Phullen Khaw SAM hlachhammi chu

(Phuahtu : Vanlalhluni Pachuau – 16th September, 2002)

Khaih khai khai, Lo ngaithla teh u khai,
Zoram hmarchhak khaw lian leh hmingthang;
Lal ropui Vanphunga khua kan ni ngai e,
Kan zam ngai lo, mihrang sahrang doral hma’an,
Khawi nge aw, Pi leh Pu ten thang an hlenna
Pasaltha leh ramvachalte lungkham ram chu;
Kan hril zel dawn an sakhming reng a chul si lo.

Darkhuang ram leh Buannel,
Saisih leh khawchhe-hlumte;
Thentlang ram leh Mualbeubawk te hi,
E, a ni tak, Kingpui leh Kingte mual;
Sakhi-rawhkawn leh Chhiarzawl te pawh,
Muallungthu leh Thenzawl ram, Sahlam-kawnte;
Khampuirang leh Sahmulatual ten nen

Ramtuk an rel, kawltuan chawi e,
An zam ngai lo turnipui sensa hnuaiah;
A dang ngai lo, khuangruah sur leh virthli lengthen
Hlimten an leng, vang khawpui sumtual an mawi.
Hawihtin an hawm, thupha chawi tawn zelin,
An lungkham chu maw, Rimawi leh Taimak;
Tlawmngaih, huaisen leh dikna te nen.

Ramtuan an rel changin an dawn thin asin,
Zo tuithiang, lentu chawivel ram daia’n;
Tuiriza, Puantawm leh Kawngbo luite.
Chhirdem leh Tuizal, Zawngkheng leh Tuidam te u,
In ngai lawm ni, indawn ve lo em ni;
Kir zai rel lo, hnutiang reng hawi lo,
Hunin a liampui zawngte hi, hril ve zai in rel si lo.

Kei zawng ka dawn thin che Lentlangpui,
I chawi hringhniang hraite pawh an tlei ta e.
Rualtinkhuma’n Rev. Zairema;
Martar Chalbuanga Chhangte, Dr. Ramdinthara Sailo te pawh.
A mi hluanin raltiang ram an kai ta e;
Vul zel ang che, Pi pu chena sakhming chullo;
Hringhniang nau nawnte kha lo chawilian zel ang che.

E khai! I dawn chiang teh ang u khai,
Kan chhingmitte pawh nuai fiah ila;
Kan khawtlang pawh, chanchinthain kum 100 a tlin tak hi,
Centenary, Gospel Centenary kan lawm e.
I hai lawng aw, Isua lamtang hmasate kha,
Thovin han hawi vel se la aw;
Lawmin an au ngei ang, Halleluia!!!
Lalpa ropui ber rawh se tiin.