PHULLEN KHAWTLANGIN KUM 2017 LO TUR THLANG

Ni 21.10.2016 Friday khan kan khawtlang (Phullen) chuan kum 2017 chhunga  Thlawhhma / Lo tur ram a theh a, khawtlang mipui chhungkaw tam takin an Lo tur an thlang. Kum 2017 Lo atan hian Zawngin kawng - Thirhlum leh Pumphir, Khuangsuih tlang tel lovin, Tuiphei hualin a ni an Tin, Zawngin kawngthlang Chhuah lamah Hauhuk tui atanga In lam, mimal ram awmna chin a ni.

Pic: Mizo Lo : Buh hmun 

Kum 2017 atana lo tur thlanna tur hian Lo number pawh hmasak a ni a. Hemi ni zing dar 6:00AM ah Lo nei tur ten Lo number an pawt a. Lo number hi 1-108 thleng siam a ni a, kan khawtlang a Lo neimi chhungkaw tam takin Lo Number hi an pawt a ni.

Kum 2017 Lo tur thlan na a Phullen khawtlang mipui Lo number pawttute zingah Number langdar deuh pawttute chu -

 No 1-na pawttu : Pi Nuzawni
 No 208-na pawttu: Pu Biaksailova

Zingkara Lo number an pawh zawh hnuah, Chhun lamah awmni khamin Lo hi an thlang leh a ni.

Lo thlan naah hian Lo number indawt danin an Lo tur an thlang a. Lo Number tlem tlem khan an thlang hmasa thin. Kum thara Lo neih tum mithenkhat an Lo number pawh a hnun deuh avanga an Lo tur la tichiang mai thei lo pawh an awm ve zeuh zeuh bawk. Hei hi tih dan thin tho a ni a, Ri siam fel hunah mi kara ram awl, mi bang an lo chang thin.

Ram threh a nih hian, chhungkaw thenkhat chuan Ram theh leh Lo thlan lam buaipuitu - khawtlang hruaitute hnenah pawisa an pe a, ramtheh huamchhunga an ram duhlai tak kha kum khat Lo atan an lei thin. Hetianga Lo tur leitute hian mipui nawlpui, Lo number pawttute aiin an Lo tur an thlang hmasa thin. Pawisa pe a Lo leitu hi mi pakhat aia tam an awm chuan, pawisa an pek tam dan indawtin Lo an thlang hmasa thin a ni.

Hetianga Lo thlan ni a, an thlan hmasak nan a pawisa Lo lei thintute pawisa hmang hian Lo thlangtuho - (Pa ho) chuanLo thlan ni hian ruai an threh thrin a ni. Hlim takin hun an hmang thin. Mi thenkhat chuan fiamthuin 'Paho Day' te an tihsak fiam thin. Kumin pawh hian Vawk talhin Lo thlangtuten ruai an theh leh a ni.  

Kumin Lo thlan ni a Lo tlang hmasa tura pawisa thawhtute chu:

1. Pu Vanlalfela           -   Rs 12,600/-
2. Upa Laltharzela       -   Rs 20,400/-
3. Pu V Lianzama.       -   Rs 14,400/-
4. Pu B Lalnuntluanga -  Rs 9,400/-
     Total.     -                      Rs 56,800/-

Khawtlang hruaitu VC te chuan thuchhuah siamin, kum 2017 atana lo thlangtu zawng zawng ten, a rang thei anga ri sah fel nghal vat turin khawtlang mipuite a hriattir a. Lo thlang hmasatu nih vanga ri sahfel loha dah reng te hi midang tan a buaithlak thei a, chuvangin ri hi sahfel vat tur a ni. 

Tin, fehkawng pawh a huhova rih tur a ni a. Lo neitu zawng zawngte intawm a ni a, Lo nei tur kan nih chuan, fehkawng rihnaah hian tumah awl mai bik lovin, thawhchhuah theuh tur a ni.