A HUN LAIA PHULLEN A DAM REI BER PI THAENGI KAN CHAN TA

Pi Thaengi

Tukin chu kan khaw rohlu, Phullen kai tan tirh a tel pha ngat, kan zinga damrei leh hlu em em Pi Thaengi thih thu hriat chuan, rilru a khawih hle mai.

Pi Thaengi hi Phullen lal Pu Awksarala khawnbawl Upa Pu Dolala fanu a ni a, a nu chu Pi Darringaii (Pi Ngaii) a ni. Pi Thaengi pa Khawnbawl Upa Pu Dolala hi Pu Darhmingliana fapa a ni. Lal lal laia khawnbawl upa dinhmun hi namai lo tak a ni a, chhungkaw duhawm tak atanga lo pian a ni tih a hriat theih awm e.

Pi Thaengi hi kum 1921 khan Kawnpui awm laiin a piang tih amah hian a sawi a. Kawnpui leh Changzawl hi hmun thuhmun ang deuh a ni a. Vanphunga khua, a hnua a fapa Awksarala khua ni ta zelte kha Thanglailung awm hnuah kum 1914 khan Thirhlumah an kai a, chumi hnuah Changzawl Kawnpuiah an kai let leh a. Hetah hian a piang ta a ni awm e. Changzawl Kawnpui atanga kum 1926 a Phullen kai a nih khan, naupangte a la ni a. Phullen ah hian puak loha a kal ve theih tawh thu leh a chhang chiah Pu Thavapa, a pa hnung zuia Khawnbawl upa ni zui ta erawh kha chu, a la nau deuh a, puak a la ngaih thua amah hian a sawi thin.

An unau hi sawm pahnih an ni a, an indawt dan kan hriat theih dante chu -

1. Darmawii (L)

2. Thangawna (L) f/o Upa Thasawta

3. THAENGI w/o Vana

4. Thavapa h/o Thanliani

5. Engzuali (L) 

6. Thabuangi (L)

7. Thakhuma (L)

A pasal Pu Vana nen khan fanau malsawmna dawngin chhungkaw duhawm tak an din a. A tu leh fate thehnem takte nen a huhovin an chengkhawm thin a. Mi thenkhat chuan China chhungkua te an ti fiam a, Chhungrualte tih hi sawi dan tlang lawn tak a ni nghe nghe. Hetiang taka tu leh fate, inngeih tlang taka ho khawm thei a nihna ngawt pawh hi chhuanawm tak, mi tam tak theih loh a ni a. Ani anga nu ropui hi an vang hle ang.

Khawtlang rawngbawltu Khawnbawl Upa fanu a nih angin, a tu leh fate pawh Kohhran leh Khawtlangah mi tangkai leh chhuanawm tak takte an ni hlawm nghe nghe a. Tukin ni 23.05.2018 zing khan nat lawk em em awm lovin a tu leh fa ṭhahnem takte leh Phullen khawtlang mipuite min kalsan ta a ni. A ruang hi vawiinah Phullen ah vui liam a ni ang.

A chanchin sawi tur tam tak a awm na a, duh tawk phawt ila. Phullen nu ropui Pi Ṭhaengi chu Thlamuang taka chawl hahdam tawh turin duhsakna nen ka thlah liam e.