ZIRLAI CHHUANAWM VANLALHRIATSAKA MZU GOLD MEDALIST

(Mizoram University 2017 Gold Medalist Hriata chanchin tlem)

Mizoram University chuan June 2017 khan Degree Course Examination result a ti chhuak a. Hriat awlsam zawngin BA, B.Sc, B.Com Result a chhuak a.  University zirlai naupang, a then naupan tet atanga school tha ber ber atanga zir chhuakte, a then khawpui atanga hmanraw tha tinreng nena zirchhuakte, a then thingtlang atanga harsa taka zirchhuak te, leh mi chi hrang hrang,  Exam beitute zingah, Phullen tlangval Vanlalhriatsaka (Hriata) chu Mark hmusang ber niin GOLD Medal a dawng a, chhuanawm tak zet a ni.

Engnge Gold Medalist chu?
Engnge Gold Medalist dinhmun chu a chhuanawm viauna kan ti a ni mai thei. University hrang hrangah hian Gold Medalist an sawi dan a inang vek lo mai thei a. MZU a an kalpui dan chuan, Master Degree ah hian Gold Medalist ni tur hian Final Result ah mahni Department (entirnan – History, Botany, Pol. Science, Maths etc) a Mark hmu sang ber  (Topper) nih a ngai a.

Degree Course Examination (tuna Hriata pass na – BA, B.Sc, B.Com Exam) ah erawh chuan Gold Medalist ni tur chuan, mahni Department eg. Physics Dept, Statistic  Dept, History Dept etc a Mark hmu sang ber (Topper ) nih ngawt a tawk lo a. Department hrang hrangte inhlawm (main stream subject) - Arts ah emaw, Science ah emaw Commerce ah emaw Mark hmu sang ber nih angai thung. Master Degree ah chuan Dept khat a Topper ni te hi Gold Medal dawngtu an ni. Degree Exam ah erawh Main stream hnui Deptt hrang hrang a Topper te zinga Mark hmusang ber nih a la ngai cheu a ni.

Hriata Gold Medal a dawn theih dan:

Hriata hi Science Subject hlawm lian hnuaia Statistics Deptt a Topper a nih mai bakah, Science hnuaia Deptt hrang hrang – Zoology, Botany, Physics, Chemistry, Mathematics, Statistics etc a Topper theuhte zingah Mark hmu sang ber anih avangin GOLD MEDAL hi a dawng a ni. Master Degree a Department khat a Mark hmusang ber ten Gold Medal an dawn mai ang a nih loh avangin Degree Course a Gold Medal dawn hi a harsa zawk ti ila a dik thawkhat awm e.  Degree Course ah hi chuan Deptt hrang amite nen, an zir a inang lo chungin, in el a ngai tlat a.

Gold Medalist a ni mai lo a, University pumpui a pakhatna a ni:

University hnuaia subject hlawm lian - Arts, Commerce, Science hnuaia Gold Medalist te zingah pawh Phullen val Hriata hian Mark ala hmusang ber cheu asin.  A awmzia chu MZU hnuaia 2017 June thla Result chhuakah khan Hriata hi an Department ah pakhatna (Topper) a ni a, Dept tam tak awmna  Science pumpuiah pawh pakhatna ala ni tho a,Science, Arts leh Commerce zawng zawng zingah pawh Hriata hi PAKHATNA a la ni cheu a nih chu. Arts leh Commerce hnuaia Gold Medalist dawng ve te aiin Hriata hian Mark hmuh sang zawk a. Gold Medalist mai ni lovin, MZU pumpuiah Pakhatna a nih chu. Chuvang chuan Gold Medalist tha mi ka tih sak ngawt mai a ni.

Tunge Hriata chu?
MZU a pakhatna Gold Medal dawngtu zingah pawh pakhatna la ni pha cheu Tv Vanlalhriatsaka, Phullen tlangval hi Pi Chalthiangi fapa a ni a.  June ni 15, 199* khan Phullen ah lo piangin unau paruk (6) zinga a naupang ber a ni a. A nu Pi Chalthiangi hi Pu Khuangliana (L) fanu a ni. A nu hian Lo te neiin hna thawk pahin a enkawl a. Thingtlang nun harsatna hrang hrang hi chu a Nu Pi Chalthiangi ho hian an paltlang ve deuh vek ti ila a dik mai awm e.

