YMA DAY 2017 PHULLEN BRANCH IN ROPUI TAKIN A LAWM

(YMA Day 2017 hman dan Reports pahin, comments tel zeuh zeuh a ni)

• Buata Bawihtlung

Kumin 2017 YMA Day hi YMA Phullen Branch Committee ten an lo ruahman lawk angin, Ni 15.06.2017 Thursday khan Phullen ah ropui taka lawm a ni. Hman dan tur pawh uluk taka duang lawkin, hetiang hian hman a ni:

1. Zingkar    - Hnatlang (Social Works)
2. Chhun    - Vantlang inkhawm
3. Zan – Vantlang inkhawm (Mizo thuam inbel zan)

Zingkar hnatlangah hian YMA members ten vantlang tana thil tha leh tangkai thawkin YMA Day lawmna bul an tan a.  Chawngbawla Section huam chhunga awm ten Khandaih Thlanmual an sam fai a, Taitesena Section a awmte leh Branch YMA Committee members ten YMA Ram an samfai bawk a, Vanapa Section a awm ten Phullen Vengthar Thlanmual an samfai bawk a ni. Khua a nuam lo hle chungin YMA members thahnem tak he hnatlangah hian an thawk chhuak a. Chawngbawla Section atangin mi 70 an hnatlang a, Taitesena Section atangin mi 95 an thawk chhuak a, Vanapa Section atangin mi 60 an thawk chhuak bawk a ni.

Tukthuan eikham atangin chawhma lam zawng chu intihhlimna leh huau huau lam, thil chi hrang hrang (Carnival) hmangin Diakkawnah hun hman leh a ni a. He Carnival-ah hian Ngun theh te, Motor ke chhunga Ball pet luhte, Kawi kahte, Prize Wheel leh thil dang dangte hmangin hun hman a ni.  Hei hi intihhlimna leh YMA sumtuakna inkawp a ni a, members te leh mipuite lawm a hlawh hle. Hemi zawh hian kalkhawm ten Theitui an inho a, chawhma lam hun chu khar zui a ni.

Chhun dar 1:30 PM ah Community Hall-ah Vantlang inkhawm tan zui leh nghal a ni a. He hun hi Pu J.Pachhunga, President, Branch YMA chuan a kaihruai a. Pathian hnena inkawltira Tanna hun Capt. Lalrinmawia SAY Phullen chuan a hmang a. Khawtlang nu leh pa VC te, NGOs hrang hrang hruaitute, Kohhran hruaitute leh tualchhung a Sorkar mi pawimawh tak tak te leh YMA members thahnem tak an tel a ni.

He inkhawmah hian YMA Day 2016 hnu lama YMA Phullen Branch members chatuanram pantate pualin SUNNA hun hman a ni a. Zaithiam Marina Zohmingthangi chuan an pualin sunna hla, Z.Lalthanzualan thiam taka a lo sak thin “Joran Lui malin ka kai loving” tih hla chu lungkuai zetin a sa a, kalkhawmte rilru a khawih hle tih a hriat.  He huna YMA Phullen Branch in a sunte chu:

1. Pu T. Lallawmkima    -     19.07.2016
2. Pu PB Sangdingliana    -    03.09.2016
3. Pu Vanlalhnaia        -    24.09.2016
4. Pu B.Lalchhanchhuaha   -    25.10.2016
5. Pu Saihnuna        -    31.1.2017   

He inkhawmah hian thusawi tha tak tak ngaihthlak a ni a.  Pu B. Lalhriatpuia VCP Phullen chuan Phullen khawtlang tana VC  hmalakna hrang hrangte, tun hnaia kan khawtlang hmasawnna hrang hrangte a sawi lang a. VC te nawr chhuah ni lem lo, Sorkar atanga hmalakna lo kal pangngai MGNREGS, IWMP, LAD hnuaia Step, NEDP etc te leh VC te hmalakna leh nawrna avanga kan khawtlangin a hmuh leh neih te a sawi lang bawk a. A langsar zual – Bank, Leitlahniam siamna, PHC kawng, Dumping Ground, khawchhung kawng siam (Internal Road Black topping) te a tarlang a. Tin hmachhawp lian tak tak an la neih te pawh a sawi lang bawk a. Kan khawtlang hruaitute hmalakna hrang hrang leh an hmachhawpte hi a ngaihnawmin, khawtlang mipui tan a thlamuan thlak tak zet a,  kan khawtlang hruaitute thawhrim zia pawh a hmuh theih a ni. Tin Dry Village kan nihna leh kan kalpui dan te sawilangin, thalaite chu hemi kawngah hian nasa takin a fuih bawk.

