8-CHALFILH AC MLA 2nd INVITATION FOOTBALL RUNNING TROPHY CHAMPION LAWMNA HUN HMAN A NI

Vawiin 21.05.2018, Dar 1:00 PM khan Phullen Community Hall ah 8-Chalfilh AC MLA Invitation Football Running Trophy ni 2nd - 8th May, 2018 chhunga khelh taka Champion team kan khaw GSA Team te pualin lawmna hun hman a ni.

He hun hi Organising chairman Pu B. Lalhriatpuia VCP Phullen chuan a kaihruai a. Upa Lallawmsanga chuan Hunserh a hmang a. Kan khawtlanga mi pawimawh tak tak Pi Lalrinchhani Ralte, BDO Phullen leh Pu H.Lalhruaikima Vice President VC Phullen leh Pu J.Pachhunga President YMA Phullen Br te leh Pu Lalthangmawia GSA Sr Adviser ten thu ṭha tak tak an sawi a. Tv Lalhmingthanga Asst Secy P-GSA leh Pu Malsawmdawngkima Tochhong Champion Team Coach te hnen aṭangin Reports ngaihnawm tak ngaihthlak a ni bawk.

Thusawitu, BDO Pi Lalrinchhani chuan, infiamna (sports) leh zirna hi thil kalkawp a nih thu te, zirna lama sang na na na chu sports pawh ti se, an hniam tak tak thei lo a. Discipline ṭha nei tan lo chuan infiamnaah pawh hmun a awm tak tak theilo a. Mahni mual ṭheuh aṭanga insumna leh tumruhna nen, ZIRNA lam hlam chhiah si lovin, infiammi ten hmalam kan pan zel a ngaih thu sawiin kalkhawmte a fuih a.

Tin, VC Vice President Pu Hruaia chuan, kan khaw GSA Team te hlawhtlinna chuan khawtlanghruaitu an nihna anga VC te tih lawm thute. Phullen khawtlangin Tournament liantham kan dawn chungchanga VC ten theihtawp an chhuah dan te. Tournament chhunga khawtlang mipuiten Palyers te leh tournament kaihruaitute an tawiawm ṭhat em avanga lawmthute a sawi a. Hun lo la awm zel turah pawh players te leh khawtlang ang pawh a, hmasawn tura ṭanrual a ngaih zia leh thawhhona ṭha a pawimawh zia te a sawi a. Kan khawtlang tan, kil hrang hrang aṭanga hma lain, pawl hrang hrangte lungrual leh pheikhai rual taka ke kan pen ho zel a ṭul thu sawiin mipuite a fuih a ni.

Tin, YMA President Pu J. Pachhunga chuan, ruihtheihthil leh infiamna hi thil kalkawp thiang a nih loh zia uar takin a sawi a. Ruihhlo, Zuk leh hmuam pawizia chu amah ah ngei pawh chiang taka a lan thu sawiin, zuk leh hmuam a tih avanga a hriatnate pawhin a tawrh hle thu a sawi a. Infiammi (players) te chu ruihlo lakah fihlim a, insumtheihna nei turin ṭhahnemngai takin a fuih a ni.

GSA hruaitu hlun, GSA Sr Adviser ni mek Pu Mawitea chuan, kan khaw aiawha khel Players te chu Champion Trophy la thei tura an thawhrimna a fak a. Chutih rualin, hmân ata tawh phullen khaw tana pen chhuak ṭhin ten chawimawina sang an lo dawn ṭhin loh leh pawisa sem thawm lo ri te kha ṭhalo a tih thu a sawi a. Kan khawtlang tana thawk chhuak kan ni a,  tlawmngaih thil a nih ziate leh, chutih rual vek a, players te thawhrimna leh inpekna hi mipui ten kan lo phurpui a, hmasawn zel tura fuihtu kan nih a tul zia te a sawi a. Ruihhlo laka fihlim a, mahni invawn leh insum theihna lama hmasawn zel turin players te leh mipuite a fuih a ni.

He inkhawmah hian Phullen GSA Team a khelte chawimawina hun Pu Lalrotluanga kaihhruaiin hman a ni a. Players te leh Coach chu mipui hmaah ko chhuakin, Chawimawina Parthi awrh tir an ni a. Kalkhawm mipuite lawm an hlawh hle.

He hunah hian kan khaw zaithiam tak takte - Nl Lalruatzeli, Nl Lalremruati, Pu Lalhmuchhuaka, Nl Marina Zohmingthangi leh Pu T.Lalruatmawia te chuan, thiam takin kalkhawm mipuite zaiin an awi a. PSUA Dance Screw ten lam mawi tak an en tir bawk a. GSA President Pu B. Lalnuntluanga chuan Championp lawmna hun an hman theih nana tha leh zung sengtu zawng zawngte hnenah GSA hmingin lawmthu a sawi a ni.

He hunah hian Players te leh GSA hruaitute bakah kan khawtlanga sawmbik mi ṭhahnem tak an kalkhawm a. Tlaiah Champion lawmna ruai an kilho nghal a ni.