PHULLEN DIARY 2018

PHULLEN DIARY 2018

(Kum 2018 chhunga Phullen a thil thleng langsar zual, ralkhat aṭanga lo chhinchhiahte)

JANUARY, 2018

Date: 1st January  (Mon):

Kum thar 2018 ni hmasa ber hi khawtlang mipui ten mahni lawina Kohhran ṭheuhah hlim takin lawmna hun hman a ni.

Date: 4th January  (Thu):

Hemi zan dar 6:30 PM khan Health Department leh khawtlang hruaitute huaihawtin Phullen Community Hall ah Rannung seh (Scrub Typhus) chungchanga in zirtirna “Awareness Campaign on Scrub Typhus” chu khawtlang huapin hlawh tling taka neih a ni.  He hun hi Pu B. Lalhriatpuia VCP Phullen chuan a kaihruai a, Health Deptt atangin Medical Officer Dr Zoliankimi Ngente, PHC Phullen leh Aizawl atangin Medical Team Dr Pachuau Malsawma Nodal Officer, IDSP bakah Pu Lalrotluanga Entomologist, NVBDCP te, Pu Lalchhanchhuaha, Projectionist te an tel a ni.

Date: 26th January (Fri):

Republic Day vawi 69-na chu vawiin January ni 26 khan India ram pumah ropui takin lawm a ni a. Phullen ah pawh Public Playground ah ropui taka lawm a ni. Phullen a Republic Day lawmna hi chawhma dar 10:30 AM ah ṭan niin Pi B Malsawmtluangi (MCS) BDO Phullen chuan inkhawm a kaihruai a. Pu V. Lalengmawia (MCS) Project Director DRDA Aizawl district chu Khuallian (Chief Guest) a ni a, Pu V.Vanṭhuampuia Teacher chuan Republic Day Parade hi a kaihruai (Command) a. Pi Rohlupuii Teacher PES chu Programme Announcer a ni.

FEBRUARY, 2018

Date : 5th February (Mon):

Hemi ni, 5.2.2018 Thawhtan zing dar 7:30 AM khan Pu Raltawnkima (1944 - 2018), New Khandaih veng chuan chatuan ram min pan san ta a. A ruang hi vawiin ni 5.2.2018 chhun dar 12:00 PM ah an chenna In, New Khandaih Phullen ah bialtu Pastor Rev Lalngaihawman a vui liam.

Date : 10th February (Sat):

Tunlai hian Phullen khawchhung kawng pawimawh - Kudam kawng (Pu R. Lalnunmawia In bul atangin) leh Bethlehem veng kawng chu siam mek a ni a. Kudam kawng hi blacktop a ni a, Bethlehem veng kawng erawh Plain Cement Concrete (PCC) a siam a ni.

MARCH, 2018

Date :  8th March (Thu):

Vawiin March ni 8, 2018 Thursday chhun khan, kan khua Phullen a Loneitute chuan kum 2018 chhung atana an Lo tur an hal.  Kumin Lo atana ram ṭheh chin chu Sasawbawk zau, mualdung a ṭhen a ram lam zawng a ni a. Lonei ṭhin chhungkua engemaw zatin Lo tur hi vatin an halhlawm a ni.  Kan khaw Lo hi a kang ṭha thawkhat niin hriat a ni.

Date : 13th March (Tue):

Hemi ni hian Phullen BDO kalchhuak Pi B.Malsawmtluangi MCS leh Phullen BDO thar Pi Lalrinchhani Ralte (Amte-i) MCS te chuan BDO Office, Phullen ah mawhphurhna Charge an inhlan fel.  BDO thar Pi Amtei hi MCS junior grade niin kum 2014 khan Sorkar ah a lut a. Kolasib district ah SDC te leh  LAD Deptt ah Asst Director ten a lo awm tawh a ni. Amah hi pasal fanau nei tawhin, Aizawl Saron veng a ni.

Date : 17th March (Sat):

Hemi ni hian Phullen Students’ Union, Aizawl te chuan Aizawl Civil Hospital Blood Bank ah a thlawna Thisen pek hlawhtling tak a huaihawt a. He Thisen pek naah hian Phullen  zirlai Aizawl a awm ṭhahnem tak kalkhawmin, kalkhawm zawng zawng ten Thisen hi an pe thei vek lo a. Mipa 10 leh Hmeichhia 4 ten Thisen hi pein, Unit 14 zet pek a ni.

