Panlai nun

Panlai nun tak kha chu aw…

Thlasik alo in tan a ngal pawh a lo chat leh zo ta, rilruah Krismas ringot alo awm leh tawh. Mahse, rilru ala thawveng thei tak tak lo, kumtawp exam kan la hmabak miau atin ni. Ngaihtuah naah Kumtawp exam zawh huna kan awmdantur leh engtin nge Krismas kan hman ang tih ringot a awm tawh si, avan nghahlelhawm thin tak em. Panlai nun tak kha chu aw….

Kumtawp exam chu kan tan ta ngei a, Subject tawp ber kan chhan zawh hnuah answear paper kan thehlut zo, kawngka chhuahpahin ‘Ka zalen ta’ tih hla kan han sa chuak ngei a, chawmhlawm ni si khan duh duh a Lehkhabu te kha lei thei niawm takin haw kawngah kan pawt darh a kan vawr leng chum chum thin a nih kha. Chutah Uniform pawh thlak loin ke lawng ngei mai khan kan han inhnawk zui a, kan Uniform kha chhe mahse pawi kan ti tawh tlat lo

Krismas alo hnai ta takzet mai vei nei lemlo, chhungte thawhchhuahsa ringa thlamuang taka awm thin rilru ah kha chuan, krismas huna thianho a tawm khawm na tur buk sak kan han rel nghal chat a, buk sakna tur chak lakhawm turin thian hnatlang kan han ko a, eng eng emaw chu kan pu khawm ve rum mai, kum lam a la naupang ta ngiang chuan a chhuat tur laihzawl leh a ban han phun mai kha chu hnehsawh ve viau mah ila, a bang pin leh a chung chih kha kan thiam thleng lo ni tur a ni, kan thian ho phei kha chuan kumtin mai khan kan ti ve hluai thin tak na in zan lam a han tawm khawmna tur em pawh kan khawrpum awm reng reng ka hre hauh lo mai. Mahse, Khawvel sum tinreng leh lunghluin a leitheih loh hlimna nasatak kha min pe ve miau si

Kan nghahlelh em em Krismas chu alo thleng leh ta reng mai le, Urlawk zan alo ni a, rilru kha chuan tlaivar kha an tum nghal em em ringot a, thiante nen tlaivar turin kan han inzui chhuak dam dam a lenna tur kha kan hre hran lo, tin, hria pawh ni ila mi ina tawm reng kha kan peih lo hrim hrim, khawlaiah kan tei kual kan tei kual a zan alo rei deuh hnuah mei kan han chhem hluai a kan thut bial ta tiau mai thin, atir lamah kha chuan eng eng emaw sawi chuan kan hlim ve phian mahse rei kan daih ngai lo, pawilo ‘Pawngsen tlaivar’ kha chu kan ni ve hrim hrim tawh, atukah khua alo var pawn zan lam a tlaivar inti ve em em in insawitheih nan tak kan hman ve tho thin kha maw.

Krismas ni alo zo a ruaitheh ni alo thleng ta, kei ni ho zingah kha chuan Krismas aiin a Krismas zawk, tlai chaw ei tur a koh khawm kan ngai ngai lo, fatu hoin hlui khatah pasarih zel an tih kha chuan kan lo bar fe hman tawh zel, zan lama kan tur sathau dahthat nan Sahar pawh kan ken ngei thin kha..Avan lunglen thlakin a van ngaihawm si em! Panlai nun tak kha chu aw…

Hmingbulah Tlangval (Tv.) tih an han dah a kan nuih a zat deuh tlat nate ala rei loh vei nen, tunah zawng naupang tih chu kan duh ta bik hauh lo mai. Cher in thau an chak a thauin cher an chak tlat na Khawvelah hian Naupanlai a Puitlin kan lo chak ve thin na zawng zawng te kha  naupan that leh kan chak nain a luahlan zo ta. Chaicheh leh Suankual pawn sawi rik an hlawh tawh mang lohna Khawvelah, kha Panlai nun hlimawm tak min hriat tir a ataka min nunpui tir tu kha, AW…PHULLEN nang ilo ni e.

 2/8/2012