TRAINING ON YOUTH LEADERSHIP & COMMUNITY DEVELOPMENT PHULLENAH HLAWHTLING TAKA HUAIHAWT A NI.

KAN KHUA - PHULLEN AH TRAINING ON YOUTH LEADERSHIP AND COMMUNITY DEVELOPMENT PROGRAMME HLAWHTLING TAK NEIH A NI.

Vawiin March ni 24, 2017 (Friday) khan YMA Br Phullen leh Nehru Yuva Kendra (NYK) Aizawl tangkawpin Thalai sawm bikte pualin Phullen vengthar Kohhran Complex, Phullenah Training on YOUTH LEADERSHIP & COMMUNITY DEVELOPMENT hlawhtling taka huaihawt a ni a. 

He trainingah hian Pi B. Malsawmtluangi MCS, BDO Phullen chu Khuallian (Chief Guest) niin a telpui a. Chawhma dar 10:05 AM ah Chief Guest hian Training hi a hawng a. Chief Guest hian NYK tobul leh a tangkainate a sawi bakah thalaite chu kan khawtlang huam chin a duhtawk mai lovin, kan khawtlang bak, ram pawn thleng a daidar a, hma an sawn zel theihnan fuihna thu tha tak a sawi a ni. Training hawnna inkhawm hi Pu J. Pachhunga, President - Branch YMA chuan a kaihruai a ni.

He training hi hlawhtling taka kalpui a nih theih nan, uluk tak leh mumal takin ruahmanna siam leh kalpui a ni a. Thalaite tana hmasawnna tur kawngte, khua leh tui tha, khawtlang tana mi tangkai tak kan nih theihna tur a thalaite mawhphurhnate, khawtlang nuam tak kan din zel theihna tura thalaite mawhphurhnate, thupui hrang hrang panga (5) ah siamin zirho a ni a.  Chung thupui te chu, a sawi tura mithiam sawm bik ten uluk takin an zirtir a ni.

Training hi Session hrang hrangah inthenin Session tinah Thupui hlan bik chu zirho zel  ni a, thupui then dan leh a sawitute chu:

Session 1

Hruaitu: Pu J.Pachhunga, President, Br. YMA

Thupui : Zirna

Sawitu : Pu F. Lalsangzuala, Br. Comtt. Member cum Teacher Govt Primary School.

Session 2

Hruaitu : Tv. T. Lalthangzika, Vice President - Branch YMA

Thupui : Dry Village hi engtin nge kan kalpui zel theih ang
Sawitu : Pu Vanzairemmawia. Br. Comtt. Member

Session3

Hruaitu : Pu Lalramthara Hnamte, Treasurer - Branch YMA

Thupui : Kut hnathawh
Sawitu : Pu J. Pachhunga,  President - Branch YMA

Session 4

Hruaitu : Pu Zoramhmangaiha, Fin. Secretary - Branch YMA
Thupui : Tualzal nun
Sawitu : Pu K.C. Zahmingthanga, Ex President Br YMA.

Session 5

Hruaitu : Pu Lalhruaikima Tochhawng, Asst. Secretary - Branch YMA
Thupui : Nungcha humhalh
Sawitu : Pu R. Lalthantluanga, Br. Comtt. Member.

Training na a telte hi Group thumah inthenin thupui thlante hmangin Group Discussion neih zel a ni a. Thupui thlan pangate sawi zawh a nih hnuah thupui zir zawng zawngte sawihona ‘Open Group Discussion’ neih chhunzawm leh a ni bawk a. Group tin ten Group a an sawihona (discussion report) chu trainingah hian an report thin bawk a ni.

Tlaiah Training kharna hun (Valedictory Function) hman a ni a. He hunah hian Pu B.Lalhriatpuia VCP Phullen chu Khuallian niin he hun hi a hmanpui a. Training kharna inkhawm a Khuallian (Chief Guest) Pu Hriata chuan, hmasawn tur chuan inthlakdanglam (change) a ngai thin a. Thalai kan ni emaw,mimal leh khawtlang ang pawhin hmasawn zel tur kan ni a, chu tur chuan kan chin dan ngai reng, kan awm dan ngai reng a awm lovin, khawvel thang zel mila kan than ve a, kan danglam ve a ngai thin a ni tiin mipui kalkhawm chu a chah bawk a ni. Training Kharna hun hi Pu J. Pachhunga, President - Branch YMA chuan a kaihruai a ni.

He training hi tluang tak leh hlawk taka zawh a ni a. Training huaihawttu ten uluk tak leh theihtawp chhuaha an huaihawt avangin tluang taka zawh a ni a. Training na a tel ten an hlawkpui hle niin hriat a ni.