Phullen Welfare Zaikhawm 2017

A hmun: Pi Lalenghluni In, Zarkawt

A hun : Ni 10.11.2017 Zirtawp zan

Ni 10.11.2017 Zirtawp zan dar 6:00 PM khan Pi Lalenghluni In Zarkawt ah Phullen Welfare te huaihawtin Krismas hla sa a zai ho a ni.  He hun hi Pi Lalenghluni sawmna anga huaihawt a ni a, zanriah tui tak eiho nghal a ni. Programme duan lawk vak a awm lo a, zaiho a nih bakah, mi thenkhatin mahni rilru a thu awmte an sawi bawk.

He hun hi Pu Lalrammawia Chairman PWC chuan a kaihhruai a. Pu C Lalbiakliana (MPS Rtd), Saron chuan Pathian hnenah tawngtaiin zaihona bul a tan a. Pu Lallawmthanga Ramthar, Aw tha leh zaithiam em em mai chuan Guitar a perh a, khawchhuak pa fel Pu C Lalbiakliana (MPS Retd) chuan Khuang a vua a. A hnuah Pu B Lalrimawia (Mta)  Aizawl venglai leh Pu H. Hmingthangbika (Ex VC Phullen),  Khatla te chuan Khuang leh Guitar an inchan chhawk a, zai hruai an thiam bawk a, kan zai tui ngei mai.

He hunah hian Phullen khawchhuak mi fel leh ropui tak tak, rampum huap pawha mi challang leh mi bik tling pha – Prof JV Hluna te, Lt Col Clement Lalhmingthanga te, Pu V Lalfala IFS, Pu C. Lalbiakliana MPS Rtd te nupa te, Pu Lalbiakdanga (Bda) te, Pu LT Kima Fanai te, Pu Lalrammawia te leh Pi Enghluni ten min ho a. Anni ho hi, an namai loh zia chu a belchiang peih apiangin an hria ang. An chanchin theuh te sawi thui deuh a chak awm ngei mai. An kianga kan awm ve thei ringawt pawh kha inchhuanna tham a ni tak zet.

Zai tan tak tak hma leh zai karlakah kan mi chhuanvawrte atang hian thusawi tangkai leh ngaihnawm tak tak ngaihthlak a ni a. Phullen in IFS kan neih chhun Pu V Lalfala chuan, Phullen chu khaw vel leh taima kan nih thu te leh thangtharte chu zirna uar tura a fuihna thute a sawi a. Pu Lallawmthanga chuan kan nu leh pa ten zai dawh takin hma la se Thanglailung welfare lo ding ve pawh hi Phullen welfare ah inchhun luh a harsat loh a rin thu a sawi a. Phullen pa lar ber leh tawng sak ber tih ngam Prof JV Hluna, State BJP President, pa inngaitlawm leh hawihhawm tak chuan hun chep lutuk karah khawchhuak te thlahlel a a lo tel thu te, zai lama kan mi chhuan vawr Pu Sangliana te a ngaih thute a sawi a. Remchang hmasa ah rimawi chikim nen zaiho leh ngei a duh thu a sawi bawk.

Kalkhawm zinga upa Pu C. Lalbiakliana MPS Rtd chuan zai hi Pathian fakna a nih thu leh fuihna thu tha tak a sawi a. An thian ho hming Prof JV-a, Pu Rosangliana, Pu Biakhluna, Pu Khuanga, Rev Chanchinmawia, Dr C Lalrawna etc te hnuah hian Pu Lt Col Lalhmingthanga, Pu V Lalfala IFS, Pu Duhtea MCS etc te an lo chhuak a. Chumi hnuah chuan Phullen mi lehkhathiam tak takte hming hi Civil Service, competition leh exam result lo chhuah chang hian chanchinbuah a lo zawn thin thu leh a van thu sawi pahin thalaite min fuih a. November ni 17 a a fanu te inneihnaah Phullen khuate kal vek turin a sawm nghal a ni.

