Pu Zela Sikul a kan kal lai

Kan naupang ve lai chuan Phullen Primary School II (Pu Zela Sikul) ah ka kal thin a. Kekawr bul chuar khing tlat, a thar lai chuan a Pawl leh Kawr sen kha kan ha thin a. Sikul Dar a lo ri val val a, Parade tur kan tia hmanhmawh tak, buai nuaih si in Sikul kawt zawlah chuan kan tlan khawm nuaih nuaih a. Kan Head Teacher Pu Zela a rawn kal a, a ho khan hlim tak khan kan Parade thin a. Parade tih kha a lar bawk a niang Valruata (of Pu Neihtawna) pawh kha a hming tak niloin, rei fe chu Parade ti khan koh a ni nghe nghe.

ZUN LEH EK LAM : Primary kan kal tan tirh kha chuan Sikul ah te khan Ekin te kha Septic Tank, Indian type,  Europian type ek e bal e, Lei laihkhuar chunga thingphela khuh satliah bak kha awm ve mumal hek suh,  Mahni In lamah pawh Pit Latrine chhe ve tak bak inthiarna nei kan awm meuh lo, neilo pawh an awm nual ta ve ang. Sikul ah pawh khatiang kha kan nei a. Mahse zirlai naupang te tan chuan Hmuna te kawmchhak Hampuar tlang kha kan ek na a ni deuh ber a. Dar a rik bawk si chuan a buaithlak ve thin khawp mai. Tum khat pawh thianpa Chhuanliana kha alo insum zo lo pek a!  Sikul compound sir deuh a Kawlhai kung phenah khan a lo dah teuh mai a. Kan Head khan ava hmu a, kut thlak a in hrem rual kan la ni meuh si lo. Mahse hremloha chhuah chi a ni lo; Case lian ve tak a ni lawi si a. A tawpah chuan Class room tinah khan a rawn kalpui a, ‘hei kan thianpa hi sawlaiah sawn a E teuh mai, tumah sikul compound ah I e tawh lo ang u’ a ti a. Kha ta tang khan hnai tak takah chuan tumah an E ta lo a in ka hria.

Kan Head Teacher ho in Thlawhtheihna kan au thin  : Kan sikul kha sikul lun ve tak a ni a. Thlawhtheihna / Helicopter a lo thlawh tawh chuan kan au chuah chuah a, kan ban phar in kan bye bye nasa thei thin hle. Helicopter a lo thlawh tawh chuan Class room a kan awm lai pawh ni se, tlanchhuah in dil buai chi a ni lo. A thlawh liam hma a chhuah vat a, ‘bye bye, sweet min rawn hawn rawh aw’ tih kha kan sawi hman ngei a ngaih thin. Helicopter ri kha class room atanga chhuah phalna Permit a ni tawp.

CRP/ASSAM RIFFLE leh kan Sikul : Kan khua Phullen ah khan Vai sipai (CRP, a hnuah Assam Riffle) an awm a. Vai sipai Lal te an lo kal chang hian Helicopter hi Lungpui chawlhhmun, Suply thlak tlang kan tih mai ah khan an rawn tum thin a. Helicopter a rawn tum tawh chuan kan sikul atang khan hla deuh mahse, chhungte rawn zin haw an awm ve ang hrimin kan thleng ve thuai thin. Vai Sipai Lal te khan min lo hmuak rawh u ti lo mahse, kan Head Teacher ho khan kan lo hmuak ve tawp zel a. CRP/Assam Riffle ( kha tih lai khan VAI kan ti mai) te pawh khan nuam an ti ve hle a. Kan lo hmuah thin avanga Lawmthu sawinan Volley ball leh a Net te, Football te kha kan Sikul tan an rawn kenga, kan Head Teacher khan a lo dawngsawng thin a, kan hlim theih thin zia te kha aw. Kan Head Teacher Pu Zela chungah pawh khan an lawm ve hle a, thiantha leh thawhpui thatak ang khan an in en ve in ka hria.

Tun hnua ka ngaihtuah leh hian khatih lai a kan Head Teacher (Pu Laltharzela) min kaih hruai dan kha ka fak thin. A felin, naupang min kilkawi kha a thiam em em a. Naupang ten kan lawm leh hmuh duh em em Helicopter rawn Tum chang te khan pawn chhuah min phalsak lo ta se, kan rilru pawn lama awm si in lehkha kan zir anga, kan thiam chuang in ka ring lo. Mahse  khatiang hunah khan amah khan min ho zel thin a. Helicopter khan min rawn thlawh khum ringawt pawhin a ho khan tual zawlah kan au dar dar thin a nih kha.

Vai sipai ho ei tur, Thlawhtheihna atangin an rawn thlak a. Naupang ho khan kan lo buaipui ve nasa hle thin. Eitur te kha a tla keh ve fo a, kan lo chhar ve thin. Giu (Ghee) leh Tel (Oil) an rawn thlak keh chang te kha chuan naupang ho kha kan mawm haw hlap thin a nih kha.

