ZU DUH HOTE PAWH I HARH ANG U
Zu zalenna ram, zu vanga khaw tin, chhungtin deuhthaw kan rum mekna ramah 'ZU TEL LO KHUA' (Dry Village) ni tura ṭan kan han khawh ngam tlat bik mai hi Phullen khaw danglam bikna a ni satliah lo, chung lam aṭanga 'tih-enna' vang a ni. Kan hmalakna lah hi thu mai a ni lo va, a tak ngeia thawkin kan hlen mek a ni a, hetiang hi khaw dang pa awm ve ta se chibai ṭhelh chi a ni lo vang.
Phullen khua hmangaih lotu, khawtlang nun chhiatna tur leh a nawm lohna tur duhtu hi he khuaah hian kan chen ka ring lo. Phullen khua hi khaw nuam tak leh hmingṭha taka siam zel turin Ainawn pain a zu siam a sim phawt a ṭul a ni lo va, Phullen tui liakte zinga zu in duh mite ngei hian harh thar ve kan mamawh zawkin ka hre tlat. Chuvangin, zu in mite lam i han hawi ve teh ang.
Milan khaw Bishop St.Ambrose-a khan, "Rome khawpuia i chen chuan Rome ho tih dan chu zui ve mai rawh" (When in Rome, do as the Romans do) tih thu lar tak a sawi a. Zu do khuaa i chen chuan zu chu duh lo ve mai la, i nun a zalen ang a, i buaina tam tak chinfel a ni ang a, tlangrel leh mualphona i pumpelh daih ang a, i sum thawhchhuah chu chhiatpui lovin i ṭhatpui tawh ang a, chhungkua in hlim tlang bawk ang; a bonus-ah hriselna leh dam reina nen! Chumi chang tur chuan thil pakhat chiah a tawk - 'zu duh loh' chiah!
Tun hmaa veng hmingchhe tak, Aizawl Tuikual vengin an veng thianghlim nana hma an lak tak tak lai khan a eptu mi engemawzat kha an awm ve a, mahse ep hneh chi ni hek lo, Rangvamual leh Phunchawng velah an pem thla ta diak a. Chutiang deuh chuan Dry Village hmalakna nen hian in lo inep laklawh ve mai ange, i khaw neih chhunah hian nuam ti leh thlamuang taka i chen kan duhsak vek che a nia. Chuvangin i ṭanna lam thlak a ngai em, lo inbih chiang teh. Khawthlang pa pakhat chu a nupui nen an inhau bur bur mai a, an ṭhenawmte chu va ṭhelh tumin an va lut a, an lo hlim dun leh em em tawh mai si a! "In inhau bur bur khan kan hre si a...?!" an han tih chuan chu pa chuan zangkhai fe hian "A, kan nu lamah hian ka lo ṭang leh hman tawh alawm mawle" a lo ti sam et mai a!! Nang pawh, dry village hmalakna te, JPC te hi i lo ep ṭhin a nih chuan an lamah ṭang thut teh, zu in a pek theih aia hlimna duhawm zawk i chhar ngei ang.
Zu duh tlatte hi mihring pangngai tho kan ni vek. Laih chhuah kan ni bik lo va, siam sual palh pawh kan ni bik hek lo. Lal Isua thisen zara nun thar pek tawhte vek kan ni; mahse chu nun thar thiltihtheihna chu kan hmang chhuak ve thiam rih lo a ni mai. Hmangaihna nena i tana ṭawngṭai ṭhin Kohhranhote an awm a, an zingah tel tam la, i sal tanna phuar phelh tura ṭanpuina i dawn ngei ka beiseipui che. Mizote hian zu hi 'ruih atan' ngei kan in; kan uanpui mai mai lai hian 'zu ruih' hi rin aiin chung lam khian a ngai serious a nia; "...zu ruih hmangten Pathian ram an luah lo vang" (I Kor.6:10) a ti hmiah mai. Pathian ram leh Setana ram inkarah ram awl a awm si lo va, zu mai mai vanga chatuan Hremhmuna thlah liam atan chuan i uiawm a nia.
Mifing hmingthang Seneca chuan "Zu ruih hi mahni duhthu ngeia mi â nihna a ni", tiin a sawi a. Joseph Penn-a pawhin "Zu rui chu mihring ena en chi a ni lo va, ramsa nen inang chiah an ni"* tiin a sawi hial a. Thufing pakhat phei chuan "Mihringin a taksaah zu a thun luh chuan finna chu a pawnah a chhuak daih ṭhin", tiin a sawi bawk. Chutiang dinmun chhe tak chu i luah fo lohna tur leh nang leh i chhungte nunkhaw nawm nan te, i thlarau chhandama a awm ngei nan te i hmelma - ZU hi lo duh lo ve tawh teh. Zu hian a hmangaih lo che a, a tichhe mek zawk che a ni; lo hmangaih bik tawh lo teh le. Tichuan, i mualpho ṭhinna leh i chep em em ṭhinna khua, i khua ngei - Phullen hi khaw nuam a ni tih i hre thar leh dawn alawm.
......................................
Comments
Post a Comment