Date : 23rd March (Fri):

Hemi ni 23.3.2018 Zirtawp zing dar 8:30 AM khan Pi Vanlalawii kum 99 (1920-2018) w/o Pu Vanlalbuanga (L) chuan an chenna In Phullen vengthar ah chatuan ram min pan san. A thih hma hian Phullen a dam lai zinga upa ber a ni a, kum 97 a nih khan Sunday School a la kaikim a ni.

Date : 24th March (Sat):

Chalfilh Assembly Constituency Under 17 Football Championship, Sesawng a khelh ah,  24.3.2018 (Inrinni) hian Final ah Phullen Team in Suangpuilawn Team chu 4-2 a hnehin, kan khaw  GSA Team chu Champion an ni ta a ni.

Date : 24th March (Sat):

Hemi ni hian Phullen & Thanglailung Welfare Aizawl chuan BS Farm, Faldland ah General Assembly an hmang. Hei hi Phullen Welfare leh Thanglailung Welfare inchhunfin hnua Assembly hmasa ber a ni a. Hetah hian hruaitu thlan nghal a ni a, chungte chu:

• Pu Lalrammawia           
• Pu K. Lallawmthanga
• Pu K.Lalhmachhuana
• Tv. PC Ramdinthara
• Tv. J. Lalnunzira
• Pu Lalbuatsaiha

Date : 29th March (Thu):

Hemi ni 29.3.2018 Thursday hian Tv F.LALRUATFELA kum 19, Pu F.Vanlalnghaka fapa chu Tuivaiah chawhmeh zawnga an kal, Pu Chhuanvela (L) leilet thlam bulah Bike a an tlan lai in kawngpuia Electric current hrui chat lo uai thla chuan manin, vanduaithlak takin a hmunah a thi.

APRIL, 2018

Date : 3rd April (Tue):

Hemi  ni 3.4.2018 Tuesday chhun dar 11:00 AM khan Raj Bhavan Multipurpose Hall, Aizawlah, Bharat Scout & Guide a State level chawimawina sang ber Rajya Puraskar (Governor Award) sem a ni a, kan khua Presbyterian English Medium School aṭangin Scout & Guide mi 6 ten Mizoram Governor Lt General Nirbhay Sharma  hnen atangin Governor Award hi an dawng ve. Phullen atanga Award dawngtute chu:

• Vanlalhriati             Cl 9
• Lalhmangaihzuala         Cl 10
• F. Lalremfela             Cl 10
• C. Remsangpuii         Cl 9
• R. Lallawmsanga         Cl 9
• Angela Lalchhanchhuahi     Cl 9

Date : 9th April (Mon):

Hemi ni April ni 9 chawhnu dar 1:00 khan, Chalfilh Constituency football under 17 inelna a Champion, Phullen GSA Team te pualin Phullen Community Hall GSA Phullen chuan Lawmna hun a huaihawt a. He hunah hian GSA Under 17 players te leh an nu leh pate bakah kan khawtlanga mi pawimawh tak tak - VC, YMA, MUP, MHIP, CDPO (ICDS) leh Thanglailung GSA OB te chuan sawm an nih angin an telpui a. Tlaiah Champion lawman chawhlui an kilho nghal.

Date : 14th April (Sat):

Hemi ni 14.4.2018 Inrinni tlai  dar 5:25 PM khan Pu K.Lianzama Kum 61, Pi R. Dothangi pasal, Phullen vengthar chuan, Chuap Cancer leh natna dang dang vangin an chenna Inah chatuan ram min pansan ta. A ruang hi ni a tuk 15.4.2018 Sunday ah vui a ni.

MAY, 2018

Date : 3rd May (Thu):

Hemi ni 3.05.2018 Thursday  hian, Phullen Historical Society leh Doordarshan ṭangkawp hmalaknain Phullen Documentary siam meka pawimawh tak  KHANDAIH HARHNA thlen dan vel chu a lem (Drama) a chan a ni a. Pavalai thahnem tak Tuivai ah kalin, Sangha tlangvuak lem te an chang a ni.