Tin, a duh apiang thusawina hun hawn a ni a, Pu David Lalrinawma Secretary JPC leh Sanitation Committee ni bawk chu lo ding chhuakin, kan khawtlang hruaitu VC ten Sanitation Dusbin an dawng chu lawmawm a tih thu te, JPC term thar hmalak tum dante a sawi a. JPC chuan, ruihtheih thila harsatna nei te pawh an harsatna hriatthiampui chunga, hmangaih taka kawm an tum thute a sawi a. Kan JPC hruaitute hmalak tum dan hian beng a verhin a lawmawm hle a. JPC te hi mipuiten kan thlawp that a, kan tawiawm an ngai tak zet a ni.

He hunah hian zaithiam Lalruatzeli chuan John Mawitea & Mapuii Fanai hla “Nang leh Kei” tih hla chu thiam takin a sa a. “Thalaite u thovin I harh ang u, hei hi kan ram neih chhun Zoram a nih hriain…., Pi leh puten lu chum ban chum huama an sah chhuah sa, hum him tur leh tung ding tur hian, nang leh kei lo chu tu dang reng an awm si lo… tiin kalkhawmte zaiin a ngen vawng vawng a. Tin, Vanapa Section aiawhin Lalhmuchhuaka chuan Ruatfela Pachuau hla “Engkim a engkim” chu thiam takin a sa a, "Lei hausakna sum leh pai leh ropuinate nei lo ila, rethei mah ila Isuaah chuan a famkim tawh si" tiin Isua neih thlamuan thlak sia a rawn sa chhuak bawk a. Zai ngaihnawm tak tak bakah hian YMA Cultural Club ten Special Item hlu tak Cheraw Kan mawi leh hmuh nawm tak mipuite an entir a ni.

He programme ti hlutu leh mipuite tihlim em em tu, YMA leh khawtlang tana thil tangkai tak, sum tuakna ni bawk si “Lucky Dip” chu Branch YMA hruaitu hlun tak Pu KC Zahmingthanga leh Pu PB Lalramthara te chuan an huaihawt a. Mipui lawm a hlawh hle a, khawtlang tana mi inphal te nen, mite tanpuina rilru pu chungin he Lucky Dip hi hlimawm takin an hmang a ni. He inkhawm hi Pu K.Lalthlengliana, President MUP Phullen Unit chuan tawngtaiin a khar a ni.

Chhunah hian hian ruah a sur a, zan thlengin a sur a, mahse khaw chhe hnuaiah mi thahnem tak an kalkhawm a. YMA Day hmangtu kalkhawm zawng zawng ten hlim takin ruai an theh ho a. Tlaiah hian YMA Day hmang tur Phullen Welfare Commmittee aiawhte chuan YMA Day lawmna hmun hi an thleng a. Kawng a that loh vanga thleng hma thei lo an ni a, YMA hruaituten duhsak takin eitur an lo siam sak a ni.

Zan dar 7:30 PM hian Community Hall-ah YMA Day lawman Programme hnuhnung ber Vantlang Inkhawm chu tan leh nghal a ni a. Inkhawm hi Tv T.Lalthangzika Vice President YMA Phullen Branch chuan a kaihruai a. Upa F. Lalsangzuala YMA Branch Executive Member chuan Pathian hnena inhlanna neiin, tanna hun a hmang a. He hunah hian khawtlang mi pawimawh VCP Pu B. Lalhriatpuia te leh Phullen Welfare Committee, Aizawl atangin Pu Lalbiakdanga Sr Aviser, Pu R. Kapkhuma Adviser, Pu R. Lalrohlua Secretary, Pu K. Lalngaihawma Treasurer, Tv PC Ramdinthara Asst Secretary leh Pu Lalbuatsaiha Chairman - PWC Info & Publicity te chu Welfare aiawhin an tel a ni.

He inkhawmah hian Pu R. Lalrohlua Secretary, PWC chuan PWC aiawhin thu tawi a sawi a. A thusawi tan hmain PWC aiawhte inhmelhriattirna a nei a, “Phullen tana mi tangkai Sweet Sixteen Pu Lalbiakdanga Sr Adviser lo ding se” an tih chuan, mipuiin kut an beng nasa hle. A thusawiah hian, Phullen Welfare chu YMA zara lo ding chhuak a nih dante, chutih rualin VC ten Nu ber chan chang a, Welfare an tuamhlawm tlat dante a sawi a. Tun hnaiah Welfare chu mahni a inthlang ve thin in a awm ta a, YMA leh VC te zarah khawtlang mipuite nen inpawhna tha tak, thawhhona tha tak neih a ni zel chu lawmawm a tih thute thiam takin a sawi a ni.