Sikul leh College kal lai:
Kum 2002 ah Primary School chu Pu Zela Sikul, Phullen atangin a zir chhuak a, hetih lai hian a thiam thei lo pawl zingah a tel thin a ni awm e. Middle School chu Pu Mawitea Sikul, Phullen ah a zir chhuak leh a, a lo leikang ve hret a, an class-ah pakhatna a ni thin a.  Pawl 7 Board Exam a nih lai a ni a 2nd Division ah a pass ve nghe nghe a ni.  High School chu Govt National High School Phullen ah a zawm leh a, Pathian zarah an class-ah pakhatna a ni ta zel a. Kum 2012 khan Matric chu First Division ah a pass ta hial a, Mizo leh Science ah Letter Mark a hmu nghe nghe a. Higher Secondary chu Govt Republic Higher Secondary, Ramthar veng, Aizawl ah lutin, Science a la a. HSSLC hi kum 2014 khan First Division ah a pass leh bawk a ni.

B.Sc chu Pachhunga University College ah zawmin Statistic a la a. Kan hriat angin kumin June 2017 a Result chhuakah khan Sciences stream zirlai zawng zawng zingah a ti tha ber – GOLD MEDALIST a ni ta a. B.Sc ah hian a Mark hmuh zat percent  chu 92.83% lai a ni a, LENRUALHLUI AWARD a dawng a ni. Arts subject pumpuia Gold Medalist leh Commerce pumpuia Gold Medalist te aiin Hriata hian Mark a hmu sang zawk a, a chhuanawm tak zet a ni.

Nasa taka Lehkha zir vak thin mi a ni:

Hriata hian lehkha a thiam theih vak loh thu a sawi thin a, mahse a zir nasain a thawkrim hle tih chu a thiante pawhin an hriatpui vek a. Amah pawhin, ‘ka lehkha zir thin dan aia nasa a zir ngaihna dang hi ka hre chuang lo ti’ ngam khawpin a zir tam a ni. A zir angin mi ten zir ta se, an nih san hle a rin thu a sawi thin. College an ban veleh inah a haw a, pawn chhuak leh tawh lovin, eirawngbawl leh tul dang ti pahin lehkha a zir nghal char char a. Zana a zir thiam sate zingah a theihnghilh țhen ve leh țhin a. Pawl 12 a zirlai te khan, an Physics zirlaibu kha vawi 3 zet chu a thiam chhuak vek a ni awm e. Chu chu a hnuah a ennawn leh fe țhin a ni.

Lehkhazirna room bik a nei lo mai a ni lo, lehkha zirna Dawhkan hranpa pawh nei lo, Chawei Dawhkan a zir mai thin a ni a. Dawhkanah hian, chaw ei lai bak chu a zirlai bu hi a inpharh reng thin an ti. Zan lamah chuan zanlai dar 12 AM  atanga dar 1 AM thleng hi a zir ziah thin a. Exam dawn leh exam lai erawh chuan zan dar 10 PM velah a mu thin a ni.

Tuna B.Sc a pass thleng hian, English duh thala a thiam tawk lo chuan a zirna kawngah a thiam sawt loh phah deuh thin a, a beih nasat a ngaih zual phah thin a ni awm e. Thingtlang atanga zir chhuak, English medium a kal lo lehnghal tan phei chuan English hi a harsa hle thin tih chu kan hriat a rinawm. English ah harsatna nei lo ta se, Mark engzat nge a hmuh ang tih hi ka lo ngaihtuah fo thin. Engpawhnise, tunah chuan English pawh a thiam hle tih chu a hriat tawh a.

Duhsakna te a dawng ve thin a. Pawl 10 a pass hlim a, an zirtirtu Sir Alex-an a zir zawmna tura Admission tihna tur a tum sak te, Aizawl lama zir zawm tura Pu KK-a(an thenawm) in a buaipui nasat dante, B.Sc a zir dawn lai a a subject lak tur chungchanga, ngaihtuahna thui tak senpuitu leh kawng kawhhmuhtu Mafelte-a te chungah leh mi dang dangte chungah pawh a lawm thu a sawi fo thin. Pu KKa  chu awm lo se, a tun dinhmun a thlen theih a rin loh thu a sawi hial a ni.

A thil thlir dan hi a makin a ril khawp mai:

Lehkha zirnaah hian midang nen in teh loh tur a ni a, mite pawh an fail ve tho a lawm tihte hi inhnem nan hman loh tur a ni a, KEIMAH AH HIAN A THA BER KA THLENG EM? tih hi inngaihtuah zawk tur a ni. Tuna kan zir hi engtikah mah kan zir nawn tawh dawn lo a, tuna kan zir lai hian theih tawpin zir ila, chu chu kan tan hian a lo tha ber a ni tih chu a ngaih dan nghet tlai a ni.