Date : 8th May (Tue):

Hemi ni hian Chalfilh Constituency MLA invitation Football Tournament Final match, Phullen Playground ah Phullen Team-I chuan Lamherh Team chu 3-1 a hnehin Pu Malsawmdawngkima Tochhawng (Head Coach) kaihhruai Phullen Team chu an Champian. He Tournament hi ni 2nd - 8th May 2018 chhung khan Phullen ah khelh niin, ni 2.5.2018 Wednesday khan Minister Pu Lal Thanzara, MFA President ni bawk chuan, Khuallian niin a hawng a. Khaw 16 aṭanga Team khat (1) ṭheuh leh a thlengtu Phullen aṭanga team hnih (2) ten Trophy hi an inchuh a.  Ni 8.5.2018 ah MLA Dr Ngurdingliana hoin khar leh a ni.

Date: 18th May (Fri):

Vawiin 18.5.2018 Friday chhun khan Phullen School Staff Union (PSSU) ten Govt National H/S Phullen ah HSLC leh HSSLC 2018 result chhuak ta a, Phullen aṭanga Pass chhuakte lawmpuina leh PSSU hruaitu thar thlanna hun an hmang a. PSSU hian zirlai Pass tharte hi Lawmpuina Thuziakmawi (Citation- Certificate of Merrit) a hlan a, tlaiah zanriah an kilho nghal a ni. Kumin 2018 hian Phullen aṭanga HSLC leh HSSLC exam te hi an pass tha hle a. Phullen Higher Secondary School aṭanga HSSLC exam beitu mi 30 te chu an vaiin an pass vek a ni.

Tin, he hunah hian PSSU 2018-2019 hruaitu turte thlan nghal a ni a, thlanchhuahte chu hengte hi an ni:

• President     :     Pu Lalthangmawia
• Vice President     :     Pu Lallawmsanga
• Secretary     :     Tv Vanlalrema
• Asst.Secretary     :     Pu Lalhruaikima Tochhong
• Treasurer     :     Nl Lalhluzuali
• Fin.Secretary     :     Pu PB.Lalruatkima

Date : 21st May (Mon):

Hemi ni 21.5.2018, Monday 11:00 AM khan, Phullen BDO Pi Lalrinchhani Ralte MCS chuan, MBSE hnuaia HSSLC Result 2018, chhuak a Phullen Higher Secondary School aṭanga Distinction a pass Lalremsiami d/o Haudala, Phullen pualin Lawmna hun a huaihawt sak a.  Lawmpuina Thingpui a inpui an inho bakah, Lawmpuina Thilpek a hlan a ni.

Date : 22nd May (Tue):

Hemi ni 22.5.2018 zing dar 2:00 AM pelh hret khan Pu H. Laldawngliana H/o Pi Ramengmawii, Mautui veng, Phullen chu Aizawl Civil Hostpital ICU ah a thi. Pu Dawnga hi ni 13.5.2018 khan pumna vangin Aizawl panpui niin zai nghal a ni a, mahse, a dam chhuak ta lo a ni.

Date : 23rd May (Wed):

Hemi ni 23.05.2018 Wednesday tuk zing khan Pi Ṭhaengi (1921-2018) w/o Pu Vana (L) chuan nat lawk em em awm lovin chatuanram min pan san ta. Pi Thaengi hi kum 1921 khan Changzawl Kawnpui awm laia piang a ni awm e. Amah hi tu leh fate kilkawi thiam tak a ni a, a tu leh fa thahnem takte chu inngaih takin a kilkawi thin a, Chhungrualte ti a sawi an ni hial thin.

Date : 21st May (Mon):

Hemi ni 21.05.2018 Monday, dar 1:00 PM khan Phullen Community Hall ah 8-Chalfilh AC MLA Invitation Football Running Trophy ni 2nd  - 8th  May, 2018 chhunga khelh taka Champion team kan khaw GSA Team te pualin lawmna hun hman a ni. Players te leh Coach chu mipui hmaah ko chhuakin, Chawimawina Parthi awrh tir an ni a. He hun hi Phullen BDO Pi Lalrinchhani Ralte ho a hman a ni.

JUNE, 2018

Date : 1st June (Fri):

Hemi ni 1.6.2018 (Zirtawpni) Dar 10:00 AM khan Phullen Kohhran Hall-ah Joint Prohibition Committee (JPC) chuan Annual General Body Meeting neiin, JPC hruaitu hlui leh tharten mawhphurhna an inhlan nghal. Hetah hian kan khuain kum tam tak chhung kan lo kalpui tawh Dry Village chungchang sawihona a ni a. Dry Village kan nihna kawnga kan hmalaknate leh kan hmalak zel dan turte ngunthluk takin sawiho a ni.

