THE LAST CLASS
(Kan School, teachers leh kan classmate mual liamta te nghilh loh nan)
Naupan lai nun kha a lo ngaihawm ber mai, kan duh dan dan in kan tal a, kan duh duh kan ni a, a chang leh Sipai Lal, a chang leh doctor, a chang leh zirtirtu... engmah enghelh leh lungkham nei reng reng loin kan thawveng em em ringawt mai thin a nih kha.
Kha kum, 1988 kha kan school (Dificit) tan chuan kan kum that kum leh kum ngaihawm tak chu a ni ngei ang. Zirtirtute lah thalai sengsawng, naupangte chawhphur dan thiam leh nelawm tak tak vek an ni a. An thawhhona pawh a thain an inpawh em em vek mai. Kum bulah chuan kan kumtin danin sport nei turin kan in buatsaih leh mup mup mai a, kan Head Pu Mawitea lah naupangte rilru man tak kha a ni a, "kumin chu pakhatna kan la ngei ngei tur a ni, pakhatna kan nih chuan ruai kan theh ang" a han ti a, naupangte chuan phur takin kan theih tawpa pakhatna lak ngei tumin kan in buatsaih sauh sauh mai a ni.
Kumin sport chu Suangpuilawn in a thleng dawn a.Kan khaw school pahniha school naupang leh zirtirtu te chu mahni puantel akin suangpuilawn lam pan chuan kan chhuak ta a, Paidal kha kan karkawng zinna tlanglawn ber a ni a, hlim taka infiam leh tlan kawi zawr zawr chungin kar loah suangpuilawn dai chu kan thleng thuai mai a. School naupang leh zirtirtu ten minlo hmuakin, thle in te an sem zung zung a, nuam tan nak nak tak chu a ni e.
March pass in sport hawn a ni a, pakhatna kan la nghal, kanva phur tan tak em ! Athletic lam kan bei, rinai daihin kan che tha chho zel a, individual lamah pawh kan che tha thawkhat viau, point hmu sang fal lutuk awmlo in kan in um chho thuak thuak hlawm a, tan a na ngei mai. Kan ngaihhlut ber, Major games ti ngata kan sawi Football kan khel ta, kan tumpuite lakah kan vannei hlauh zel, goal ka veng a, ka hnung lama Suangpuilawn tleirawin (a hming thup, a zahawm tlat) chewing gum min rawn vawrh zauh te kha chu nuam ve tak ani, tuilet hnua ka tawn vawikhatna a ni tlat. Kan school din tirh a tanga a vawikhatna a tan football ah chuan kan champion hlauh mai a, a pumpuiah pawh pakhatna kan ni.
Staff a tangin Miss Athlengi leh Pu Biakchungnunga ten min ho a, chutia pakhatna kan la ta mai chu in lama kan Head Pu Mawitea a phur kher mai, zawngin ram thleng deuhthaw min rawn hmuak a, min lo chibai den den te kha a hluin kan ngai sang hle a ni. Kan head chuan football team tan ui min talh sak ta pang mai a, nuam kan ti tak zet ani. A hnuah school pumpuiin pakhatna chu ranpui talhin ruai nen kan lawm ta mup mup mai a. Best boy, R.Lalbiakliana(Fam) chawimawina parthi hlan niin, football team pawhin parthi kan dawng vek a, inchawimawina sang tak a ni.
A tawi zawngin hemi kum hi chuan kan nui bawk bawk kumtluan a ni mai e. Kum tawp lam, October thla ah class vii ho chu study camp min neih puiin school ah kan riak lut a.Lehkha zir chu nuam ti lem hlawmlo mahila, camp neih hrim hrim kha a phurawm ve a. Mut kan tintuah a,zirtirtu ten min tin san hnu kha chuan nuam tak a ni, a muhil hma hma kha an vanduai a ni mai a, thawhat tir ngei tumin ke zungkarah lungte kan zep a, hrui ten kan inthlung a, kan han inkaitho phut mai chu kan tho a nge nge zel , chumi lawm chuan kan nui khur ta char char mai thin a, teacher ten kan thawm an hriat kan hlau si, dulthuar na urh in kan nui tawh mai thin.
Exam hma chawlhkar khat vel la awmah chuan course pawh kan zir zo thawkhat tawh a, camp chhuah hun pawh a hnai ta! Devotion ah chuan mas boruakin min chim tan bawk a, "Kumpuisul a lo vei changin lunglen a tho leh thin.." tih te kan sa tuarh tuarh a. Thlasik nieng mawi tak leh zan boruak thiang tak mai te chuan lung a ti leng hle mai. Nakum lamah chuan a then high school an kal a nga, exam a fail te chuan khawhar takin he kan hlimna runpui hi khawhar takin an nghak leh bawk ang a.. ngaihtuah a thui.
Tunah chuan tumah ninhlei leh bengchheng peih pawh kan awm lo, ngui nghiaiin class ah kan thu a, zirtirtu te pawh an khawhar ve a ni ngei ang, an cool raih mai a. A hming chuahin class pawh anla tawh a ni.
Kan chhuah dawn tuk ah chuan dan pangaiin kan head Pu Mawitea chu a lo lut a, naupangten ngui raiha, "good morning sir" ti a kan lo wish zawh chuan thu turin min ti a. Ngawi renga a din vang vang hnu chuan dawhkana chalk lain a mit a khap sak sak a, black board ah chuan uluk takin "THE LAST CLASS BETWEEN YOU AND ME" tih chu mawi fahranin a ziak a. A ziah zawh chuan chhuat lam bihin a mit a tui zauh zauh chu tuman kan hmuh hmaih lo, naupang ho pawh kan insut tliar tliar a. Kumtluana kan nuih bawk bawkna leh kan hlimna runpui chu kan chhuahsan a hun ta si a, tumahin kan ti danglam thei si lo, insut loh zia a ni lo reng a ni.
Kan classmate thenkhat ten mual min liam san tawh a, a then chuan nupui pasal neiin chhungkua kan dinin hmun hrang hrangah kan awm darh ta a. Kan dam chhung hian khati ang kum ngaihawm leh nuam kha kan tawng tawh dawn lo chu a ni si."Tlang a dang lung a leng e mai, Then nan Lal remruat sa a ni.. " tih ang maiin, in then darh a tul si a. Kan thiante ho khan kha kan kum hlimawm tak te kha ngaihtuahin an lung a len ve ngei hi ka ring thin. (A sei ta hle mai)
(He thuziak hi Pu Mahminga Renthlei (Lalhmingthanga) in Phullen Group (Facebook) a a ziah atanga lak chhawn a ni. A ni hi Salvation Army ah Officer niin Mizoram pawnah rawngbawlna avangin a awm mek, mi hmingtha leh fel tak, khawtlang tana mi chhuanawm tak a ni - )
Comments
Post a Comment