YMA DAY 2017 ZANA PU J.PACHHUNGA, PRESIDENT YMA PHULLEN BRANCH THU SAWI

(Kan Hall chhung ri a khawk nasa a, hriat sual leh ziah sual ka nei palh mai thei, chutiang a awm chuan min lo hrethiam se – Buata Bawihtlung)

A hmasain YMA Day hmangtu zawng zawngte chibai ule.

Zaninah PWC hruaituten Aizawl atangin  YMA day min rawn hman pui thei a, a lawm awm hle.  Nikum lawk khan PWC te hian Assembly naah YMA hruaitute Pangpar min hlan a, a zahthlak ka ti hle a ni. PWC te hian mi harsate tanpuiin, damlo Aizawl lam pante leh chhiat tawkte theih tawpin an lo buaipui thin a, kan khawtlang tan theih tawp an chhuah a, kan tih tur tam tak hi PWC te hian min tih sak a. A thlamuan thlakin a lawmawm tak zet a ni.

Vawiin chhun lamah YMA day hmangtu thalai rual mi thahnem takin ruai kan theh a. Zaninah heti zat hi kan kal leh a. He programme hlawhtlinna tura lo kalte, a bik takin pavalai rualte chungah hian ka lawm a ni. Sawi tur tam tak ka nei a. Tumah mihrang kan awm lo bawk a, tim lovin ka sawi phawng phawng mai dawn a ni.

Thalaite hian inenfiahna tur kan ngah hle a. Sawm bikte pual thil tih, Pass lawm etc ahte kalna awm kan hriat a ngai. High School zirlaite leh Higher Secondary zirlaite pawh an ni an ti, middle school zirlaite pawh an ni awm e. Min sawm chuan kal mai tur a ni a, chhungkhat laina leh thianthate ah pawh kal tur. Mahse, ka lawm ve tho a lawm tih avang ngawt a, Ar nghal zuan luh ve ngawt thin hi, thalaiten kan tih tur a ni lo. Tun hnaiah hetiang hi kan awm leh tan ta lat mai a. A bik takin tleirawlho hi zirtir in ngai zual tain ka hria. Ngaihtuah chhun zawm ila, in kaldarh hunahte, in titihonaah te lo sawi chhunzawm ang che u. Zaninah nu leh pa te pawh kan awm a, hei hi kan inzirtir zui a ngai. Hemi chung chang hi na deuh hlekin ka sawi duh a ni. Kalna awmah chuan kal tur, mahse hisap kep lohnaah hi chuan zahtheih loh chhuah hi a tul lo. A bik takin Diakkawn area, kan dawrpui ve laiah hian zah theih chhuah a har mai thei a, hetiang kawngah hian, ei leh in siamna a nihin zahna chang hriat tluk a awm lo. Hei hi ngaihtuah zui atan ka rawn chhawp chhuak a ni.

Tin, tlawmngaihna chungchangah hian tlem sawi ka duh, kan sawi tam vek hman dawn lo a. Kan hriat angin hman zanah kan tlaivar a. Pavalai engemaw zat, mi tlawmngaite avangin mawi takin khaw dang ten min hmu a, a lawmawm khawp mai a. Amaherawh chu chutiang kawngah pawh tan kan lak deuh a ngai ta. Tunah hian YMA Branch in a ngaihtuah mek chu ‘Zingkara thlanlaih’ leh ‘Chaweikhama thlan laih’ hi a ni. Phullenah hian thalai mipa 300-400 vel kan awm a, Pavalai te leh pawnthuah khai chinte nen, hmun danga awm bo an awm chungin, mi 400 bawr vel kan awm a ni.  Chung zinga mi 35 te chuan thlan an lai a ni, a zahthlak khawp mai. Nulate pawh hian in zir a ngai. Tlaivar hi tuman kan ngeih a ni lo a, kei pawhin ka ngeih lo, mahse theih tawp kan chhuah a ngai. Zan hnih tlaivar hi thalaite tan engmah a ni lo, kan zuau vang mai mai a ni. Zingkara thlan lai mi 35 lek nih hi chu a nih dan tur a ni lo, chu chu tlangvalte ka chah duh a ni.