Nilenga hun hmangin, tlaiah zanriah an kilho nghal a. Heng a hnuaia JPC hruaitu (2018-19) thar te hian  mawhphurhna an la nghal a ni:

• Chairman     :   Upa Lalrawngbawla
• Vice_Chairman     :   Upa Vanlalnunga
• Secretary     :   Pu F. Lalruatkim
• Asst_Secretary     :   Pu Lalkrosschhuanga
• Treasurer     :   Pu H.Tlanhmingthanga
• Fin_Secretary     :   Pu Vanzairemmawia
• Info_Secretaries :

• Pu B. Vanlallawma
• Pu Lalbiakfela

Date : 15th June (Fri):

Hemi ni 15.6.2018 Friday hian Phullen Community Hall ah YMA Day vawi 83-na ropui takin lawm a ni a, Phullen BDO  Pi Lalrinchhani Ralte MCS chu Khuallian (Chief Guest) a ni.

YMA Day lawman hi khuain min bumro avangin ruahman lawk angin a hman theih lo a, Hall chhungah hlim taka hun hman a nit a a. YMA member thahnem tak leh tualchhung mipawimawhte bakah, P&T Welfare Aizawl tangin hruaituten an hman pui bawk a ni. YMA Day lawman nipah fawmin, Phullen Documentary Film a mi tur Pumazai te leh Mizo hnam lam dangte Shooting neih a ni bawk.

Date : 25th June (Mon):

Hemi ni 25.6.2018 Monday tlai Dar 4:30 pm khan Np. C. Lalhmangaihzuali, Kum 8, Phullen vengthar  Mualveng Pu Lalremruata Chawngthu fanu chu an In bul a Tractor ah chesualin a boral. A ruang hi a tuk ni 26.6.2018 Tuesday chhun dar 11:30 AM ah vui a ni.

JULY, 2018

Date : 6th July (Fri):

Hemi ni hian MHIP Day vawi 44-na chu Phullen Community Hall ah MHIP Phullen Branch ten ropui takin an lawm. He hunah hian MHIP member te bakah, tualchhung mi pawimawh leh sawm bik te an tel a, tlaiah chawhlui an kilho nghal.

Date : 28th July (Sat):

Hemi ni 28.7.2018 Inrinni hian Phullen Historical Society (PHS) leh DDK Aizawl te siam PHULLEN DOCUMENTARY FILM chu Doordarshan Aizawl ah tihchhuah a ni a, khawtlang mipui min chiah hneh hle a. Film chhuah a nih lai hian khawlaiah vei vak hmuh tur an awm lo a ni.

Date : 28th July (Sat):

Hemi ni 28.7.2018 zan dar 9:00 vel khan Pu C. Biakvela kum 61, H/o Pi Numawii Phullen, Hermon veng chu an chenna In Phullen ah Thawhah natna vangin a thi.  Pu C.Biakvela hi Pu Lalhmingliana leh Pi Ngurbeli te fapa niin VC member te pawh a lo ni ve tawh a ni.

AUGUST, 2018

Date : 15th  August (Wed):

Hemi ni hian India Independence Day vawi 72-na chu Phullen ah ropui taka lawm a ni a. Pi Lalrinchhani Ralte BDO Phullen chuan India Hnam Puanzar pawtpharhin, Independence Day thuchah a sawi a. Khawchhunga sikul hrang hrang naupang ten Independence Day Parade te, Cheraw leh lam hmuh nawm tak tak entir a ni a. Tin, Independence Day pual hian Volley Ball tournament huaihawt a ni bawk.

