawngbawl a. Mitthi chu lenglai a nih phei chuan an la urhsun em em a, zan khat tal tlaivarpui an tum hram țhin. Tin, thalai (lenglai) thlan chu thalai ten duhsak takin thuk takin an laih sak thin a. Thlan chu lung chang țha tak takin an hung kual vek thin a ni awm e. Thalai thlan laihnaah chuan tuman nuihza an siam ngai lova, bengchheng hauh lovin, ngui nghuaiin an lai thin a ni.  Chu mai a ni lo, a vuinaah pawh puan dum sinin nula leh tlangval te pawhin thlanmual thlengin an zui țhin.  Hman lai chuan Lu men zan hian fiamthu te an thawh thin a. Mahse thalai, lenglai lu men zanah erawh fiamthu thawh leh nuihza siam an awm ngai lo an ti hial thin. 

Tuna kan thlahliam tak, kan thalai pui, Phullen tlangval Tv. V Lalrinhlua (Lalmama) pawh hi Phullen thalai ten duhsak takin a thlan an lai a. Thalai ten kan tih awm reng a mawiin LENGLAI THLAN tiin theihtawp chhuahin a Thlan hi thuk tak leh uluk takin an laih sak a. A thuk zawng pawh 8ft leh a chanve aia thuk mah a laih a nih bakah, mawi tak leh mam thei ang berin laih a ni nghe nghe a, a lawmawm in a ropui tak zet.

Thalai ten hetianga mahni thalaipuite puala duhsakna hnuhnung an lantir thin hi a mawi ngawt mai. Kawng lehlamah chuan, hei hi  thalai thlanlai te tan chapo pui chi leh in chhuanna tur chi erawh a ni hauh lo ang a, sawilan a chakawm em a, kan tarlang tel ni se.  Heng hi thalai ten kan tih awm rengah kan ngaih fo a dik zawk awm e.


Han sawi ta zel ila. Zan lumen tlaivar ngai neih chang hian, a tuka thlanlai tura chhuak Nula leh Tlangval erawh, kan khaw mipui ngaihtuahin kan la thahnem tawk lo deuh thin niin a ngaih theih a. Vawiin a thlanlai zat hi mi 41 an ni a. Tlaivar tuk a nih vang pawh a ni mai thei a, tin KTP member a huhova Work Camp a zinchhuak awm vang pawh a ni thei bawk. Engpawhnise, tan kan lak lak leh deuh hret a, hma kan sawn zel erawh a ngai tih hi pawm thiam zel ila a that a rinawm.  Mihring chu hma sawn zel tur kan ni si a.

Duhthawh thilah kan han sawi thui ta viau a. A tak takah chuan, vawiina thlanlai thalai rual ten, kan thianpa Lalmama tana duhsakna thinlung pu a, uluk tak leh tha tak, thuk taka Thlan an laihsak kha a a ropuiin a mawi ngawt mai. Thihna hi kan thu a ni lova, mitinin englai pawha tawng thei reng kan ni vek si a. Hetianga chetdan mawi tak kan lan tir hi pi leh pu, rual u zawkte atanga kan chhawm a ni a, thangtharte thlenga kan hlan chhawn thiam zel a duhawm ngei mai.