College thian te Restaurant, Canteen etc ah hlim takin an inkawm a, an inhnangfak thin, chutiang hunah pawh chuan, pawisa neih loh avanga rilru hnual lovin, tuisik te hi in țeuh zeuh mai ila, kan puar ve mai a nia, tiin fiamthu titakin a sawi a, chu chuan a rilru chhungril thui tak a tilang thei awm e.

Pathian țih mi leh Nu thu awih mi a ni:

Hriata hi a Result chhuanawm tak chungchang sawipui apiangin “Pathian vang a ni” a ti zel a, ama thawhrim vena lam a sawi hnasa ngai lo. A nunah Pathian leh a Nu hi a dah pawimawh hle. Hei tak hi Hriata ropuina leh a chhuanawmna laimu ber chu niin ka hria. Nu enkawl seilen a ni a, a Nu hi a engkim a engkim a ni a. A nu hi a zah hle tih pawh a nungchang leh a tawngkam bakah a chezia atangin a hmuh theih a. Hetiang taka mahni Nute zah thiam Tlangval hi, Lehkha lo thiam lo ta pawh nise, tlangval fel chu a ni hrim hrim ang tih ka ring a, a chhuanawmin a nungchang hi a mawi tak zet a ni.

Zirlai ropui phenah Nu ropui:

Hriatan  Results tha leh chhuanawm tak a neih theihna hi Pathian vang chu a ni meuh mai, mahse chumi phena awm chu a Nu – Pi Chalthiangi hi a ni. A nu hian Hriata hi lehkha a zirtir thiam lo va, mahse a ngaih thah mai hauh lo.  Tawngtaiin Pathian hnenah a dilpui reng thin a, zanah te pawh lehkha a zir chhung chu a lo menpui ve ngar ngar thin a. Exam lai phei chuan pawnah chhuakin Hriata tan a lo tawngtai ngar ngar thin a ni an ti. Hetiang taka, tihtak zeta mahni fate ngaihven thin Nu ropui hian, fapa lehkhathiam neih hi a inhmeh hle in ka hria.

Hriatan MSc zir zawm a duh?

Hriata hian M.Sc zir zawm leh a Professor nih a duh a. Mahse chumi tur chuan, thil a awlai lutuk lo va. A subject  M.Sc Statistic hi Mizoramah a la zir theih loh leh zel bawk nen, sum leh pai a ngai nual dawn tih chu a lang reng mai a. Hmabak a la ko ve hle a ni tih chu a hriat. Mahse Pathian mi hriat leh Pathian tih mi VANLALHRIATSAKA hian Pathian malsawmna chang zelin a duh hi a ni thei ngei ang tih ka ring tlat a, duhsakna sangber ka hlan tak meuh a ni.

Thingtlang tlangval, harsatna tam tak kara khawsa ve țhin leh khawsa mek, pa enkawlpui loh a Nu enkawl seilen a ni a. Harsatna dang dangte pawh an hmachhawn ve hle ngei ang. Mahse Hriata hi mi inngaitlawm tak, mite pawi sawi hlau mi, midangte nena inteh leh khaikhin duh ngai lo, Pathian malsawmna a dawn a lungawi thiam mi a ni. Khawpuiah mihausa fate nen lehkha zir ho mahse, an incheina leh thuam changkang tak tak te chuan a tibuai ve lo a, a thawmhnaw neih tawk ang angte chu a lungawipui a. Lehkha a zir theih phawt chuan a lung hi a awi em em thin an ti.  

CHAPONA hi a duh lo tak zet tih a hriat a. Anu hian Chapo lo turin a fuih nasa hle thin a, chu chu amah ngei pawh hian a zawm hle a. BSc result a chhuah a, Pakhatna a nih pawh khan, chapo nih a hlauh em vangin, a Result chhuanawm tak chu, mi hnenah a sawi țha duh vak lo a, a Nu ngei pawh a Result kha a hrilh kim mai duh lo hial a ni.

Hetiang zirlai chhuanawm leh fel Phullen thalaite zingah an awm hi, khawtlang tan pawh a hluin a chhuanawm tak zet a ni.

Hriata chanchin hi min zawt fo a, lo ziak teh tia message min thawn pawh ka dawng a.  Amah Hriata hian Chapo nih a hlauh avangin a chanchin hi Social Media a tarlan a duh chiah lo thung a. A chanchin pawh hi "Pathian vang a ni e" tih bakin a sawi tha duh vak lo. Chuvangin amah hrechiang leh a thiante ka zawt a, ama insawina lam ni lovin, a chanchin kan va hriatpui chin, phuah belh leh infakmawi chawpna tel lo a ni bawk a, a pawi lo tur chin a ngaih ka rawn dah chhuak e

Buata Bawihtlung