Tin Branch YMA President Pu J. Pachhunga chuan, YMA members te hnenah Thuchah tha tak a sawi a. Pu Chhunga chuan, kan khawtlang nun hi, a tha viau anga kan ngaih lai hian, insiam that ngaihna lai pawh kan neih thu a sawi a. Tleirawl ten sawm bik pual thiltih ah zahna chang an hriat a tul thute, ei leh in siamna thil tih ah phei chuan, sawm ve loh ni chung a Ar nghal zuan luh ngawt zel chu a tha lo a, hemi chungchangah hian tleirawlte lo inenfiah se a duh thu a sawi a. Thlan laih leh khawhar in riahpuinaah Tlangvalte kan inenfiah a ngaih thute, Nulate pawh kan zuau mah mah em aw! tlaivar avang a a tuka chet loh tur tihna a nih loh thute, tlaivar chu tuman kan ngeih bik lo a, thalai tan erawh zan hnih khat lek chu eng vak mah a nih loh thute sawiin kalkhawmte a fuih a. Thalaite hian kan mi hmingtha Tv Er. C-a te, Pu Lt Col Clement Thanga (Pu Hminga) te etc hi en tawn ila. Eng hna pawh thawk ila, awmze neiin, tum neiin, a changkang leh hahdam, hlawk zawk bawk si ngaihtuah chungin hmasawn I tum ang u, tiin YMA members te a fuih a ni.

Zaithiam tak tak zai hian inkhawm a ti hlu zual ngei mai. Lalruatzelin chuan Domangi Zai – “German Rallian” chu thiam takin a sa a, “Sikin manding sap I lung mawl e, German rallian tawnin tir suh ka lung di, ka suihlung leng tur I dawn lo ve” a rawn ti raih raih a. Marina Zohmingthangi pawhin, Phullen khua, rual u zawk ten an lo ngainat em em, Pu Mangchhuana (L) hla, Phullen nula Laldingnghetin Zoram huapa a larpui ngei mai “A kal her luai luai” tih hla kha, thiam takin a rawn sa a.

“Eheu eheu eheu.. a rui a tlaini leng an tam ta em e, engtin ngai maw khuanu lengin? Dam chhung tawi te, thih hnu sei tur dawn lo rengin, Awi, rau pui phuar vel ang an meng phuai mai….. Buaina chhumpui kara leng Zofaten, Puan ang hnawl ila chawl tui ningzu. Chutin kan than lo sang zel se, Lungdam te’n laitual I leng za ang” a rawn ti hnap hnap mai kha chu! A thiam piah lamah, a thu hian kan khua min mitthla tir a, “keini chu kan la fihlim zel e” tia kan chhan let theih leh theih loh rilruin a lo ngaihtuah zui nghal.

Kan khaw zaithiam Lalremruati pawhin, Mizo hla hlui danglam bik, Lalmama hla “Chhura Sangha Vuak Hla” ngei mai kha thiam em emin a rawn sa a, mipui an au ring ngei mai. Hla sak nalh har tak a rawn sa ngam kha a fakawm a. Kei lah lunglengin rawllai nun ka lo chhui kir a, Middle School kan kal laia, kan Headmaster Pu Khuanga (zah phu tak leh ka zah em em) hova kan sak thap thap lai min hriat chhuah tir veng veng mai.

Zaithiam dang Biakhmingmawii a rawn che leh a, YMA kumpuan nena inhmeh em em mai, F. Vanlalhriatrenga hla “Ka bahhnukte” tih chu a rawn sa a. “Hnamdang tawnah hlan ka zuam si lo, kan ram riangte hi. Ka Bahhnukte – khua leh tui ka chan ai chuan, hlan mai na’nge ka sakruang Mizoram tan…. In dawn ve thin em lenrualte u lei hringnun hi! Puan ang kan hnawl zel mai dawn em ni kan ram ro hlu. Tlawmngaihna leh Zonunmawi an liam em ni? Kei zawng ka phal lo romei iang an ral tur hi… Ram leh hnam humhalhin phei I khai ang u” a rawn ti vawng vawng mai, a thiam si, ngaihtuah a va thui duh tak em! A la duh tawk mai lo, “Ka Pi I zunah maw ka lo uai a” tih hla khan a rawn nawr zawm nghal, Hall chhung chu a su dup dup a ni ber a, Phullen Welfare hruaitute pawh an phar sang ngei mai.

