PHULLEN DOCUMENTARY FILM RELEASE-NA A VCP PU B.LALHRIATPUIA THUSAWI

(January ni 3 zan khan Phullen Documentary Film Release a ni a. Chuta Khuallian kan VCP Pu Hriata thusawi hi, a tukah khan kan khaw pa ropui Prof JV Hluna khan ṭha a tih thu titihonaah a sawi a, kan thlawp tlang hle a. A hnuah Facebook kaltlangtein VCP thusawi hi chhiar theih tura dah chhuak turin min rawn ngen hlawm a. Kei lahin a sawi ṭha ka lo ti ve em em tho bawk si. A thu kha a tak ngelngawl hle a, a sawi huai hle a, Phullen hmangaihtu dik tak a nih zia a lang hle in ka hria. Kum tir te a ni na a, kan khawtlang Phullen tan chuan “Kumin chhunga Thusawi ṭha ber” ah ka lo thlang fel titih nghal der mai bawk si a. Chuvangin, midang chhiar ve theih turin ka rawn fawmkhawm e. #Buata Bawihtlung)

VCP Pu Hriata Thusawi chu:

Pu Chairman leh Khualzahawm te, Welfare Chairman leh kan mi pawimawhte leh helai hmuna lo kal zawng zawngte, in vaiin chibai ule.

Zanina kan hun hman hi, Phullen khaw hmangaihtu, angaihna hria te thiltih a nih hi. Hlawh pakhatmah nei lo, phût lo leh beisei lova hetiang thil ropui min han chhawp chhuah sak hi Phullen khua an hmangaih vang a tih loh theih loh. Phullen Historical Society (PHS) te hian Phullen khua hi an hmangaih tak tak a ni. Hetiang Documentary Film nei khua hi Zoramah hian eng zat tak awm ang maw, midang an lo awm ve a nih pawhin, an tam lo ngawtin ka ring. PHS leh Phullen Welfare ten Phullen khua an hmangaih zia hi atakin kan hmu zêl a nih hi.

Kan Welfare ten kan khawtlang an hmangaihzia chu Aizawla damlohna avanga kal ten a takin kan hmuh chian leh zual ka ring. A tam zawk chu Phullen khua a awm tawh miah lo te an ni a. Chutianga Phullen khuaah pawh awm tawh lovin, mahni khawchhuahna heti taka an rawn hmangaih thei a nih chuan, keini Phullen khua a chêng mek te hian kan chenna Phullen khua hi eng tianga nasain nge kan hmangaih ve le?

Mahni chhungkua nupui/pasal fanaute, kan In leh Lo te hmangaih lo kan awm ang em? kan tu leh fate, kan chhungkua ṭheuh hi tha taka a zik chhuah duh lo kan awm ang em? Chutiang kan duh chuan kan chenna Phullen khua hi a ṭhat a ngai a ni. Phullen ṭha lo takah chhungkaw ṭha tak a zi chhuak thei ang em ni? Chutianga mahni chhungkua hmangaihtute chuan Phullen ṭha kan siam a ngai a ni.

Phullen in kan lar pui “DRY VILLAGE” hi, kan nu leh pa ten thi leh thau pawlha an lo sual chhuah a ni. Chutih lai kara Phullen a Zu zawrh lo tum lui tlat te kan awm a nih chuan, chutiang mite chu Phullen in kan mamawh lo che u. Phullen khaw ṭhatna leh hmasawnna tura roreltu leh hmalatute tâna harsatna siam a, Phullen khawtlâng hmasawnna tur kawng dâl ching, harsatna lo siam ching tlatte chu, Phullenin kan mamawh lo che u.

Chhungkaw ṭha tak dina, kan tu leh fa, ṭhangthar te pawh chhungkaw ṭha aṭanga zi chhuak zel tur chuan, Phullen tha tak, khawtlang nun ṭha tak kan siam a ngai a, chumi chu a chhunga cheng ten kan mawhphurhna a ni. Tuman min rawn siam sak dawn lo. A chhûnga cheng tawh lo ten, Aizawl leh hmun dang aṭanga hetiang taka Phullen an la rawn hmangaih lai hian, a chhûnga chêngte ngei hian kan lo ti chhe leh si ang tih a hlauhawm khawp mai. Chuvangin a chhûnga chêng te hian ṭan lo la ve in, inlungrual takin Phullen ṭha siam turin i lo ṭangrual ve ang  u.

Phullen ṭha loah chhungkaw ṭha lo a chhuak anga, Phullen ṭhaah erawh chhungkaw ṭha a chhuak dawn si a"

Sawitu: B.Lalhriatpuia VCP Phullen

A hmun: Diakkawn, Phullen

A hun: Ni 3.01.2019 (Thu) 7:00 PM