Pu Lalrammawia Chairman PWC chuan, kalkhawmte hnenah lawmthu a sawi a. Phullen khua a ni chu a inchhuan thu leh Phullen khua amah aia u te chu mi fel tak vek tura a ngaih hmiah thu te a sawi a. Hetianga zaiho hi kan inpawhna leh inunauna tipungtu a ni a, tha a tih thu a sawi a. Ram pum huap pawh a mi lar Pi Enghluni te In a, khawchhuak hote ngampa tak leh zalen taka kan tal vel ve thei chu ropui a tih thu leh nuam a tih thu a sawi a. Heng a inphalnate hi Pathian malsawmna an dawn zelna tur a nih a rin thu a sawi a ni.

Zaikhawm dawngtu, Phullen khaw chhuak Nu ropui, Welfare tana tanpuina tam tak pe thin tu, Pathian malsawmna dawng awm renga mi harsate tana malsawmna ni thin Pi Enghlunin chaw tui tak min eitir a. Zaiho leh kan duh phawt chuan, mumal takin Mizoram a Hotel changkang ber REGENCY HOTEL Conference Hall-ah ngei, rimawi chikim nen tih leh a inhuam thu a sawi a. Chaw ei kan tih pawhin, chaw leh vawk talh tur a la neih teuh thu a sawi bawk.

Kan hlasakte kan la nawn fo chungin hla 11 (sawm pakhat) zet kan sa a, tum 16 zet kan zai hman a ni. Hla sak chhuah loh pakhat kan nei. Kan hla sak indawt dan (A tira hla 2 kan sak a hre tel ta lo) :

1. Khawvel lawm nan a lo kal a
2. Kumsul liam hnu kan nun
3. Lal pian hun lawm awm tak
4. Bethlehem mual tlaitla engah
5. Vanhnuai khuavel sakhming chhiarin
6. A mi an riang mawi Van mi a lo piang
7. Hmanah Kaisar lal lian rengpui
8. Kumpui sul a lo vei changing
9. Ngaiteh van lal fa chu
10. A mi an riang mawi
11. Bethlehem mual tlai tla engah
12. Vanhnuai khuavel sakhming chhiarin
13. A mi an riang maw
14. Kum sul liam  hnu kan nun

He zaihonaa telte chu a hnuai amite hi an ni:

1. Pi Lalenghluni            Zarkawt
2. Pu V. Lalfala            Electric veng
3. Prof JV Hluna            Sikulpuikawn
4. Lt. Col. Lalhmingthanga    Electric veng
5. Pu C. Lalbiakliana        Saron veng
6. Pi Lalchhuanthangi        Saron veng
7. Pu Lt Kima Fanai        Electric veng
8. Pu Lalbiakdanga        Ramhlun S
9. Pu Lalrammawia        Ramhlun
10. Pu Vanlalhuala        Dawrpui
11. Pu Lallawmthanga        Ramthar
12. Pu Lalhmunsanga        Ramthar
13. Pu K Lalngaihawma        Electric veng
14. Pu PL Lalhmingsanga        Dinthar
15. Pi Lalairini            Khatla
16. Pi Rebecca Lalrammuani    Ramthar
17. Pi Hminghlunpuii        Electric veng
18. Pi Helen Lalzikpuii        Ramhlun
19. Pu H. Hmingthangbika    Khatla
20. Pu Lalengzuala            Vaivakawn
21. Pu Zohmingthanga        Venglai
22. Pu B. Lalrimawia        Venglai
23. Tv PK Vanlalruata        Dawrpui
24. Pu J.Lalhmahruaia    Zonuam
25. Pu Lalbuatsaiha        Tuikhuahtlang

Kan zai tui hle a, hunin min daih ta si lo va, zan dar 9:00 PM velah kham lo takin kan tin a. Kumin chhung ngeia Zaiho leh inbeisei a ni a, a hun leh ni, ruahmanna siam chu Phullen Welfare hruaitute kutah dah a ni.

By

Buata Bawihtlung

Ni 11.11.2017 Inrinni