Game Ni : Kar tin Zirtawpni chawhnu ah emaw hian infiamna lam – Football te kha kan ti ve thin a, chu ni chu ‘Game Ni’ kan ti thin. Kan field neih that Kulhkawn emaw Supply thlak tlang emaw ah khan kan Game thin a, kan hlim thei thin kher mai. Game turin chawhma ban veleh Inah kan haw sap sap a, Chawthing lian lerh lawrh kha chi nen kan chawi chhuak a, Arpui no hruai ten kan chawmal thlauh changing min zui duah duah a, phur takin Game turin kan kal leh thin. Kan Game naah chuan hmeichhia ten bottle phek te lam deuh hian Tuithak an rawn keng thin a. Tui ah chi leh Hmarcha an pawlh a, chu chu tui ti takin an in a. Mipa ho khan an phal mang lo chung insak kha kan han tum vel thin kha a nia, nuam ve nak nak tak a ni. Kha tih lai khan Tuithak  kha tunlaia Cold drink te ai hian a hlu lo bik lem lo in ka hria.

Game naah chuan Football pet kha a ni deuh ber a. Kan vaia tel kim theih nan tiin Mipa lian leh Mipa te ah mipa ho kha min then a. Mipa lian kha Team hnih ah an thena, an in khel a. A hnuah Mipa te leh Hmeichhe lian te an inkhel ve leh thin.

INHREMNA : Naupang mah ni ila, thu kan awih vek biklo, hrem kan ngai ngun ve hle thin. Home work ti lovin sikul kan kal a. Kei phei chu In lamah thenawm Ma-awmi leh Ma-puii te (a nuin a zirpui thlap zel), Lungmuana Ralte u te tihlaiin an inah awm ve reng mahila, ka ti ve nghal mai lem si lo. Sikul thlen veleh kan Home work copy na ber ni thin J Hruaisanga tihsa kan copy hman bawk silo. Hrem kan hmabak ta thin a.  Khatih laia kan Head Teacher min hrem dan mawlh mai kha theih nghilh a har ka ti thin.. Thiamloh emaw Home work tihloh emaw kan neih chuan Jail-ah min dah thin a. Jail tan chhung kha rei vak lem lo mahse kan hreh ve em em thin. Kha Jail atanga kan chhuah rual rual khan kan Case kha a lian emaw a tee maw, nuai reh nghal vek a ni a, a hnuah Case kan nei zui tawh lem lo. A tang ngun pawl ka ni ve in ka hria. Hmeichhia leh mipa kan nih chuan, palai engmah tir buai lem loin, min Inneih  tir thin. Tuman an sawi buai thei lo. A lem a Innei mah ni ila kan zak ve hle thin.  Kei pawh khatih lai khan eng vang ber in nge ka hre tawh lo na a, nupui ka nei ve tawh ngat; kan harh ve bawk em a ni!

Naupang ho kha enkawl har ve tak tak kan tam ve a, kan Class ah khan Keimah bakah, Lalawmi (Lalthlamuana nau) te, Aldrini te, Rotlinga te, U Dinpuii te, Hmingsanga te kha thiam thei vak lo pawl kan ni ta in ka hria.

Tum khat pawh Lalawmi kha a thiam theilo leh inthlahdah lutuk ve bawk si khan kan Head Teacher a ti thinrim ta viau mai a. Kan Head chu a hmelah pawh a thinrim a ni tih hriat theih kawpin a langchhuak hial a, a ngawi hmak mai a. A hrem dan tur a ngaih tuah a ni ngei ang. A rawn tawngchhuak leh chuan Lalawmi chu a ko chhuak ta, eng tin danga hrem ta lo chuan naupang ho hma ah chuan a lam pui ta a. A vaw hrep dawn emaw tih nak lain naupang ho leh Lalawmi pawh chu a hrilh hai ta phian zawk a. (Tun hnu a amah kan Head sawi leh danin ‘ka thin a rim ve tak tak a, ka vuak emaw ka hrem emaw chuan a na dawn lutuk in ka hria a, ka in ngaihtuah harh hman hlauh a,, a a.. lampui zawkila ka ti a, ka lampui ta a nih kha’ a ti. Naupang zirtirtu ni awm reng a lo ni e, Tunlai a Zirtirtu tha chawimawina dawng ho ai hian ka dah hniam bik lo)

A hunlai khan hreh ve viau thin mah ila min hrem thin dan kha a lo tha phian mai. Min hrem dan kha theihnghilh har viau mahse, thinrim zawng nilo, a hlimawm zawngin ka hre reng thin.  Naupang mai kan ni a, kut thlak rual kan la ni chiah si lo; kut thlak theih chu kan ni ve tawh tho. Na taka kut inthlak ai kha chuan a lo tha zawk phian mai.

Result puan leh Awards: Kan sikul ah khan a thiam thei deuh leh thiam thei lo deuh kana wm ve nual a. A thiam thei lo lam pawl ka ni, Vawikhat 3na ka nih kha ka tawn san ber a ni. Kan zirtirtu te khan Result puan rual khan Lawmman an sem thin a. Class tina 1-na atanga 3-na te khan lawmman an dawng thin a. Kan zirtirtu te khan an cheibawl thiam thin hle.

Lawmman an sem danglam tak mai a awm a, chu chu  Fail a pakhatna lawmman a ni a. Fail ho zingah khan 1-na khan lawmman a dawng ve thin. He Award hi keipawh vawikhat ka dawng a, Pencil min pe, a zahthlak duh thin khawp mai.  ( to be cont..)