Khawhar in riah hi Aizawl leh hmun thenkhatah chuan, mitthi chhung ten a ngai lo ve an ti a, a awm ve em em tawh tho a ni. Aizawlah chuan hmun hrang hrang atangin an fuankhawm a, chhiat tawkte an awmin, thalai tam tak te riahna tur In lian tak neih loh phei chuan a rem lohna lai a awm ve a, chuvangin ‘riahpui in ngai em?’ tiin an in zawt thin a ni. Hei hi a tul tawh reng a ni. Mahse, thingtlangah chuan chutiang a la ni lo. Khawhar in riah hi tih tur a la ni tawp mai a ni. A hma a kan sawi tawh ang khan, tlangval heti zat awm si ah, hman ni khan khawhar in riak  mi 16  kan awm a ni ( ka sawi sual pal hem aw!). Mikhual kan awm lem lo bawk a, tha kan intih lai hian, heng kan thatlohna laite hi ka rawn tarlang duh a ni. A ni lo berah mi 30 tal chu kan riak  ngei ngei tur a ni. Mi 20 khawhar in riak kan nei a, kan lawm em em tawh mai a, tlangval ten ngaihtuah chiang rawh u.  Aizawl leh hmun thenkhat anga ‘riahpui in ngai em?’ tia inzawh ngai kan ni lo, riah tur a la ni tunah chuan. Paho thenkhatte phei chuan, kan riak ve mai dawn em ni? te an ti a ni. Hemi kawngah hian tlangval ten tan inlak a ngai hle mai. Hma kan sawn ve tawh na a, Aizawl ang kan la ni si lo va, riak turin kan la inrelbawl a ni tih ka sawi duh a ni.

Tin, nulate pawh, kan zuau mah mah em aw! Tlaivar avanga mitthi in a chet loh tur a ni chuang lo, kan tih hram hram a ngai a ni. Vuina a Thingpui sem tur pawh awm mang loh chang a awm thin, chuvangin nulate helaiah hian ka fuih duh che u a ni. Hei hi section wise a kalpui mai tur em ni ang aw, tih thlengin YMA hruaitute chuan ngaihtuahna an seng mek a ni.

Pu Rammawia PWC Chairman thu min chah kan sawi leh lawk ang a. Zanin hian zirlaite tam se kan duh khawp mai a. Hei, Pu Vala te pawh an awm a, kan Engineer, Tv C-a in hria a, Aizawl leh Mizoram pumah mi pawimawh ni phak te hi, a  fail a fail ve thin tho a ni. Tin, kan thianpa Lt Clemen Thanga national level sipai lal kan nei bawk. Hengte hi a tirah an hlawhtling nghal a ni bik lo, kan entawn a ngai. Tin, thalai lehkha zir sang lem lo pawh, an tum chuan Aizawl khawpuiah In leh lo tha tak tak nei pawh an awm a ni. Phullen khawchhuak ngei pawh hetiang mi hi an tam, kan Welfare hruaitute pawh an ni. Chuvangin tum neiin rawn khawsa teh u a, he thu hi khawngaih takin  min lo sawi sak teh a ti a, ka’n sawi a ni.

A dawt leh a ka sawi duh chu, ‘tum neiin’ tih lai kha a ni. Hna kan thawk lo thei lo a nih chuan, tlem a changkang deuh, leh rilru changkang deuh hlek kan put a ngaiin ka hria. In theih tawpin in zir ang a, lehkha in zir chhuak si lo a nih chuan, awmze nei deuh hlek a hna thawh hi tum ila a thain ka hria. Labour ringawt tur hi chuan inngaihtuah lo teh ang u. Kan nau chanchin kan sawi mai mai ang a, Hmangaihthara, Pu Hmingmawia fapa hi lehkha a zir sang lem lo a, mahse labour nih ngawt a tum lo a, Mistiri nih a tum tlat mai a ni. A tirah chuan labour in a tan a, mahse labour nih reng chu a tum reng reng lo. Aizawlah a awm a, Cement Mistiri nih chu a tum ang ngeiin a ni ta a, tunah chuan hna thawk turin an ko an ko lawr tawh a ni.

Chuvangin, thalaite hian hna kan thawk a, Lo kan nei a nih pawhin, a changkang zawk deuh, a hah dam deuh zawk leh hlawk zawk bawk si ngaihtuah ila, chutiang rilru pu chuan ngaihtuahna I seng ang u.

Ka lawm e.