MHIP DAY 2017 PHULLEN AH ROPUI TAKA HMAN A NI

Ni 6 July, 2017 Thursday hi MHIP din champha a ni a, MHIP Day a hmangin MHIP chuan a lawm thin a ni. He ni hi MHIP Phullen Branch pawhin Phullen Community Hall-ah ropui takin a hmangin nilenga hun hman a ni a. He hunah hian Pi B. Malsawmtluangi MCS, BDO Phullen chu Khuallian (Chief Guest) a ni a. He Day lawmnaah hian tualchhung mi pawimawh tak tak – Pu B. Lalhriatpuia VCP te, Pu J.Pachhunga President YMA Branch etc te leh mi pawimawh tak tak bakah MHIP members thahnem tak an kal khawm a ni.

Pi Lalneihsangi - President MHIP Phullen Br - MHIP Day 2017 @ Phullen

MHIP Day lawmna hi hun hnih, chawhma leh chawhnu – 1^st Session leh 2^nd Session a thenin hman a ni a.

First Session (Chawhma)–

He hun hi Pi Lalneihsangi President, MHIP Phullen Branch chuan a kaihruai a, chawhma dar 10:20 AM ah tan a ni. Tanna hla atan - Kan Pathianin min hruai zel thin (KHB No.23) chu sak ho a nih hnuah, Pi Lalkhawngaihthangi chuan Hunserh a hmang a, Bible chang chhiarin Pathian hnena inhlanna leh tawngtaina hun a hmang a.

He inkhawmah hian MHIP member kum 2015 MHIP Day hnua chatuan ram pan tate pualin Sunna hun hman a ni a. MHIP Zaipawl ten thiam takin L.Kamlova hla ‘Lung min len ka thlir ning dawn lo’ tih hla chu Sunna hla atan an sa a. He hla an sak lai hian, members kalkhawm te thinlung takin an member pui chatuan ram pantate chu an lo sun pui a ni.

MHIP Zaipawl - MHIP Day 2017 @ Phullen

Sunna hla, chang khat -

Ka tahlai zanthim a ral ang,
Jordan luiral ah sawn;
Aw ka ngaih ka lawmna ber te,
An lenna ramah khian.

Pi B. Lalnunhlimi Secretary MHIP Phullen Branch hnen atangin MHIP hmalakna leh tul dang hran hrang Reports ngaihthlak a nih bakah Finance report ngaihthlak a ni bawk a. Tin Pi Lalduhveli, Committee member MHIP Phullen Branch chuan, kalkhawm mipui hmaah MHIP General Headquarters President Thuchah a chhiar chhuak bawk a ni.

Chief Guest Pi B.Malsawmtluangi - MHIP Day 2017 @ Phullen

Chief Guest Pi B. Malsawmtluangi - MHIP Day 2017 @ Phullen

Chief Guest Pi B.Malsawmtluangi MCS, BDO Phullen - MHIP Day 2017 @ Phullen

He MHIP Day lawmna a Khuallian Pi B. Malsawmtluangi BDO Phullen, chuan thu tha leh ngaihnawm tak tak, hlimawm takin a sawi a. MHIP Day lawmna a a tel vawi khatna a nih thute, hetianga khawtlang huap hun pawimawh hrang hrangah tel tura sawm a ni thin chu lawmawm a tih thu te, Phullen khawtlang chu hetiang lamah hian a inzirna leh a tawnhriat hmasa neihna a nih thin avanga theihnghilh tawh loh tur thute a sawi a ni. MHIP chuan nu te chauh a lo huam lo va, tleirawl leh nulate pawh a huam vek a ni tih a hriat thar leh thute sawiin, MHIP chu duhsakna a hlan a. Chief Guest Pi B. Malsawmtluangi hi MHIP Phullen Branch chuan, Parthi awrh tir bakah Tawlhloh puan an bah tir bawk a ni.

