YMA DAY VAWI 81-NA PHULLEN BRANCH-IN A HMAN DAN

Ni 15.06.2016 Wednesday:

YMA DAY vawi 81-na Phullen Branch in a hman dan tlangpui-

       Branch YMA Committee in a rel angin kumin 2016 YMA DAY hi Hall chhunga intihhlimna lam hun atana hmang lovin, khaw chhung a kawngko leitla leh kawngpui sir tuiluankawr (side drain) te siam thatna hun atan hman a ni. Members pum huapin hnatlang neih a ni.

       Hnathawh tur Leitla te hi a tam deuh avangin YMA DAY pual hnatlang hi ni 13.06.2016 ah a thawh khatna neih a ni a, hnatlang runpui erawh Ni 15.06.2016 YMA DAY ah tak nilengin member pum huapa neih a ni.

       YMA Day pual hnatlangah hian Motor kawngpui ko leitla te bakah, kawngpui sir tuiluankawr te tihfai tur a nih avangin Branch YMA hruaituten EE, PWD Saitual Division hnenah JCB hnatlan tir ve turin an dil a, annin rem an tih angin PWD Deptt JCB leh mimal JCB (Tv. Hriata enkawl) chu hnatlangah hian an tel a, an thawhhlawk hle.

HNATLANG THAWHKHATNA:

       Ni 13.06.2016, Thawhtanni khan neih a ni a. Hemi ni hian Phullen to Saitual (Aizawl) PWD Main Road, New Khandaih a Pu Lalrinkima inbul kawngko leitlain kawngpui a hnawh chu paihfai a ni. Hemi ni vek hian Phullen Vengthar Tuikhur chunga Kawngpui sir tuihawk luankawr (side drain) chu siam a ni bawk.  Hnatlang thawhkhatna hi JCB hmanga thawh a ni.

HNATLANG THAWH HNIHNA:

       Ni 15.06.2016 Nilaini ah hnatlang thawhhnihna hi neih a ni.  Zingkarah JCB hmangin Phullen Vengthar tuikhur chung zawn atang a hnathawh chhun zawm lehin Pi Lalchhungi (VLR Sumo) te kawt thleng leitla paih a ni.

       Tukthuan eikhamah YMA member pum huap hnatlang neiin YMA Day hi hman a ni a. Member thawkchhuak ten leilaihna hmanrua leh chem thawh chhuahpuiin mi 250 vel an thawk chhuak a a ni.

       Hemi ni hnatlang hian khawchhung a kawngpui pawimawh sir tuihawkluankawr (side drain ) an siam that bakah leh kawngba samfaiin YMA members te an hnatlang mup mup a.

       Hnatlang te hi hlawm hnihah in thenin, hlawm khatna - Pu B Lianmawia, Diakkawn leh Pu Lalributa Diakkawn In atanga hmar lam zawng atanga thawkchhuak ten, Phullen Vengthar tuikhur chung atanin Pu B. Rengluta in bul thleng kawngkam tuiluankawr (Side drain) tha lo lai an siam a, khuarte an hnawh bakah, kawngba an samfai bawk a ni.

       Hnatlang hlawm hnihna - Pu.Lalthakima, Diakkawn leh Pu Zothangthuama Diakkawn In tanga chhimlam zawng atanga thawk chhuak ten, YMA ram samfai leh kawngba an samfai bakah, Pu Lalrinkima, New Khandaih inbul leitla, thenbang leh kawngpui khuar laite an hnawh bawk a ni.

       Tin, Phullen to Saitual road, Paihte tuikawr a Hume pipe leiin a hnawhphui chu haihawn leh a ni a. He hume pipe hnawhtu lungthril te hi paih mai lovin, Pu Lalrinkima, New Khandaih In bul kawngpui khuar leh diak reng thin hnawh nan lak a ni.

       Hemi ni hian Pu Vanlalhriata Mautui veng chuan a JCB kawllai chu thawh chhuahpuiin, a hnatlang a, a thawh hlawkin hna a sawt phah hle a. Tin, Pu Lalrinkima New Khandaih In bul kawngpui khuar leh diak hnawhna tur Leithril phurh nan Pu Zonunsiama, Diakkawn chuan a motor a rawn thawh chhuahpui bawk. Pu Vanlalhriata Mautui veng leh Pu Zonunsiama Diakkawn te inpekna leh thilphalnaah YMA hruaitute leh khawtlang mipui an lawm hle.

       Tin, YMA Day pual hnatlangah hian khawtlang nu leh pa VC leh MHIP atangin YMA chuan tawiawmna a hmu tha hle a. Hnatlang chawchhun hmeh atan Vawksa tui tak VEC Phullen chuan a tumsak a, YMA hruaitute an lawm hle.

       He YMA Day pual hnatlanga thawkchhuak, mimal hming kan tarlan takte leh YMA zawng zawng te bakah EE, PWD Saitual Division chungah YMA Phullen Branch chu a lawm tak zet a. He YMA Day vawi 81-na kan khua Phullen ngei a hman ve chak tak, hmun dang a awmte, mahni awmhmun atanga YMA DAY hmanna lo tawiawmtute zawng zawng chungah YMA Phullen Branch hmchuan lawmthu a sawi tih Pu Zonunmawia, Secretary, YMA Phullen Branch chuan a sawi.

Pu Kalchuailova, Ex VCP Phullen - Hnatlang zinga upa ber

       YMA Day vawi 81-na hnatlangah hian mi 250 vel an thawk chhuak a, hnatlang zingah Pu Lalchuailova, Ex VCP chu upa ber a ngaih a ni. Hetiang hian vantlang tana thiltha tihnan YMA Phullen branch chuan YMA Day hi an hmanga, kan khawtlangin nasa takin YMA Day hi a hlawkpui a ni. YMA vul zel rawh se.

Ps: YMA Day vawi 81-na Phullen Branch ina hman dan hi Pu Zonunmawia Secretary, YMA PHullen Branch in Whatsapp Phullen Group-a a report behchhana siama ni. - BBuata.