AWKSARALA KHAWNBAWL UPA TE
WhatsApp Phullen Group ah Pu Biakan
Awksarala Upate hming pahnih sawiin, a dang lo thawh belh ru a ti a, tihian ka
rawn phuah khawm ve ang e - Buata Bawihtlung
1. Neihruma - Khawchhiar
2. Hnundailova
3. Thangkhuma
4. Dareka
5. Zakhuma
6. Hrangphunga
7. Tuala
8. Dolala / Thavapa
Pu NEIHRUMA hi Pu Neihtawna pa a ni a, Kristian hmasa, Harhna
chang hmasa a ni. Khandaih harhnaah intan tirh a Tuivai atanga khua a an haw
kawngah khan tleirawlte niin Hla chang sawitu a ni a. An zai tui bawk a, hla
pakhat te kha vawi 30 te an la nawn hial thin a ni. Khatih lai British India
awpna hnuaiah khan Phullen ah Khawchhiar a ni. A fate pawh Kristian tha tak tak
an ni zui a. A fapa Neihkhuma hi Phullen khua atanga Missionary chhuak hmasa
ber a ni a, kum 1953 September ni 28 khan Missionary in a chhuak a ni. Tin, a
fapa Pu Neihtawna pawh, Kohhran ngaipawimawh mi, Phullen Kohhran khuangpu hlun
a ni bawk.
Pu HNUNDAILOVA hi Lal Awksarala khawnbawl upa a ni a. Kristian
hmasa zing ami niin, kum 1920 khan Kohhran Upa atan nemngheh a ni. Pu
Hnundailova hi Upa Zawmliana Phullen vengthar upa ni mek te, Pu Biakchhunga (L)
(Upa Lalramthara PWC Charman hlui pa) te pa a ni. Pathian thu awih hmasa, Kristian
tha tak chhungkua an ni a. A tu leh fate zingah pawh Pathian leh a Kohhran tana
mi tangkai tak tak, Pastor leh Kohhran Upa an awm nual a ni. Pu Hnundailova leh
Pu Hrangphunga te hi Lal khawnbawl upa an nih bakah Kohhran Upa ni bawk an ni.
Pu DAREKA hi a hming dik tak nia an sawi chu Darthuama a ni
a. Innbuan chak, thu leh hla lama tui mi, pi leh pute thawnthu inhlan chhawn hre
tak leh Serh leh sang ngai pawimawh mi a ni a. A pa Thangzika pawh kha Khandaih
lal Vanphunga khawnbawl upa te zing a mi a ni. Puma Zai hla leh kaihlek hla te
pawh a phuah ve niin an sawi. Hmanlaia lo atana an neih ngam loh Sih huai leh
Zawng lu ro awmna hmun te pawh a thian thiam a ngaih a ni a. Pu Darekan a then
hnuah Lo atan a nei thin. Hnang deh a thiam hle bawk niin an sawi.
Pu ZAKHUMA hi Upa Tawnkima, Pu K Thanhlira etc te pa a ni.
Awksarala khawnbawl upa a ni a, Pu Zakhuma pa pawh kha Vanphunga Khawnbawl upa
zing ami niin an sawi. Zakhuma hi kum 1914 a Awksarala hova Thirhluma kai
zingah, Kristian tlemte tel zing a mi a ni. Heta an awm lai hian Kristian
awmchhun te kha an pawimawh em em a. Hetah hian Biak In an sa ve a, Zawlbuk
khuang kha Biak Inah an la lut a, hei hi Biak Ina khuang an lakluh hmasakna a
nih hmel. Pu Zakhuma te hi mi tha chhung an ni a, Khandaih harhna a a bultanna
Hnuneka Pawihte kha, mi harsa tak chhungkua atanga lo piang a nih avangin an
hnenah awmin an dawmkanga, an In atangin nupui a nei nghe nghe.
Pu HRANGPHUNGA hi Pu Tlanhnûna (L), Pi Tlanthangi (Pu K Lalthlengliana
nu) te pa a ni. Tin, tuna VC member Pu
J.Remsiama pu hi a ni. Awksarala
khawnbawl upa, Kristian hmasa a ni a. Awksarala kianga Thirhlum kai Kristian
tlemte zing ami a ni. Thirhlum kai lai hian, Kristiante kha Thirhlum ah kai ve
lovin Khandaih lamah an awm deuh vek a ni. Kum 1921 khan Kohhran Upa atan
nemngheh a ni. Thirhlumah hian rei tak an awm lo va, khaw thar a nih bakah
Kristian tam zawk Khandaih lamah an awm si a, Kristian chu In thum vel chauh an
awm a. Chawlhni te an theihnghilh chang a awm thin a ni awm e. Mahse mak tak
maiin harhna a rawn thleng a, Awksarala pawh he hmunah hian Kristianah a in pe
a ni. Thirhluma an awm lai hian, tum khat chu Thli a tleh na hle a, Zawlbuk chung
pawh a len bo daih a, a hnuah Tuivai kamah an hmu leh a ni.
Pu TUALA hi Khawnbawl upa a nih bakah, Pasaltha a ni a. A
hming hi Tualduma tiin an sawi bawk thin. Pu Vankima (Pu Biaktea pa) leh Pu
Lalenga (Pu Biakchungnunga Pu Lalrammawia PWC te pa) te pa a ni. Tum khat chu lalpa hoin an ramvak a, Pu Tuala
chuan Sakhi a kap a. Chu Sakhi chu ramah chuan an pum rawh ta a. Sakhi an
rawhna lai hmun chu Sakhi rawh kawn tih a ni zui ta a, tun thlengin
Sakhirawhkawn hming hi a lo pu ta a ni.
Pu DOLALA hi Pu Thavapa pa a ni a. Pu Dolala a lo upat deuh
hnu chuan, lal Awksarala chuan pu Dolala aiawh a rorelna a tel turin Pu Thavapa
hi a sawm thin a. Naupang te ni chungin a tel ve thin. Tum.khat chu Sailo lal
leh Sailo lal an in dawr naah, Serzawl lal Lalsakeia dawr turin lal Awksarala
khan a tir vang vang a ni. Lalnu Pi
Lalhliapi (Awksarala nupui) a thih khan, a fate chuan khawnbawl Upa damchhun tiin
Pu Thavapa hi Phullena a awm chu Aizawlah an hruai thla nghe nghe. Pu Thavapa
hi Pi Thaengi chhang chiah a ni a. A nupui Pi Thanliani nen khan an inrual
khawp a; zankhata piang ve ve an ni.
A sei leh ta hle mai. Awksarala Khawnbawl upa dangte chanchin
hi chu ka mi chhuan leh ngaihsan pahnih Pu Biaka (Ex Chairman PWC) leh Pu
Vanthuama (Teacher, Thangthar Historian hlu) te rawn chhunzawm ve atan ka khek
e.
Ziah dik loh ka neih chuan, khawngaihin min lo ngaidam ula, a
dik zawk min hrilh dawn nia. Ka thulakna langsar zualte chu- Upa Khuangchhana,
V.Vanthuampuia, Upa Dohmingthanga, Pu Thavapa chanchin (Vuina a mi), Pu K.Lalthlengliana,
Pu L.Biakdanga etc
Buata Bawihtlung
Ni 16.4.2017 Easter Sunday 1:10 PM @ Tkt
Edited on 17.4.2017 Monday 1:15 AM @ tkt
Comments
Post a Comment