Chawngbawla Section aiawh a Special Item – Talk Show mawlh mai kha!. Khatiang hunah khatiang tih nachang an hria kha an va fakawm em! Kan khawtlang a VC, YMA, JPC, Sanitation etc hruaitute lem a changing, khawtlang hmalakna hrang hrangte leh an ngaihdante hun rei lote chhungin an rawn sawi lang a, a bengvarthlak ngei mai.  Tin, tleirawl rual Musical Instrument nen Beat contest ang mai a mawi leh ringa mipui an awi kha a va hmuhnawm em! A hmuhnawmna tizualtu chu, Music hi rui lo hai lova tuipui theih, mipui hmaa chetchhuahpui theih a ni tih an lan tir kha a ni. An han zai kha chu, Hall chhung kha lamtual ah a chang a ni ber e. Sawi hmaih hauh loh tur chu YMA Cultural Club ten Cultural Items an rawn entir kha a ni bawk. Nula leh tlangval ten Mizo inthuam mawi tak hain Puma zai hla (ka sawi sual em aw?) – “Lamkawiah thingsiri par lo tla e lo tla e, ka chhar dawn lo zaiin ka pel mai dawn e, ka di rim reng reng a nam lo…” tih pah a, an han phar siau siau te kha, mitthlaah a cham reng mai.

             Zaithiam danglam em em mai Pu Vanthuampuia zai khan mipui lawm a hlawh hle bawk. A hla sak kha, eng hla ber nge tih sawi theih loh khawpa sei leh hawlkim a ni. Kristian hla bu a mite leh  hla lenglawngte, chatlak miah lovin a sa kual a, Sap hovin Medley an tih ang hian a pawl deuh a, mahse Pu Mapuia zai hi Sap ho medley nen tehkhin phal chi a ni lo. Mi nazawng theih loh, zaithiam naran tlin chi loh thil a ni. A pui riap riap ngei mai. 

Hun tawp lamah YMA Day pual Lucky Ticket result puan a ni a. Pu Zoramhmangaiha leh Pu Lalramthara Hnamte ten an kaihruai a. Lucky Ticket First Prize hi Pu Joseph Lalrammawia, tuna Chanmari East a awm chuan a man a. Tin YMA Kumpuan bawhzuina pual a Article inziah siak lawman puan a ni a. Kumpuan Secretary Pu Hmingthanzauva Zote chuan kaihruaiin, Lawmman pakhatna Article ziak tha ber lawman chu Pu BT Lalhruaitluanga, Taitesena Section chuan a dawng a. Tichuan zan dar 11:00 PM velah kham lo takin YMA Day 2017 lawmna chu tluang taka zawh a ni ta a ni.

YMA Day 2017 lawmna a Ei leh In lam siam zat hriat theih tlangpuite:

1. Vawk 3 talh a ni.
2. Ar 10 kgs siam a ni
3. Artui hi pum 50 vel siam a ni.
4. Thlai hnah – Antam engemaw zat siam a ni.
5. Chhun lamah theitui (squash) sem a ni bawk.

YMA Day 2017 Lawmna puala Phullen Branch YMA  hnena tanpuina petute:

1. Vanapa Section    -    Rs 1000
2. Chawngbawla Section    -    Rs 500
3. Drivers Union        -    Rs 500
4. MHIP            -    Rs 1000
5. VDP            -    Rs 300
6. MUP            -    Rs 500
7. VC            -    Rs 3000
8. Pi Sawmi        -    Rs 100
9. Pi Laithangpuii        -    Rs 100
10. Pi Biakchungnungi    -    Rs 100
11. GSA            -    Rs 300
12. Mistiri Association    -    Rs 200
13. NERLP            -    Rs 1000
14. JPC            -    Rs 1000
15. Joseph Lalrammawia    -    Rs 1000
16. Volleyball Association    -    Rs 300
17. PSSU            -    Rs 300
18. Phullen Welfare (PWC)-    Rs 5000

YMA Day lawman hmun ber, kan Hall chhung, ri a khawk nasa lutuk khan zaithiamte thiamna angin a lanchhuah tir thei lo a, thusawi hriat a harsa em em mai bawk khan inkhawm a ti hahthlak lek lek a. Mahse, YMA hruaitute leh members te inpekna azarah tluang takin hun hlimawm tak hman a ni. Khatiang a ropui leh nuam khan YMA Day hi hman a ni leh thei ang em tih chu zawhna chhan harsa tak a ni. YMA Phullen Branch hruaitute an fakawm ngei mai.

PS: Dik tawk lo leh fel tawk lo a awm ngei ang a, a dik zawk inhriat tir zel ni se, kan siam tha zel ang, YMA vul zel rawh se – Buata Bawihtlung

********************************