Date : 25th August (Sat):

Hemi ni 25.8.2018 Inrinni chhun khan Phullen Helipad thar, Phullen Thentlang a mi chu Bialtu MLA Dr Ngurdinglianan a hawng. He Helipad hawng tur hian Aizawl aṭangin Pawan Hans Helicopter pakhat chu Phullenah hian a lo kal a. Chhun dar 12:43 PM ah ṭum chhinna (trial landing) a nei phawt a, chumi hnuah Dar 1:29 PM velah Official Landing neih a ni. He helipad a official a ṭum hmasa ber Helicopter a chuangte chu heng mite hi an ni:

1.     Pilot & Co-Pilot
2.     Pu Saidenga, Deputy Controller (Aviation) leh a nupui Zothannguri Colney
3.     Dr. Ngurdingliana, MLA
4.     Pu Lalrinzama, Phullen, Congress Block President
5.     Pu Zonghinglova, Vanbawng

Helipad hawn a nih hnu hian kum upa (Senior Citizen) mi thlan bikte chu Helicopter hian minute 3 vel a thlawhkual (Joy trip) pui zui nghal a, chuta chuangte chu:

1.     Pu Lianthangpuia     Ex VCP
2.    Pu Lalchuailova     Ex VCP
3.     Pu Rosela,         Ex VC
4.     Pu Rosanga,         Ex VC leh
5.     Upa Lalhrana te an ni.

SEPTEMBER, 2018

Date: 5th September (Sat):

Vawiin 5.9.2018 Nilaini chhun khan Community Hall ah ATMA Aizawl District chuan kuthnathawktute pualin Training leh Agri Free clinic a huaihawt a. Programme thupui hi “Training of Farmers on Judicious use of Pesticides cum Agri Clinic” tih a ni a. Phullen, Thanglailung, Phiaibuang leh Zawngin khua atangtein Loneitu mi 266 zet an kal khawm a. Hon’ble Agriculture Minister Pu K.S Thanga chuan Khuallian niin Training hi a hawnga, kalkhawm ten ruai an theh nghal a ni.

Date : 8th September (Sat):

Hemi ni 8.9.2018 Inrinni zan dar 11:30 PM khan Pi Zairemi kum 85 W/o Pahnuna (L) Phullen Vengthar chu an chenna In ah Thawhah vangin a thi. A tuk ni 9.9.2018 Pathianni ah vuiliam a ni. Pi Zairemi hi YMA hruaitu hlun leh hruaitu ni mek Tv Lalthangzinga nu a ni.

Date : 29th September (Sat):

Hemi ni hian Diakkawn hmar lam YMA Office bul vel kawngpui sir blacktop loh laite chu Plain Cement Concrete (PCC) a zut mam a ni a, a chanve vel zawh tawh a ni.

OCTOBER, 2018

Date : 1st October (Mon):

Hemi ni, chhun dar 11:00 AM hian Community Hall ah chhun MUP Day vawi 20-na hman a ni. Hemi ni hi International Day of Older Person a ni bawk a. MUP chuan kan khua Phullen a kum 80 tling chin, mi 33 te hnenah lawmpuina thilpek a pe a. He Ni hmangtute hian tlaiah hlim takin chawhlui an kilho nghal bawk a ni.

Date : 2nd October (Tue):

Hemi ni hian kum 2019 chhunga kan Lo neihna tur ram thehin, Lo tur thlan a ni a. Ramṭheh Board ten kum 2019 atana an ram theh chin chu - Lungdawhmawi mual aṭanga Mualbeubawk thleng leh Sasawbawk daihnai te a ni. Lo thlan hun hi Bible chhiara tawngtaina nen hman niin, chhungkaw aiawh mi 207 ten Lo number hi an pawt a. Pu V. Sawma chuan No 1 pawtin Pu Laithangvunga chuan No 207 a pawt thung. Tin, Thanglailung atangin he ramtheh chhunga Lo nei tur chhungkaw 5 ten Lo an thlang ve bawk a. Hun  hlimawm tak hmangin tlaiah ruai an theh nghal a ni.

Date : 4th October (Thu):

Ni 4.10.2018 zan dar 10:20 PM vel khan Pi Chawnglawmi kum 87, Pu Lalbiaka (L) nupui, Phullen Diakkawn chu an chenna In phullen ah a thi. A ruang hi ni 5.10.2018 chhunah Phullen ah vuiliam a ni. Pi Chawnglawmi hi Upa J. Liankhama nu a ni.

Date : 19th October (Fri):

October ni 19, Zirtawpni chhun dar 10:00 Am vel khan Pu Lalchuanga (s/o Vanlalbuanga & Vanlalawii) te In Phullen Vengthar a mi chu, bungrua engmah chuh hman lohin a kang. In a kan lai hian tumah an awm lo a, a kan chhan hriat chian a ni lo a, electric short vang a nih rin a ni.