Pu B.Lalhriatpuia, VCP Phullen - MHIP Day 2017 @ Phullen

Khawtlang huap a mi pawimawh Pu B. Lalhriatpuia Village Council President pawhin thu tha tak sawiin, Phullen khawtlang tana Village Council hmalakna hrang hrangte leh an hmachhawpte a sawi bakah, khawtlang hmasawn nan hmeichhia ten tangkaina nasa tak an neih thute a sawi a. Pu J.Pachhunga President YMA pawhin MHIP te chu thlalai zawkte pawhin tluk lohna tam tak an neih thute a sawi rualin, naupang enkawl chungchanga nute mawhphurhna lamțe, chhiat țhat chungchanga hma kan sawnna tur kawng hrang hrang te sawiin, chumi atana MHIP pawimawh zia a sawi bawk a.

Pu J.Pachhunga President, YMA Phullen Br - MHIP Day 2017 @ Phullen

MHIP Phullen Branch President hlui Pi H.Lalsawmliani, tuna Tuivai Group MHIP President ni mek leh Village Council Phullen Treasurer ni mek bawk chuan thu tha tak a sawi bawk a. MHIP kumpuan thupui - Hmeichhia leh Naupangte himna tur leh hmasawnna tura nasa taka tan lak tih chu thiam takin a sawi zau a. Hmeichhiate chu tanrual a tul thute, hmasawn zel tur an nih thute leh naupangte himna leh hmasawnna tura theih tawp chhuah zel a tul thu a sawi a ni.

Pi H. Lalsawmliani - President MHIP Tuivai Gr & Treasurer VC Phullen

He inkhawm – First Session ah hian zaithiam tak tak an zai a. Nl Marina Zohmingthangi chuan C.Luri hla “Malsawmna bul” chu thiam takin a sa a. Nl Lalruatzeli chuan MHIP Day nena in rem takin “MHIP Hla” leh “German rallian” chu thiam takin a sa bawk a. Nl Lalremruati chuan Mizo hmeichhe ropui chanchin hla “Ropuiliani” chu thiam takin a sa a, Pu Lalhmuchhuaka pawhin thiam takin “Aw ring mai la, pan mai la” tih hla hmangin kalkhawmte a awi bawk.

Second Session (Chawhnu)-

Chawhnu lam inkhawm hi Pi Zoramengi Vice President MHIP Phullen Branch chuan a kaihruai a. Hlimawm taka hun hman a ni a. He inkhawmah hian MHIP Member kum upate pualin thilpek siam a ni a, Pi Ramengmawii chuan kaihruaiin, MHIP Phullen Branch chuan kum 70 chin chunglamte chu thilpek tha tak an pe vek a ni.

He hun a “Variety Show leh Pawhfuh” Pi Lalramdiki leh Pi Lalnunthiangi te huaihawt chuan lawm a hlawh hle a. Pawhfuh hi MHIP sum tuakna atana ruahman a ni a. Chief Guest Pi B. Malsawmtluangi BDO Phullen chu pawh hmasak ber tir a ni a, ani hian Rs 3000 Pheikhawk siai a pawt fuh a, kut beng leh au thawm a ring hle. Tin, Pi Hannah-i chuan Rs 500/- in Puanzar chehbehna panga vel a pawt fuh bawk a, host pahnih ten an fiam zui bawk nen, mipui an nui nasa hle a. He hun hi a huaihawttuten an thiam bawk a, kalkhawm mipuite an hlimpui tak zet a ni.

Chawhnu inkhawm (2^nd Session) ah hian zaithiam tak takte an zai leh a. Nl Marina Zohmingthangi chuan ‘Nun thar min pet u’ tih hle sain kalkhawmte a awi a. Pu Lalhmuchhuaka chuan ruatfela hla chu thiam takin a sa a. Nl Lalremruati pawhin “Pawnto hla” hmangin kalkhawmte a awi bawk a ni.

MHIP Day hmangtur hian Community Hall khatin an kalkhawm a. Khaw tha leh boruak nuam tak hnuaiah hlim takin hun an hmang ho a. Pi Ramengmawii chuan Lawmthu (Vote of Thanks) a sawi hnuah Hall chhung programme chu zawh fel a ni a.

MHIP Day hmangtu zawng zawngte hian MHIP Day lawmna chawhlui – Phullen Sawhchiar tui tak an ei ho nghal a ni.