PHULLEN AH CHAPCHAR KUT 2019 ROPUI TAKA HMAN A NI

Vawiin March ni 1 khan Phullen Public Playground-ah Kût Pa Pu B.Lalhriatpuia VCP hoin Chapchar Kût ropui taka hman a ni a, Khawtlang mipui ten hlim takin hun an hmang.

Phullenah hian YMA huaihawtin Chapchar Kût hi ropui taka hman a ni ṭhin a. Kuminah hian kan khawtlang hruaitu Village Council-te kaihruaina hnuaiah Chapchar Kut Organising Committee din a ni a, YMA Phullen Br President Pu R. Lalthantluanga chu Organising Chairman niin YMA Phullen Br Secretary Pu Lalruatsanga Pautu chu Organising Secretary a ni a. Organising Committee te ruahman angin Chapchar Kût 2019 hi hman a ni ta a ni.

Chapchar Kût 2019 lawmnaah hian VCP Pu B. Lalhriatpuia chu Kût Pa a ni a. Hun kaihruaitu tura ruat Organising Committee chairman chuan harsatna a neih thut avangin Pu J. Pachhunga - Vice President, Phullen Branch YMA chuan Chapchar Kût lawmna hi a kaihruai a, Phullen Vengthar Bial (Presbyterian) vawngtu Rev. MS. Dawngliana'n hunserh a hmang a, Kût Pa Pu B. Lalhriatpuia chuan thu sawiin Chapchar Kut 2019 lawmna hun chu a hawng a. Hemi hnuah hian Announcer Nl. Elizabeth Lalhunkimin hun a kaihruai zui ta a ni.

He hunah hian, nikum lama YMA huaihawt Zai intihsiaka lawmman pakhatna dawngtu Vanapa Section YMA Zaipawl ten thiam tak leh nung takin Kût lawmtute an awi a. Taitesena Section YMA ten Chapchar Kût tihlu em em tu Costume Parade hmuhnawm tak an entir a, Chawngbawla section YMA ten hman laia kan pi leh pu, kan nu leh pate hun laia Mizo ten khaw karkawnga ruang (Mitthi) an zawn ṭhin dan “Miruang Zâwn” hmuhnawm tak an entir bawk a. Section YMA te hian mipui mit leh beng an titlaiin, ngaihhlut a hlawh hle.

MUP Phullen Unit ten Mizo La deh dan, Herawt hmangin hmuhnawm takin an entir bakah Mizo Sairawkherh hman dan an pho lang a, Kût hmangtu mipuite ngaihhlut a hlawh hle a. MHIP Phullen Branch ten Parlâm mawi takin an rawn entir a, Presbyterian School Phullen naupang ten Siktuithiang lam mawi takin an entir bawk a, Christian Children School Phullen naupang ten Hnam lâm (Cultural Dance) hmuhnawm tak an entir bawk a, mipui mit a tlai hle.

Kalkhawm mipuite hi zaithiam tak tak Pu Lalramngaia, Vanapa Section leh Tv. F. Lalbiaksanga, Taitesena Section ten zai mawi takin an awi a, mipui ten an kham lo hle.

Kumin Chapchat Kût lawmnaah hian Phullen Drivers Union ten Kût hma zan atangin mipui eitur an buaipui char char a, Kût zingkarah Kut hmanna tur hmunhma felfai takin an ruahman vek bawk a, bungraw mamawh zawng zawng lakkhawm leh dah fel pawh tlin takin an thawk nghal a, an fakawmin Chapchar Kût organising committee te PDU chungah an lawm hle.

Kumin Chapchar Kut lawmnaah hian, a buaipui tura ruat bik ten Chapchar Kût Miss an thlang a. Chapchar Kut Miss 2019 ah hian Nl. PB. Hmingthanzuali d/o PB. Lalramthara chu thlan a ni a. Chapchar Kût Miss hi Kût Pa Pu B. Lalhriatpuia chuan lawmman a hlan a, Chapchar Kût Miss Lawmman hi Pu J. Pachhunga, YMA Vice President-in a tum a ni.

Tlai lamah Kût hmangtu mipui tam takte chu field chhungah lutin, a huhovin an Chai a, Chheih lâm te nen hlim takin, kham lo takin Chapchar Kût 2019 lawmna chu tihtawp a ni ta a ni. Chapchar Kût ropui taka kan lawm theihnana hmalatu VC leh YMA leh organising committee te an fakawm hle a. Tin Heng a hnuaia tarlan Pawl leh Office te hian Chapchar Kût lawmna pualin pawisa an thawh a, an chungah Organising Committee leh khawtlang mipuite an lawm hle.

# Chapchar Kut 2019 puala sum thawhtute:-
1. Village Council    ₹ 20000
2. RD Deptt Phullen    ₹ 10000
3. ICDS Phullen    ₹ 5000
4. PWD Phullen    ₹ 5000
5. NERLP Phullen    ₹ 1000
6. MRB Phullen    ₹ 1000
7. YMA    ₹ 5000
8. PDU    ₹ 2000
9. GSA    ₹ 1000
10. MHIP    ₹ 500

Source: Pu Lalruatsanga Pautu
Secretary, Chapchar Kut Organising Committee, Phullen.

Buata Bawihtlung
Dt 01.03.2019, 8:30 PM