Date : 23rd October (Tue):

October ni 23, 2018 Thawhlehni khan T. Lalchhanchhuahaa S/o Malsawmdawngkima Tochhawng, Phullen chuan Mizoram a Science subject a tiṭhate chawimawina ‘Incentive Cash Award for Science and Mathematics 2018’ a dawng. He Award hi Science Promotion Wing SCERT, Mizoram siam niin, pawisa fai Rs 5000/- a keng tel a ni. Phullen rawlthar Chhantea hian Kum 2017 HSSLC (Pawl 12) Exam ah khan Science CHEMISTRY subject ah Mizoram pumah pahnihna niin a mark hmuh hi 93% lai a ni a

Date : 29th October (Mon):

Hemi ni October ni 29 (Monday) hian chhungkaw Nu ber (Pi Vanlalruali) damlohna avanga harsatna tawk Pu Zoramhmangaiha, Diakkawn Phullen te chu, ṭhenrualṭha ten an Buh an seng sak. Mi 100 chuang zet an feh chhuak a, Buh hi an seng zawh bakah an chil nghal vek a, phur 35 niin, Buh chu In lamah an hawn sak nghal bawk a ni. Tin, ṭhenrualṭha fehchhuakte hian, an Hmarcha pawh an mal sak nghal a, ruahsurin a bumro deuh avangin an mal zo hman ta lo deuh a ni.

Date : 31st October (Tue):

Hemi ni 30.10.218 Thawhlehni hian Phullen Community Hall ah YMA Phullen Branch leh Person with Disabilities Govt. of Mizoram ṭangkawpin huaihawtin Rualbanlote chungchang inhrilhhriatna (Awaremess campaign) leh Mizo Lengkhawm zai leh Solfa zai (Zaipawl) a intihsiakna hun hman a ni. Section YMA 3 te leh Thanglailung Branch YMA te chu inelin, an tih that dan chu hetiang hi a ni:

• Pakhatna      :     Vanapa Section YMA            Rs 10000/-
• Pahnihna      :     Chawngbawla Section YMA        Rs 7000/-
• Pathumna      :     Taitesena Section YMA        Rs 5000/-
• Palin      :     Thanglailung YMA Br       

Hei bakah hian, intihsiakna a tel ten Rs 5000/- (Sangnga) ṭheuh an dawn bawk a ni.

NOVEMBER, 2018

Date : 3rd November (Sat):

Hemi ni 3.11.2018 Inrinni chhun dar 12:00 PM vel khan Emanuel Lalchhanchhuaha S/o Pu Lallawmzuala leh Pi LC-i te fapa, ni 2.11.2018 a Friday a piang chu Synod Hospital Durtlang ah a thi. Emanuela hi Civil Hospital ah zai chhuah a ni a, a dinhmun a ṭhat loh avangin LRM ah leh Durtlang Hospital ah te sawn leh a ni a. A ruang hi Phullen ah phurh haw niin thlahliam a ni.#

Tin, hemi ni vek hian, chhun 1:10 PM ah Pi Vanlalruali w/o Pu Zoramhmangaiha Diakkawn veng chu an chenna In ah Cancer vangin a thi. Pi Ruali hi Aizawl lamah te pawh enkawl tawh a ni a, a natna a lo nasat deuh tawh avangin hawpui a ni, a ruang hi ni a tuk ni 4.11.2018 ah vui liam a ni. #

Hemi ni hian Mautui veng - Sericulture Complex panna kawng, Main road aṭanga Pu Kapzawna In bul, pengṭhuam thlengin Plain Cement Concrete (PCC) a siam zawh a ni. He hna hi Mizoram State Finance Commission aṭanga sum lo kal hmanga thawh niin, Work Order ah chuan meter 68 a thui siam tur a ni a. Chutihlaiin, kan khawtlang hruaititen, vengchhung mamawhna hriain renchem tak leh daihzai takin an  hmang a, meter 100 zet a thui an siam a ni.#

Date : 7th November (Wed):

Hemi ni 7.11.2018 Wednesday chhun dar 3:00 PM vel khan, Tv Lalromawia S/o Pu Rosanga Phullen chu Phullen ah a thi. Tv Lalromawia hi Aizawlah te enkawl a nih hnuah Ni 19.10.2018 Zirtawpni khan Phullen ah hawpui leh a ni.

Date : 10th November (Sat):

November ni 10, chhun dar 12:00 PM khan Pu Dengkhuma Phullen chu PHC Phullen ah a thi. Pu Dengkhuma hi Pu Zikpuia puzawn a ni a, Khawlian khua a awm thin an ni a, tun hnai deuhah Phullen ah an fate Pu Zikpuia te an rawn bel a ni. A ruang hi November ni 11 khan Phullen ah vuiliam a ni.

Date : 28th November (Wed):

November ni 28, 2018 Wednesday hian Mizoram ah MLA thlan a ni a, kan khua Phullen ah pawh Polling Station pahnih Phullen-I leh Phullen-II ah thenin tluang taka vote thlak a ni a. Polling Station-I (Phullen Primary School-I) lamah hian vote 747 awmin, Vote 623 a tla a, chu chu 83.40% a ni. Tin, Polling Station-II (Phullen Primary School-II) ah hian vote 663 awmin, vote 529 a tla chu chu 79.78% a ni. Tichuan, Phullen a vote awm zawng zawng 1410 atangin Vote tla zat chu 1152 a ni a, chu chu 81.70% a ni.

Date : 11th December (Tue):

Hemi ni hian Mizoram Election 2018 Result puan a ni a, Phullen a vote tla zat hi PS-I ah Vote 623 niin PS-II ah Vote 529 a ni a, NOTA hi PS-I ah vote 1 awmin, PS-II ah Vote 3 a awm bawk a, a pum puia tla zat hi 1156 (1152+4) votes a ni ta a. MNF Candidate Pu Lalrinliana Sailo chuan Vote hmu sang berin Vote 408 a hmu a, ZPM Candidate Pu F. Rualhleia chu 2-na niin Vote 373 a hmu a, Congress candidate Pu LT Hrangchal chu 3-na niin Vote 287 a hmu a, BJP candidate Pu P Sanghmingthanga chuan hnung dawlin vote 80 a hmu thung a ni.

Date : 24th December (Mon):

Hemi ni hian kan khua Phullen a veng pakhat Bethlehem veng chuan Advance Christmas an hmang a. Tun hma deuh (1986 vel) a Mizo ten Krismas kan hman ṭhin danin, chhungkhat nu ten Thlangraah chaw chhipchhuan khawmin, hlim takin tualzawlah ruai an kilho.

Date : 25th December (Tue):

Hemi ni hi Krismas a ni a, khawtlang mipui ten mahni lawina Kohhran ṭheuhah Krismas lawmna hun hman a ni.

Date : 26th & 27th December (Wed,Thu):

Hemi ni hian Phullen khawtlang a Kohhran hrang hrang ten mahni lawina Kohhran Biak In ah ṭheuh Krismas lawmna ruai hlim takin an kilho.

Date : 28th December (Fri):

Hemi zan hian Phullen Community Hall ah kum 2019 chhunga Phullen Branch YMA hruautu tur thlan a ni a, YMA member kalkhawm ten, heng a hnuai amite hi an thlang chhuak:

1. President : Pu R. Lalthantluanga
2. Vice President : Pu J. Pachhunga
3. Secretary : Tv T. Lalthangzika
4. Asst. Secy : Pu Lalruatsanga Pautu
5. Treasurer : Pu Lalramthara Hnamte
6. Fin. Secy : Pu Zoramhmangaiha

Date : 29th December (Sat):

Ni 29.12.2018 Saturday khan Phullen Students' Union, Aizawl chuan Tuivai ah Assembly cum Infuihtharna hun a hmang a. Kum 2019 atana PSUA hruaitu tur thlan nghal a ni a, hruaitu tura thlan chhuahte chu hengte hi an ni-

1. President  : Tv. K.Lalrinhlua
2. Vice President  : Tv. P.B Lalhriatpuia
3. Secretary  : Tv. Lalnunsanga
4. Asst. Secretary :  Tv. C.Lalrinsanga
5. Treasurer  : Nl. Linda K.Lalengmawii
6. Fin. Secretary  : Nl. Biakhlupuii

Date : 31st  December (Mon):

Ni 31.12.2018 Monday hian Phullen New Khandaih veng a cheng Pu Zakhuma, kum 74 chu Aizawl Civil Hospital ah Stroke vangin a thi a, a ruang hi Phullenah phurh haw a lumenpui a ni.

Buatsaihtu

Buata Bawihtlung

****************************